– ناير مىرزا, بۇگىندە «ارسەلورميتتال تەمىرتاۋ» ءىرى تاۋ-كەن مەتاللۋرگيا كومپانياسى سانالادى, 26 جىل بۇرىن كاسىپورىننىڭ ەلىمىزدەگى قىزمەتى قالاي باستالدى؟
– وزدەرىڭىز بىلەتىندەي, 1991-1995 جىلدار ارالىعىندا ەل بويىنشا جاعداي وتە كۇردەلى بولدى. ونەركاسىپتىك كاسىپورىندار بىرىنەن سوڭ ءبىرى جابىلدى, ينجەنەرلىك-تەحنيكالىق كادرلار بۇل جەردەن پەرسپەكتيۆالار كورمەي, جاپپاي شەتەلگە كەتىپ جاتتى. تەمىرتاۋ قالاسىنداعى ءىرى مەتاللۋرگيالىق كومبينات تا تولىق توقتاۋعا جاقىن بولدى, قىزمەتكەرلەرگە ۇزاق ۋاقىت بويى جالاقى تولەنبەدى, ال قالانىڭ وزىندە جىلۋ دا بولعان جوق.
قازاقستاندىقتار ەكونوميكانىڭ تۇراقتانۋى مەن جاڭعىرۋىن ەلدىڭ تۇڭعىش پرەزيدەنتى ن.ءا. نازارباەۆتىڭ ەسىمىمەن بايلانىستىرادى. قازاقستان ماگنيتكاسىن جانە قاراعاندى كومىر شاحتالارىن ساقتاۋ مەن قايتا جاڭعىرتۋ دا ەلباسىنىڭ جەكە قاتىسۋىمەن جۇزەگە استى. جاس تاۋەلسىز قازاقستاننىڭ قالىپتاسۋىندا تۇڭعىش پرەزيدەنتتىڭ شەتەلدىك ساپارلارى, سونىڭ اياسىندا شەتەلدەردىڭ باسشىلارىمەن جەكە بايلانىستارى جانە جەتەكشى ەكونوميكالىق الىپتارمەن تابىستى كەلىسسوزدەرى شەشۋشى ءرول اتقاردى.
1995 جىلعى قاراشا ايىندا NLM توبى (كەيىننەن ArcelorMittal توبىنا اينالعان) قازاقستانداعى ءىرى مەتاللۋرگيالىق كاسىپورىننىڭ اكتيۆتەرىن ساتىپ الىپ, 800 ملن دوللار ينۆەستيتسيالادى, ونىڭ باسىم بولىگىن كاسىپورىندى تەحنيكالىق قايتا جاراقتاندىرۋعا جۇمسادى. لاكشمي ن.ميتتال باستاعان توپ باسشىلىعى ەل مەن ءوڭىردىڭ ودان ءارى ەكونوميكالىق دامۋىنىڭ ۇلكەن پەرسپەكتيۆالارى بار جانە وعان كاسىپورىن دا ءوز ۇلەسىن قوسا الادى دەپ سەندى.
ن.نازارباەۆ قاراپايىم جۇمىسشىلار اراسىندا ءاردايىم بەدەلدى بولدى. ارىپتەستەردىڭ ايتۋىنشا, بىرنەشە اي بويى قارىزعا جۇمىس ىستەگەن زاۋىت جۇمىسشىلارىنىڭ سەنىمىنە يە بولۋ وتە قيىن ەدى. ول جۇمىسشىلاردى شەتەلدىك ينۆەستوردىڭ نيەتى ءتۇزۋ جانە ۇزاق ۋاقىت بويى جۇمىس ىستەۋگە دايىن ەكەندىگىنە سەندىردى.
كاسىپورىندا تىندىرىلعان ءبىرىنشى ءىس – جالاقى تولەندى. سودان كەيىن سۋىق يلەكتەۋ تسەحىندا مەتالل وڭدەۋ جەلىسى جانە دايىن ءونىمدى وراۋ ۋچاسكەسى قايتا قۇرىلدى. زاۋىتتا ەكى ىستىق مىرىشتاۋ جانە مەتالل جولاقتى اليۋميني مىرىشتاۋ جەلىلەرى سالىندى.
