اتالعان دوپ دوداسى قازاقستاننىڭ ەڭبەك سىڭىرگەن قايراتكەرى نەسىپ ءجۇنىسباي ۇلىنىڭ باستاماسىمەن بۇعان دەيىن قاناتىن كەڭ جايىپ, ءداستۇرلى تۇردە وتكىزىلىپ تۇرعان-دى. وكىنىشكە قاراي, سوڭعى ەكى-ءۇش جىلدا ۇيىمداستىرىلماي, ۇمىتىلا باستاعان ەدى. الايدا ارداگەر سپورت ءجۋرناليسىنىڭ باستاماسىمەن ءتۋرنيردى قايتا قولعا الىپ, تىنىسىن اشتى. جامبىل وبلىسى اكىمدىگىنىڭ قولداۋىمەن جوعارى دەڭگەيدە ۇيىمداستىرىلعان جارىس تاۋەلسىزدىگىمىزدىڭ 30 جىلدىعىنا ارنالدى.
ء«بىر اتانىڭ بالالارى فۋتبول وينايدى» ءتۋرنيرى – بالاماسى جوق وتباسىلىق جارىس. بۇل جولى جەرگىلىكتى وتباسىلاردان بولەك, الماتى, تۇركىستان, ماڭعىستاۋ, قىزىلوردا وبلىستارىنان 48 كوماندا قاتىستى. كوكەەۆ, ماۋلەن اتا, ەشەنقۇل اتا, قىليشاەۆ, قايىپبەرگەنوۆ سياقتى بىرنەشە وتباسىدان 300-دەن اسا اتاسى مەن اكەسى جانە بالالارى مەن نەمەرەلەرى بار كوماندالار كەلدى. بۇل – رەكوردتتىق كورسەتكىش», دەدى ن.ءجۇنىسباي ۇلى.
جۋرناليست-جازۋشىنىڭ ايتۋىنشا, ەلىمىزدىڭ فۋتبولى, ەگەمەندىگىمىزگە 30 جىل تولسا دا, سول بويى كەنجە قالىپ كەلە جاتىر. ۋەفا-نىڭ قۇرامىنا كىرگەنىمەن, ەۋروپالىق بارلىق تۋرنيرلەردە قاپ-قاپ دوپ ارقالاپ, جەڭىلىستەن كوز اشپاۋدامىز. وسىنىڭ بارلىعى حالىقتىڭ نامىسىنا تيەتىنى ءسوزسىز. ولاي بولاتىن بولسا, قۇراما نامىسىن قورعايتىن فۋتبولشىلاردى وسى ء«بىر اتانىڭ بالالارى فۋتبول وينايدى» اتتى تۋرنيردەن تاۋىپ, تاربيەلەيمىز عوي دەگەن ءۇمىتىمىز دە جوق ەمەس.
«وسى جارىستى جىل سايىن تاراز قالاسىندا ۇيىمداستىرساق دەگەن نيەتىمىز بار. جالپى, وتباسىلىق ءتۋرنيرىمىز – جاي عانا تۋرنير ەمەس, ول – جاستاردىڭ تاربيەسىنە وراسان زور ىقپال ەتە الاتىن بىرەگەي سپورت دوداسى. بۇل تۋرنير – تاربيە قۇرالى. وتباسىلىق تۋرنيردە جەڭىمپاز اتانۋ ماڭىزدى ەمەس. ەڭ باستىسى, سالاماتتى ءومىر سالتىنا دەگەن نيەت كۇشەيسە دەيمىز. ولاي بولسا, ءسىز بەن ءبىزدىڭ ماقساتىمىزدىڭ ءبىر ارنادا توعىسقاندىعى, ارمانىمىزدىڭ ورىندالعانى. ىرگەلى ىسكە قولداۋ كورسەتكەن جامبىل وبلىسىنىڭ اكىمى بەردىبەك ساپارباەۆقا, وبلىستىق سپورت باسقارماسىنا جانە بارشا ازاماتتار ءۇشىن العىس ايتامىن», دەدى ارداگەر قالامگەر.
