بۇگىندە نۇر-سۇلتان قالاسىندا وڭالتۋ ورتالىقتارىنىڭ جەلىسى ايتارلىقتاي كەڭەيتىلدى. ەلوردا اكىمدىگى ەرەكشە قاجەتتىلىكتەرى بار ازاماتتاردى وڭالتۋ ءۇشىن جاعداي جاساۋ جۇمىستارىن جۇيەلى نەگىزدە جۇرگىزىپ جاتىر. «ەرەكشە قاجەتتىلىكتەرى بار ازاماتتاردى الەۋمەتتەندىرۋ جانە وڭالتۋ ءۇشىن جاعداي جاساۋعا ەرەكشە نازار اۋدارامىز. مىسالى, بيىل جازدا كورۋ قابىلەتى بۇزىلعان بالالارعا ارنالعان مامانداندىرىلعان بالاباقشا اشىلدى (كەنەسارى كوشەسى, 9/1, سارىارقا اۋدانى). بالاباقشادا پەداگوگتەرمەن قاتار مەديتسينا قىزمەتكەرلەرى دە بالالارمەن اينالىسادى. مەكەمەدە فيزيوتەراپيا, لوگوپەد-دەفەكتولوگ, وفتالمولوگ جانە تاعى باسقا كابينەتتەر بار», دەدى نۇر-سۇلتان قالاسىنىڭ اكىمى التاي كولگىنوۆ.
شاھار اۋماعىندا 29 «ۇيدەگى دارىگەر» نىسانى اشىلدى. جاڭا ۇيلەردىڭ ءبىرىنشى قاباتتارىندا «قادامدىق قولجەتىمدىلىك» قاعيداتى بويىنشا بالالارعا ارنالعان شاعىن ورتالىقتار, وڭالتۋ ورتالىقتارى, بالاباقشالار, مەديتسينالىق ورتالىقتار اشىلادى. بۇعان قوسا, بىلتىر ەلوردادا بتسپ, اۋتيزم, داۋن سيندرومى جانە تاعى باسقا دياگنوزدارى بار بالالاردى وڭالتۋمەن اينالىساتىن بىرقاتار ءىرى وڭالتۋ ورتالىقتارى حالىققا قىزمەت كورسەتە باستادى.
№1 كوپبەيىندى قالالىق بالالار اۋرۋحاناسىنىڭ بازاسىندا ءبىر جىلدان بەرى «قامقورلىق» وڭالتۋ ورتالىعى جۇمىس ىستەيدى. بۇل ورتالىق نەيرو-ورتوپەديالىق اۋرۋلارى, ونىڭ ىشىندە تسەرەبرالدى سال اۋرۋى بار بالالاردى وڭالتۋدىڭ الەمدىك جانە وتاندىق ەڭ وزىق ادىستەرىن جيناقتاۋعا ارنالعان. ايتا كەتۋ قاجەت, وسى وڭالتۋ ورتالىعى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ قورى مەن «سامۇرىق-قازىنا» اق اراسىندا قول قويىلعان مەموراندۋم اياسىندا قىزمەت كورسەتە باستادى. بۇل ورتالىق قولجەتىمدى وڭالتۋدى دامىتۋدىڭ وزىق ۇلگىسى سانالادى. سەبەبى وسى ورتالىقتا نەيرو-ورتوپەديالىق اۋرۋلارى بار, سونىڭ ىشىندە تسەرەبرالدى سال اۋرۋى بار بالالاردى وڭالتۋدىڭ الەمدىك ۇزدىك ادىستەمەلەرى مەن زاماناۋي تاسىلدەرى قولدانىلادى. كىشكەنتاي ناۋقاستاردى ەمدەۋ كەزىندە ماماندار كوپسالالى تاسىلگە جۇگىنەدى. دارىگەرلەر اۋرۋدىڭ ەرەكشەلىگىن ەسكەرە وتىرىپ, ءار بالانى قالپىنا كەلتىرۋدىڭ جەكە باعدارلاماسىن ازىرلەيدى. ءتىپتى بىرەگەي مەديتسينالىق جابدىقتار سانالاتىن كوستيۋمدەر, جاتتىعۋ قۇرالدارى, جاياۋ ءجۇرۋ داعدىلارى جانە تىرەك-قيمىل اپپاراتى اۋرۋلارى كەزىندە ومىرتقا مەن بۋىنداردىڭ قيمىلىن قالپىنا كەلتىرەتىن قۇرىلعىلار قولدانىلادى. بۇعان قوسا, ەمدىك-دەنە شىنىقتىرۋ (ەدش), فيزيوتەراپيا, جارىقپەن ەمدەۋ, سۋ ماسساجى, لوگوپەد, پسيحولوگ, دەفەكتولوگپەن كۇندەلىكتى جەكە ساباقتار قاراستىرىلعان. وسى ارقىلى جىل سايىن 600-گە جۋىق بالانى قوسىمشا تەگىن مەديتسينالىق كومەكپەن قامتۋعا مۇمكىندىك پايدا بولدى.
مىنە, ەرەكشە جانداردىڭ ومىرلىك مۇڭ-مۇقتاجىن ەلەپ-ەسكەرگەن ەل استاناسىندا وسىنداي يگى ىستەر اتقارىلىپ جاتىر.