سول كەزدە وندىرىستىك قانا ەمەس, بۇكىل قالانىڭ پروبلەمالارى دا شەشىلدى. جۇمىسشىلاردىڭ ەڭبەك جاعدايلارىمەن قاتار, ءومىر ءسۇرۋ جاعدايلارىن دا جاقسارتۋ كەرەك ەدى. مەتاللۋرگيا كومبيناتىنىڭ جەو-2 تەمىرتاۋ تۇرعىندارىن جىلۋمەن جانە ەلەكتر ەنەرگياسىمەن قامتاماسىز ەتە باستادى, ال قارگرەس-كە وسى فۋنكتسيالاردى قالانىڭ ەسكى بولىگىندە عانا اتقارۋ جۇكتەلدى.
2005 جىلى ەكى ۇزدىكسىز قاڭىلتىر قۇيۋ ماشيناسىن ىسكە قوسقان سوڭ زاۋىتتىڭ الدىنان جاڭا مۇمكىندىكتەر اشىلدى. №2, 3 جانە 4 دومنا پەشتەرىندە 2-ءشى رازريادتى كۇردەلى جوندەۋ جۇمىستارى جۇرگىزىلدى. ماركەتينگ سالاسىنداعى جۇمىس تا جاڭا دەڭگەيگە شىقتى – وتكىزۋ نارىعىن قايتادان يگەرۋگە تۋرا كەلدى.
سودان بەرى 26 جىل ءوتتى. «ارسەلورميتتال تەمىرتاۋ» كومپانياسى اۋەلدەن رەسپۋبليكاداعى جۇمىسىن قارقىندى باستاپ, ءالى دە قازاقستاننىڭ قارا مەتاللۋرگياسىنىڭ فلاگمانى بولىپ كەلەدى.
– ءسىز ماڭىزدى اسپەكتى – كومپانيانىڭ قالا ومىرىنە ىقپالىن ايتىپ ءوتتىڭىز, بۇگىندە «ارسەلورميتتال تەمىرتاۋ» كومپانياسىنىڭ الەۋمەتتىك ماڭىزى قانداي؟
– بۇل تەمىرتاۋ قالاسىنا عانا قاتىستى ەمەس. 30 مىڭنان استام ادام ەڭبەك ەتەتىن كومپانيا كاسىپورىندارى 8 مونوقالادا قالا قۇراۋشى بولىپ سانالادى, 180 مىڭنان استام تۇرعىندى كوممۋنالدىق قىزمەتتەرمەن قامتاماسىز ەتەدى.
2019 جانە 2020 جىلدارى قالالاردىڭ ينفراقۇرىلىمىنا سالىنعان ينۆەستيتسيا 1,3 ملرد تەڭگەنى; دەنساۋلىق ساقتاۋ مەن قاۋىپسىزدىككە, ەكولوگيالىق قوعامداستىقتى دامىتۋعا جانە الەۋمەتتىك ءىس-شارالارعا سالىنعان ينۆەستيتسيا 1,9 ملرد تەڭگەنى قۇرادى. ال ءوندىرىستىڭ قورشاعان ورتاعا اسەرىن ازايتۋعا اتالعان كەزەڭدە 30,8 ملرد تەڭگە باعىتتالدى.
كومپانيانىڭ وڭىردەگى الەۋمەتتىك جوبالارىنىڭ جالپى قۇنى 1,1 ملرد تەڭگەنى قۇرادى. تەمىرتاۋدا زاماناۋي ەمحانا مەن دەنە شىنىقتىرۋ-ساۋىقتىرۋ ورتالىعىن سالدىق. قازىر بالاباقشا قۇرىلىسى جۇرگىزىلىپ جاتىر.