ال «اناعا تاعزىم» ورتالىعىنىڭ باسشىسى ەلميرا مىرزاعالي جەڭىمپاز كوماندا – كوكەەۆتەر وتباسىنا جامبىل جاباەۆتىڭ سۋرەتى بەينەلەنگەن كىلەمدى سىيعا تارتتى: «كيەلى تاراز توپىراعىندا ەكى كۇن بويى وتكەن فۋتبول مەرەكەسىندە جەتىسۋلىق كوكەەۆتەر كومانداسى جەڭىس تۇعىرىنا شىقتى. اتالعان وتباسىنا قۇرمەت كورسەتىپ, جامبىل بابامىزدىڭ سۋرەتى بەينەلەنگەن كىلەمدى سىيعا تارتتىم. شىركىن-اي, وسى كومانداداعى شەبەر ءۇش ويىنشىنىڭ اناسى ساۋلە حانىم سىيلىققا قول سوزباس بۇرىن ۇلى باباسىنىڭ سۋرەتىنە قاراپ سالەم سالعاندا, ءىشىم ودان بەتەر جىلىپ كەتتى. جامبىلدىڭ 175 جىلدىعىندا اۋليەاتادا وتكەن جارىستان تابارىك بولسىن دەپ الا كەلگەن تارتۋىمنىڭ الماتى وبلىسى جامبىل اۋدانىنىڭ تۋمالارىنا, ونىڭ ىشىندە جامبىل كوكەەۆتەي فۋتبولشىنىڭ اناسىنا بۇيىرعانىنا رازى بولدىم. جۇزىنەن نۇر توگىلگەن انانىڭ نيەتى ۇلدارىن ءالى تالاي شىڭدارعا شىعاراتىنىنا ءشۇباسىز سەنەمىن», دەدى ە.مىرزاعالي.
48 كوماندا 16 توپقا ءبولىنىپ, ءاربىر توپتان ءبىر عانا كوماندا 1/8 فينالعا جولداما الدى. ءارى قاراي, وليمپيادالىق جۇيەمەن جەڭىمپاز انىقتالدى. فينالدا وسى ءتۋرنيردىڭ تىرناقالدى دوداسىندا جەڭىمپاز اتانعان, ودان كەيىن بىرنەشە رەت جۇلدەگە ىلىككەن كوكەەۆتەر (الماتى وبلىسى) وتباسى جەڭىسكە جەتىپ, باس بايگەنى يەلەندى. اقتىق سىندا ولار مىرزابەكوۆتەر (تۇركىستان وبلىسى) اۋلەتىن 3:0 ەسەبىمەن جەڭىپ, وسىمەن ءتۋرنيردىڭ التى دۇركىن جەڭىمپازى اتاندى. ال ۇزدىك ۇشتىكتەن يمانقۇلوۆتاردان (الماتى وبلىسى) 1:0 ەسەبىمەن باسىم تۇسكەن قىليشاەۆتار (ماڭعىستاۋ وبلىسى) كومانداسى كورىندى.
بىرنەشە اتالىمدا ۇزدىكتەر انىقتالىپ, ولاردىڭ بارىنە سىيلىقتار تاپسىرىلدى. اتاپ ايتقاندا, وتباسىلىق تەڭبىل دوپ تۋرنيرىندە «ەڭ جاس ويىنشى» – نەبارى سەگىز جاستاعى جاڭگىر كوكەەۆ, «ەگدە ويىنشى» – «قوبىلاندى باتىر» كومانداسىنىڭ مۇشەسى ازىمبەك تىلەشوۆ, «ەڭ ۇزدىك قاقپاشى» – سۇلەي اۋلەتىنەن دۇيسەنباي بولەگەنوۆ, «ەڭ ۇزدىك قورعاۋشى» – يمانقۇلوۆتار وتباسىنىڭ مۇشەسى دياس عابيت ۇلى, «ەڭ ۇزدىك شابۋىلشى» ماڭعىستاۋلىق ازامات لەسپاەۆ لايىق دەپ تانىلدى. سونىمەن قاتار ءوز كوماندالاستارىنا, باۋىرلارىنا جانكۇيەر بولىپ كەلگەن بالالار مەن انالارعا دا سىيلىقتار بەرىلىپ, تۋرنير جوعارى دەڭگەيدە ءوتتى.
