اۋەجايدا تسيفرلىق جەكە كۋالىكتى پايدالانۋ ءۇشىن eGov mobile-دا اۆتورلاندىرىلعان پايدالانۋشى «تسيفرلىق قۇجاتتار» سەرۆيسىنە كىرىپ, تىزىمنەن جەكە كۋالىكتى تاڭداۋى قاجەت. اۋەجايدىڭ تىركەۋ تاعانىندا, سونداي-اق ۇشۋ الدىنداعى تەكسەرۋدەن ءوتۋ كەزىندە سەرۆيستە جاسالعان QR-كودى بار سمارتفوننىڭ ەكرانىن كورسەتۋ كەرەك.
قازاقستاندىقتار ءۇشىن ىشكى رەيستەردە تسيفرلىق جەكە كۋالىكتى پايدالانۋ مۇمكىندىگى يندۋستريا جانە ينفراقۇرىلىمدىق دامۋ مينيسترلىگىنىڭ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ, ازاماتتىق اۆياتسيا كوميتەتىنىڭ, «قازاقستاننىڭ اۆياتسيالىق اكىمشىلىگى» اق-نىڭ, قازاقستان رەسپۋبليكاسىنىڭ اۋە كومپانيالارى مەن اۋەجايلارىنىڭ جانە «ۇلتتىق اقپاراتتىق تەحنولوگيالار» اق-نىڭ جۇيەلەردى ينتەگراتسيالاۋ بويىنشا بىرلەسكەن جۇمىسىنىڭ ارقاسىندا پايدا بولدى.
تسيفرلىق قۇجاتتار سەرۆيسى پيلوتتىق رەجيمدە جۇمىس ىستەيدى. تسيفرلىق قۇجاتتار بويىنشا ۇشۋلار نۇر-سۇلتان, الماتى, اقتوبە, شىمكەنت, تۇركىستان, اقتاۋ, اتىراۋ, تاراز, پەتروپاۆل, قاراعاندى, وسكەمەن, سەمەي جانە قوستاناي قالالارى اراسىندا قولجەتىمدى. جوعارىدا اتالعان اۋەجايلاردا سەرۆيستى پايدالانۋدى جوسپارلاپ وتىرعان جولاۋشىلارعا جوبانىڭ پيلوتتىق كەزەڭدە جەكە كۋالىگىنىڭ تۇپنۇسقاسىن الىپ ءجۇرۋ ۇسىنىلادى.