ءبىز ارقاشان الەۋمەتتىك جاۋاپتى كومپانيا بولدىق. سوڭعى ۋاقىتتا وسى باعىتتاعى بەلسەندىلىگىمىز ارتا ءتۇستى. قاراعاندى وبلىسىنىڭ اكىمدىگىمەن ىنتىماقتاستىق جونىندەگى بىرقاتار مەموراندۋم جاسالدى. ونىڭ ىشىندە 800 ملن تەڭگەدەن استام سوماعا وقۋ ورىندارىن قولداۋ جانە 250 ملن تەڭگەدەن استام سوماعا شاحتينسك قالاسىنداعى مادەنيەت جانە دەمالىس ساياباعىن قايتا جاڭارتۋ بار. تۇراقتى جوبالارعا كەلسەك, كومپانيا بالانسىندا بالالار-جاسوسپىرىمدەر ورتالىعى, «ميتتال» سپورت كەشەنى, «سامال» ساناتوري-پروفيلاكتوريى, قازاق مادەني ورتالىعى, «شاحتەر» تەننيس ورتالىعى, «رومانتيك» بالالار لاگەرى, «فاكەل» بالالار لاگەرى بار.
كومپانيا قىزمەتكەرلەرى مەن ولاردىڭ وتباسىلارىنىڭ لايىقتى ءومىر ءسۇرۋى ءبىز ءۇشىن ماڭىزدى. 2020-2021 جىلدارى ادامي كاپيتالعا, الەۋمەتتىك ساياساتقا, قىزمەتكەرلەردى قولداۋعا جانە قاۋىپسىز ەڭبەك جاعدايلارىن جاساۋعا سالىنعان ينۆەستيتسيالاردىڭ جالپى كولەمى 47,6 ملرد تەڭگەدەن استى.
– پاندەميامەن كۇرەس, جۇمىسشىلاردى قولداۋ شارالارى قالاي جۇرگىزىلۋدە؟
– كاسىپورىنداردا COVID-19-دان بارىنشا قورعالعان ەڭبەك جاعدايلارىن جاساۋ بويىنشا شارالار قابىلداندى. كومپانيا بىردەن الەۋمەتتىك وسال توپتارعا ارنالعان بىرنەشە جوبانى ىسكە قوستى. ادامدار كوپ جينالاتىن جەرلەردە جۇمىسشىلاردىڭ بولۋىن ازايتۋ ءۇشىن اۆتوبۋستار ۇيىمداستىرىلدى, ولار مەتاللۋرگتەر مەن شاحتەرلەردى بارلىق سانيتارلىق-ەپيدەميولوگيالىق نورماعا سايكەس جۇمىسقا جانە ۇيگە اپاردى. سونداي-اق قورعانىس ماسكالارى تاپشى بولعان كەزدە كومپانيا كۇشىمەن 330 مىڭنان استام قورعانىس قۇرالى تىگىلدى.
ۆاكتسينالاۋ باستالعان كەزدە, تىكەلەي كاسىپورىنداردىڭ دەنساۋلىق ساقتاۋ پۋنكتتەرىندە ەگۋ بولمەلەرى ۇيىمداستىرىلدى. بۇل ۇجىمدى ۆاكتسينالاۋمەن بارىنشا قامتۋعا مۇمكىندىك بەردى. قىزمەتكەرلەردى وزدەرىنىڭ جانە باسقالاردىڭ قاۋىپسىزدىگى تۋرالى ويلاۋعا جانە ەگىلۋگە ىنتالاندىرۋ ءۇشىن ۆاكتسينالاۋدىڭ تولىق كۋرسىنان وتكەندەرگە سىياقى بەردىك. سونىمەن قاتار ولاردىڭ اراسىندا ءۇش اۆتوموبيل ويناتىلدى. بۇل كولىكتەردى قاراپايىم جۇمىسشىلار: سلەسار, شاحتەر جانە جۇرگىزۋشى جەڭىپ العانى قۋانتادى. جوعارىدا اتالعان بارلىق ءىس-شارالار جاقسى ناتيجە بەردى – كومپانيا ۇجىمىنىڭ 92%-دان استامى ۆاكتسينالاندى.
