نۇرلان قىلىشباەۆ مەملەكەت باسشىسى زەينەتاقى ەسەپ-شوتىنان ارتىق جيناعىن الۋىنا مۇمكىندىك بەرەتىن ازاماتتار ساناتىن بىرتىندەپ ۇلعايتۋدى تاپسىرعانىن ەسكە سالدى. سەناتور قازىرگى تاڭدا شەكتىك سومالاردى قايتا ەسەپتەۋ تاقىرىبى قوعامدا تالقىلانىپ جاتقانىن ايتا كەلىپ, ول ءوز جيناقتارىن پايدالانا الاتىن ادامدار سانىن ازايتاتىنىن اتاپ ءوتتى.
«ەندى ءوز جيناقتارىنىڭ ءبىر بولىگىن پايدالانا الاتىن بجزق سالىمشىلارىنىڭ سانى كۇرت قىسقارۋى مۇمكىن. ەگەر 2021 جىلى ولاردىڭ سانى 700 مىڭنان استام قازاقستان رەسپۋبليكاسىنىڭ ازاماتى بولسا, 2022 جىلعى شەكتى قايتا ەسەپتەۋگە بايلانىستى بۇل سان تۇبەگەيلى وزگەرەدى. بۇگىندە بۇل جەتكىلىكتى شەكتەگى جاسى كەلگەن قاتىسۋشىلار ءۇشىن 63%-دان ەڭ جاس قاتىسۋشىلار ءۇشىن 82%-عا دەيىن ءوسىپ وتىر. قالىپتاسقان جاعداي وسى باعدارلاماعا دەگەن سەنىمگە نۇقسان كەلتىرەدى», دەدى دەپۋتات قىلىشباەۆ.
سەناتور وسىعان بايلانىستى جىلدىق ينفلياتسيا دەڭگەيىنەن اسپايتىن شەكتى ۇلعايتۋ مۇمكىندىگىن قاراستىرا وتىرىپ, مينيسترلەر كابينەتىنىڭ باسشىسىنان ەڭ تومەنگى جەتكىلىكتىلىك شەگىن ەسەپتەۋ ادىستەمەسىنە وزگەرىستەر ەنگىزۋ ماسەلەسىن قاراستىرۋدى سۇرادى.
