ايماقتار • 08 جەلتوقسان، 2021

ماۋلەن اشىمباەۆ جۇمىس ساپارىمەن قىزىلوردا وبلىسىندا بولدى

70 رەت كورسەتىلدى

سەنات توراعاسى ماۋلەن اشىمباەۆ مەملەكەت باسشىسىنىڭ تاپسىرماسى بويىنشا قىزىلوردا وبلىسىندا بولىپ، تاۋەلسىزدىكتىڭ 30 جىلدىعىنا ارنالعان سالتاناتتى ءىس-شاراعا قاتىستى. ماۋلەن اشىمباەۆ وبلىس تۇرعىندارى الدىندا ءسوز سويلەپ، قازاقستاننىڭ وتكەن كەزەڭدەگى نەگىزگى جەتىستىكتەرىنە توقتالدى، دەپ حابارلايدى Egemen.kz.

«تاۋەلسىزدىك جىلدارىندا ءبىزدىڭ مەملەكەتتىلىگىمىز تولىق قالىپتاستى. ىرگەمىز بەكىپ، شەكارامىز ءبىرجولا شەگەندەلدى. مەملەكەتتىك ينستيتۋتتاردىڭ بەرىك نەگىزى قالاندى. ەسكىرگەن جوسپارلى ەكونوميكادان ۋاقىت تالابىنا ساي جاڭا ەكونوميكالىق مودەلگە كوشتىك جانە ونى نىعايتا تۇستىك»، دەدى سەنات توراعاسى.

ول سونداي-اق قازاقستاننىڭ حالىقارالىق قوعامداستىقتىڭ تولىققاندى جانە ىقپالدى مۇشەسىنە اينالعانىن اتاپ ءوتتى. قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ساياساتىنىڭ ارقاسىندا ەلىمىزدىڭ ورتالىعىندا مۇلدەم جاڭا – نۇر-سۇلتان قالاسى سالىندى. ەلوردانىڭ سالىنۋى ەلىمىزدىڭ بۇكىل ەكونوميكاسى مەن وڭىرلەردىڭ دامۋىنا سەرپىندى اسەر ەتتى. ماۋلەن اشىمباەۆ وسى جىلدار ىشىندە قىزىلوردا وبلىسى دا قارقىندى دامىپ، قازىر ماڭىزدى يندۋستريالىق جانە اگرارلىق وڭىرگە اينالعانىن تىلگە تيەك ەتتى. سەنات توراعاسى ارال پروبلەماسىن شەشۋ ماسەلەسىنە دە نازار اۋداردى.

«تەك تاۋەلسىزدىك العاننان كەيىن عانا ارال پروبلەماسىنا شىنايى ءمان بەرىلە باستادى. تۇڭعىش پرەزيدەنتىمىزدىڭ ۇسىنىسىمەن «سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ» جوباسى قولعا الىندى. وسىنىڭ ناتيجەسىندە سولتۇستىك ارالدىڭ ارناسى تولىپ، كوپتەگەن بيولوگيالىق تۇرلەر قالپىنا كەلگەنى ءبارىمىز ءۇشىن ۇلكەن قۋانىش»، دەپ اتاپ ءوتتى ماۋلەن اشىمباەۆ.

سونداي-اق سەنات توراعاسى ەل پرەزيدەنتى قاسىم-جومارت توقاەۆتىڭ باستاماسىمەن قازاقستاندا ساياسي، الەۋمەتتىك جانە ەكونوميكالىق رەفورمالاردىڭ جاڭا كەزەڭى باستالعانىن ايتتى.

«پرەزيدەنتىمىزدىڭ تاپسىرماسى بويىنشا مەملەكەتتىك باسقارۋ سالاسىندا جۇيەلى رەفورمالار جۇزەگە اسۋدا. «حالىق ۇنىنە قۇلاق اساتىن مەملەكەت» تۇجىرىمداسى نەگىزگى قاعيداعا اينالدى. جەرگىلىكتى وكىلدى جانە اتقارۋشى بيلىكتىڭ دەربەستىگىن ارتتىرۋ ءۇشىن ماڭىزدى قادامدار جاسالدى. بيىل تۇڭعىش رەت اۋىل اكىمدەرىنىڭ تىكەلەي سايلاۋى ءوتتى. بۇل وزگەرىس حالىقتىڭ جەرگىلىكتى بيلىكتى جاساقتاۋعا تىكەلەي ىقپال ەتۋىنە جول اشتى»، دەدى سەنات توراعاسى.