سونداي-اق قاراعاندى وبلىسىنىڭ مەديتسينالىق مەكەمەلەرىنە Pfizer-BioNTech ۆاكتسينالارىن ساقتاۋ جانە تاسىمالداۋ ءۇشىن 180 ملن تەڭگەگە جابدىق ساتىپ الىپ, كومەك كورسەتتىك. جالپى, كۆي-مەن كۇرەسكە 2,7 ملرد تەڭگەدەن استام قارجى باعىتتالدى.
– ءسىز كومپانيانىڭ الەۋمەتتىك جوبالارى بويىنشا ايتارلىقتاي كورسەتكىشتەرگە توقتالدىڭىز, ال سالىققا قاتىستى نە ايتاسىز؟ «ارسەلورميتتال تەمىرتاۋ» مەملەكەت قازىناسىنا قانشا قاراجات تولەيدى؟
– جىل سايىن «ارسەلورميتتال تەمىرتاۋ» تولەيتىن سالىقتاردىڭ جالپى سوماسى 60 ملرد تەڭگەدەن اسادى. الايدا بيىل مەملەكەتتىك بيۋدجەتتى 100 ملرد تەڭگەدەن استام سوماعا تولىقتىرۋدى جوسپارلاپ وتىرمىز.
– قازىرگى ۋاقىتتا تۇراقتى دامۋ ماقساتتارى, كومىرتەگى ءىزىن ازايتۋ جانە جالپى پروتسەستەردى, تەحنولوگيالاردى جەتىلدىرۋ, ەكولوگيالىق تۇرعىدان تازا بولۋ – جاي ترەند قانا ەمەس, ومىرلىك قاجەتتىلىك. كومپانيا وسى باعىتتا قانداي جۇمىستار اتقارىپ جاتىر؟
– «ارسەلورميتتالدىڭ» جاھاندىق ماقساتى – الدەقايدا ءتيىمدى جانە ەنەرگيانى از پايدالاناتىن, كومىرتەكتى از شىعاراتىن يننوۆاتسيالىق پروتسەستەردى قولدانا وتىرىپ جاسالعان بولاتپەن جاقسى الەم قۇرۋعا كومەكتەسۋ. «ارسەلورميتتال» الەمدە 2050 جىلعا قاراي كومىرتەگى بەيتاراپتىعىنا قول جەتكىزۋگە جانە 2030 جىلعا قاراي 25%-عا تومەندەتۋدى ماقسات ەتىپ وتىر. گەرمانيا, يسپانيا, بەلگيا جانە كاناداداعى «ارسەلورميتتال» بولىمشەلەرىنىڭ ەل ۇكىمەتىمەن كومىرتەگى ءىزىن ازايتۋ بويىنشا كۇش-جىگەرىن قولداۋ تۋرالى كەلىسىمدەرى بار. ءبىز قازاقستان ۇكىمەتىمەن وسىنداي كەلىسىم جاسايمىز دەپ ۇمىتتەنەمىز.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ كومىرتەكتىك بەيتاراپتىق ستسەناريى ءۇشىن العا قويىلعان ماقساتتارعا قول جەتكىزۋدە مەملەكەتتىڭ, بيزنەس پەن جالپى قوعامنىڭ بەلسەندى بىرلەسكەن كۇش-جىگەرى قاجەت ەكەنىن بىرنەشە رەت اتاپ ءوتتى. ونى تابىستى ىسكە اسىرۋ 2030 جىلعى ماقساتتارعا – 1990 جىلعى دەڭگەيگە قاراعاندا شىعارىندىلاردى 15%-عا تومەندەتۋگە عانا ەمەس, سونداي-اق 2060 جىلعا قاراي پارنيكتىك گازداردىڭ نولدىك تەڭگەرىمىنە دە قول جەتكىزۋگە مۇمكىندىك بەرەدى. ءبىز «ارسەلورميتتال تەمىرتاۋدا» كۇش-جىگەرىمىزدى بىرىكتىرە وتىرىپ, كوزدەگەن ناتيجەلەرگە قول جەتكىزۋگە بولاتىنىنا سەنىمدىمىز.
