قالانىڭ قاۋىرت تىرلىگىنەن قول بوساعاندا اۋىلعا قاراي جول سالعىڭ كەلىپ تۇرادى. ءدال وسى كارتيناداعىداي الاڭسىز كۇندەردىڭ جاڭعىرىعى ساناڭىزدى بيلەپ الاتىنى بار. «اۋىلدان ادام كوشكەنمەن, ادامنان اۋىل كوشپەيدى» دەگەندەي وسى ءبىر نازىك ويدان ارىلا المايسىز. بەلگىلى سۋرەتشى تايرا گادەەۆا-مولدابەكوۆانىڭ «جايلاۋداعى كوكتەم» تۋىندىسى سوزىمىزگە دالەل بولا الاتىنداي. كارتينانىڭ ءبىزدى بىردەن جىلى پىكىرگە جەتەلەۋىنىڭ ءتۇپ باستاۋىندا سول اۋىلعا دەگەن ساعىنىش جاتقانى داۋسىز.
جالپى, قىلقالام شەبەرىنىڭ شىعارمالارى وتە نازىك ءارى اسەرگە تولى كەلەدى. بايقاساڭىز, ونىڭ تۋىندىلارىنا دەتالداردىڭ, راكۋرستار مەن كومپوزيتسيانىڭ بەينەلىلىگىن بايىپتاپ الۋ ءتان. سودان دا بولار ءاربىر كەيىپكەرىنىڭ بويىنان جىلىلىق ەسىپ تۇرادى.
«جايلاۋداعى كوكتەم» تۋىندىسى نەگىزگى باستاۋحاتى بالالىق شاق ەكەنىن اڭداپ وتىرمىز. قولىنا قىلقالام ۇستاعان سۋرەتشى ومىرىندە ايتەۋىر ءبىر وسى تاقىرىپقا ورالاتىنى انىق. ونەر ادامىنىڭ بويىندا قانشا ەسەيسە دە بالداۋرەن كۇننىڭ ءبىر بەلگىسى قالىپ قوياتىنى سوندىقتان. ۇستاز ۆاسيلي سۋحوملينسكيدىڭ «بالالىق شاق جىلدارى – بۇل بارىنەن بۇرىن جۇرەكتىڭ ەستەلىگى» دەگەن ءسوزى كارتينانىڭ ومىرگە كەلۋىنە نەگىز بولعان سىڭايلى.
بالالار قاشاندا جاڭالىققا قۇمار, ۇنەمى وسى شاقپەن ءومىر سۇرەدى. كارتينا كومپوزيتسياسىندا توبەگە ۆەلوسيپەدىن قالدىرىپ, قولىنا ءدۇربى ۇستاپ وتىرعان جاس بالانى كورەمىز. ءدۇربىسى ارقىلى الىستاعى قوي ءورىسىن تاماشالاماق نيەتتە. قاراپ وتىرساڭىز, جاڭا كوكتەگەن بالعىن ءشوپ, شەشەك جارعان ۇساق كوك گۇلدەر, بالانىڭ ارتىنداعى جايىلىپ جۇرگەن قويلار, سولعىن جارىق ءبىزدى كوكتەمنىڭ جىلى كۇنىنە الىپ بارادى. وسى كارتيناعا ۇڭىلە وتىرىپ ءبىر ساتكە بالالىق شاققا ساپارلايسىز.