– قازىرگى ۋاقىتتا كومپانيا قانداي ماڭىزدى ەكولوگيالىق جوبالاردى جۇزەگە اسىرۋدا؟
– قازىرگى كەزدە ءۇش ۇلكەن جوبا بەلسەندى ىسكە اسىرىلىپ جاتىر. ونىڭ باستى ماقساتى – قورشاعان ورتاعا شىعارىلاتىن شىعارىندىلار سانىن ازايتۋ. ءبىرىنشىسى, باس كورپۋستى قالپىنا كەلتىرۋ جانە جەو-2-دە №7 قازاندىقتى مونتاجداۋ. بۇل جوبانىڭ تاعى ءبىر ماڭىزدى اسەرى بار. بۇل قالاعا ىستىق سۋ بەرۋدى جانە ونىڭ تەڭگەرىمدى شىعىنىن ۇلعايتۋ مۇمكىندىگى. قازىر التى قازاندىق جۇمىس ىستەپ تۇر, دەگەنمەن قولدانىستاعى قۋاتتار جەتكىلىكسىز. قويماعا قوسالقى بولشەكتەر مەن جابدىقتاردىڭ 65%-ى اكەلىندى. جۇمىستى 2022 جىلدىڭ ناۋرىز ايىندا اياقتاۋ جوسپارلانعان, سودان كەيىن №7 قازاندىق پەن ونىڭ بارلىق كومپونەنتتەرىن ورناتۋ قولعا الىنادى. جوبانى 2023 جىلعى قىركۇيەكتە تولىق اياقتاۋ كوزدەلگەن. قازىرگى ۋاقىتتا بارلىق جۇمىس كەستەگە سايكەس جۇرگىزىلىپ جاتىر.
بۇدان باسقا, ەكى وندىرىستىك جوبا «ارسەلورميتتال تەمىرتاۋ» اق جەو-پۆس-دا ىسكە اسىرىلۋدا, ياعني ەكى رەت تازالاناتىن №1 قازاندىق پەن بيىكتىگى 150 مەتر, ياعني بۇرىنعىدان 50 مەتر جوعارى جەو-پۆس ءتۇتىن قۇبىرىن سالۋ. جۇمىس كەستە بويىنشا جۇرگىزىلۋدە جانە 2022 جىلعى تامىزدا اياقتاۋ جوسپارلانىپ وتىر. بۇل جوبالار ەكولوگيالىق جاعدايعا جانە وڭىردەگى ءومىر ساپاسىنا ايتارلىقتاي وڭ اسەرىن تيگىزەدى.
– فيلترلەردى ورناتۋ – وزەكتى ماسەلە. وسى باعىتتا قانداي جۇمىس جۇرگىزىلەدى؟
– فيلترلەردى ورناتۋ – ءبىزدىڭ ەكولوگيالىق جوسپارىمىزدىڭ ماڭىزدى قۇرامداس بولىگى. اگلووندىرىستە №5 اگلوماشينادا ەلەكتر فيلترلەرىن ورناتۋ بويىنشا جۇزەگە اسىرىلۋدا. بۇعان دەيىن ەسكى تازارتۋ جۇيەلەرى اگپ-دا – مۋلتيتسيكلوندار جۇمىس ىستەيتىن, ولاردىڭ تيىمدىلىگى شاڭ شىعارۋدىڭ رۇقسات ەتىلگەن كورسەتكىشتەرىنە قول جەتكىزۋگە مۇمكىندىك بەرمەيتىن. بەلگيالىق Hamon فيرماسىنىڭ تەحنولوگياسى بويىنشا جاسالعان جاڭا ەلەكتر ءفيلترى جۇمىس ورىندارىنداعى شاڭدى ازايتۋعا جانە اتموسفەرانىڭ لاستانۋ كورسەتكىشتەرىن جاقسارتۋعا ىقپال ەتەدى. شاڭ شىعارىندىلارى بويىنشا كۇتىلەتىن كورسەتكىشتەر – 45-تەن 50 مگ/م3 دەيىن.
بۇدان باسقا, ءبىز اك كۇيدىرۋ تسەحىندا ەلەكتر فيلترلەرىن ورناتۋدى, سونداي-اق كۇل-قوقىس جيناعىشتى ارتتىرۋ بويىنشا جوبانى قولعا الۋدى جوسپارلاپ وتىرمىز.
2024 جىلعا قاراي «ارسەلورميتتال تەمىرتاۋ» اق كوكس حيموندىرىسىندە كوكس گازىن تازارتۋ جوباسىن ەنگىزەدى. بۇگىندە كوكس باتارەيالارىنان شىعاتىن گازدىڭ قوسپالارى بار. قازىرگى جابدىق گازدى ءتيىستى كولەمدە تازارتا المايدى, بۇل قورشاعان ورتانىڭ لاستانۋىنا عانا ەمەس, سونىمەن قاتار كۇندەلىكتى پايدالانۋ كەزىندە قاۋىپسىزدىك تەحنيكاسىنا بايلانىستى پروبلەمالارعا دا الىپ كەلەدى. جوبانىڭ قۇنى شامامەن 135 ملن دوللاردى قۇرايدى.
– ناير مىرزا, 2024 جىل – مۇنداي ماڭىزدى جوبا ءۇشىن تىم ۇزاق ەمەس پە؟
– ءبىز ءوز تاراپىمىزدان وسىنداي جاھاندىق جوبالاردىڭ بارىنشا تەز ىسكە اسىرىلۋىنا بار كۇش-جىگەرىمىزدى سالامىز, بىراق بارلىق قاجەتتى تالاپتار مەن ىسكە اسىرۋ كەزەڭدەرى مىندەتتى تۇردە ساقتالۋعا ءتيىس. مىسالى, ءبىز ايتىپ وتىرعان جوبا ءۇش كەزەڭگە بولىنگەن. ءبىرىنشىسى, جاڭا سالقىنداتۋ قوندىرعىلارىن ورناتۋ جانە باستاپقى گاز سالقىنداتقىشتاردى قالپىنا كەلتىرۋ. ونى 2022 جىلعى جەلتوقساندا اياقتاۋ جوسپارلانعان. قازىرگى ۋاقىتتا ەسكى جابدىقتى دەمونتاجداۋ جۇرگىزىلۋدە, ونىڭ ورنىنا ءتيىمدى تازارتۋ جۇيەلەرى ورناتىلادى: كومبيناتتا العاش رەت ەنگىزىلەتىن ءۇش ەلەكتر ءفيلترى, مەحانيكالىق جارىقتاندىرعىشتار جانە تسەنتريفۋگا بولماق. جاڭا قوندىرعىلار گاز ساپاسىن جاقسارتادى جانە اۋانىڭ لاستانۋىن ازايتادى. سونىمەن قاتار جوبانىڭ ءبىرىنشى كەزەڭىنىڭ ەڭ قيىن بولىكتەرىنىڭ ءبىرى اياقتالدى – يتاليالىق Paul Wurth كومپانياسىنىڭ جاڭا باستاپقى گاز سالقىنداتقىشى ورناتىلدى. ول زاۋىتقا ەكى رەت بولەك جەتكىزىلدى: كونتراكتسيانىڭ ءبىرىنشى بولىگىنىڭ سالماعى – 47 توننا, ەكىنشىسى – 40 توننا. جابدىقتى ورناتۋ ءۇشىن 500 توننالىق كران قولدانىلدى.
مۇنداي كولەمدەگى جۇمىستار ايتارلىقتاي دايىندىقتى جانە ۋاقىتتى قاجەت ەتەدى.
– ەگەر ساندار ارقىلى ايتار بولساق, 2021 جىلى ەميسسيالار كولەمى قانشاعا ازايتىلدى؟
– ەگەر 2020 جىلدىڭ سايكەس كەزەڭىمەن سالىستىرساق, 2021 جىلدىڭ ءۇشىنشى توقسانىندا ەميسسيا كولەمى 2 مىڭ تونناعا تومەندەدى. بۇل رەتتە بيىل ءوندىرىستىڭ وسكەندىگىن ەسكەرۋ قاجەت.
ءبىز الدىمىزعا ەميسسيانى ازايتۋ عانا ەمەس, تەمىرتاۋدى كوگالداندىرۋ مىندەتىن دە قويىپ وتىرمىز. كومپانيا «جول كارتاسىن» ورىنداۋ اياسىندا قالا اۋماعىندا 500 مىڭ ءتۇپ اعاش وتىرعىزادى. جۇمىس باستالىپ كەتتى, كومبينات اۋماعى كوگالداندىرىلدى, كوكتەمدە جانە كۇزدە تەمىرتاۋدا 11 مىڭنان استام اعاش ەگىلەدى.
«ارسەلورميتتال تەمىرتاۋ» اق ءوڭىردىڭ ەكولوگيالىق جوبالارىنا سالعان ينۆەستيتسيالارىنىڭ جالپى كولەمى 800 ملن دوللاردان اسادى, بۇل قارجى ءوزارا تۇسىنىستىك تۋرالى مەموراندۋم بويىنشا «جول كارتاسى» شەڭبەرىندەگى ينۆەستيتسيالار كولەمىنەن 140 ملرد تەڭگەگە ارتىق. وسى ءىس-شارالاردىڭ بارلىعى ءوز ناتيجەسىن بەرەتىنىنە سەنىمدىمىن. ويتكەنى ءبىزدىڭ كاسىپورىندار ورنالاسقان قالالار كومپانيا ءۇشىن تەك ءوندىرىس ورنى عانا ەمەس. وندا ءبىزدىڭ جۇمىسشىلارىمىز تۇرادى. كومپانيا باسشىلىعى دا تۇرادى, جۇمىس ىستەيدى. مەن ارقاشان كومپانيا – بۇل ءبىر ۇلكەن وتباسى دەپ ايتامىن جانە جاۋاپتى جۇمىس بەرۋشىلەر رەتىندە ادامدارعا جۇمىستا عانا ەمەس, ومىردە دە قولايلى جاعداي جاساۋ ءۇشىن بار كۇشىمىزدى سالۋىمىز كەرەك دەپ سانايمىن.
قازاقستاندا ەكى جىلدان بەرى جۇمىس ىستەپ كەلەمىن. بۇل ەل – مەنىڭ ەكىنشى ۇيىمدەي. ءبارىمىز دە ءۇيىمىزدىڭ جاقسى جانە جايلى بولعانىن قالايمىز. سوندىقتان باستى مىندەتىمىز – قاۋىپسىز جانە تۇراقتى ءوندىرىس قانا ەمەس, ەل ازاماتتارىنىڭ ءومىرىن جاقسارتۋ. وسى ۋاقىت ىشىندە كوپ ءىس اتقارىلدى, ودان دا ارتىعىن قولعا الۋ كەرەك. قازاقستاندىق ماگنيتكا تاۋەلسىز قازاقستانعا سالىقتىق تولەمدەر اكەلىپ قانا قويماي, تۇرعىنداردىڭ الەۋمەتتىك كوڭىل كۇيىن جاقسارتۋ, جاڭا تەحنولوگيالار مەن كاسىپقويلاردىڭ جاڭا بۋىنىن تارتۋ ارقىلى دامىپ, وركەندەۋگە ءتيىس. «ارسەلورميتتال تەمىرتاۋدا» بۇل ماقسات ءۇشىن بار كۇش-جىگەرىمىزدى سالامىز.
اڭگىمەلەسكەن
دۋمان اناش,
«Egemen Qazaqstan»