ماۋلەن اشىمباەۆ سونداي-اق ەل پرەزيدەنتىنىڭ وڭىرلەردى دامىتۋعا ەرەكشە نازار اۋدارىپ وتىرعانىن ايتتى. مەملەكەت باسشىسى بيىلعى قازان ايىندا 10 ۇلتتىق جوبانى بەكىتكەن بولاتىن. ولاردىڭ قاتارىندا «قۋاتتى وڭىرلەر – ەل دامۋىنىڭ درايۆەرى» ارنايى جوباسى دا بار.

«بەس جىل ىشىندە وڭىرلەردى دامىتۋ بويىنشا ۇلتتىق جوبانى ىسكە اسىرۋعا ايتارلىقتاي قاراجات بولىنەدى دەپ جوسپارلانۋدا. ەلىمىزدىڭ «ىشكى بايلانىسىن» كۇشەيتۋ مىندەتى جۇكتەلىپ وتىر. ىشكى كولىك جەلىسىن دامىتۋ ءۇشىن رەسپۋبليكالىق ماڭىزى بار جانە جەرگىلىكتى ماڭىزعا يە جولدار سالىنىپ، قايتا جاڭعىرتىلادى. بۇل سىر ەلىنىڭ كولىك-لوگيستيكالىق الەۋەتىن ودان ءارى ارتتىرا تۇسەتىنى ءسوزسىز»، – دەدى ماۋلەن اشىمباەۆ.

سالتاناتتى شارا بارىسىندا سەنات توراعاسى ەل پرەزيدەنتىنىڭ اتىنان ەلىمىزدىڭ جانە ءوڭىردىڭ دامۋىنا ەرەكشە ۇلەس قوسقان قىزىلوردالىقتارعا مەملەكەتتىك ناگرادالاردى تابىس ەتتى.

وڭىرگە ساپارى بارىسىندا ماۋلەن اشىمباەۆ قىزىلوردا قالاسىندا تاباق شىنى ءوندىرۋ جانە وڭدەۋ زاۋىتىن ىسكە قوسۋ راسىمىنە قاتىستى. وبلىس اكىمى گۇلشارا ابدىقالىقوۆانىڭ ايتۋىنشا، تاۋەلسىزدىكتىڭ 30 جىلدىق مەرەيتويى قارساڭىندا ىسكە قوسىلعان بۇل كاسىپورىننىڭ ءوڭىر ءۇشىن ماڭىزى زور ءارى ايماق ەكونوميكاسىنا وڭ اسەر ەتۋگە ءتيىس.

«جەرگىلىكتى شيكىزاتتىڭ 90 پايىزى شىنى وندىرىسىندە پايدالانىلادى. سودا ك ۇلى شىنى قۇنىنىڭ 80 پايىزىن قۇرايتىن نەگىزگى بولىك. سوندىقتان ارال قالاسىندا سالىناتىن سودا زاۋىتى كاسىپورىننىڭ باستى جابدىقتاۋشىسى بولادى. شىنى زاۋىتى تولىق قۋاتىمەن جۇمىس ىستەگەن كەزدە 226 جاڭا جۇمىس ورنى اشىلادى، قوسالقى وندىرىستەردە 300-گە جۋىق تۇراقتى جۇمىس ورنى ىسكە قوسىلادى، ءبىز ءبىرىنشى كەزەكتە جەرگىلىكتى ماماندارعا باسىمدىق بەرەمىز»، دەدى گۇلشارا ابدىقالىقوۆا.

ماۋلەن اشىمباەۆ سونىمەن قاتار، «نۇرلى جەر» مەملەكەتتىك باعدارلاماسى اياسىندا سالىنعان 50 پاتەرلى تۇرعىن ءۇيدىڭ كىلتىن تاپسىرۋ راسىمىنە جانە سپورتتىق-ساۋىقتىرۋ كەشەنىنىڭ اشىلۋىنا قاتىستى.

«تاۋەلسىزدىكتىڭ 30 جىلدىعى – ەلىمىز ءۇشىن ماڭىزدى مەجە، ايتۋلى بەلەس. قازاقستان بۇل كەزەڭگە ءىرى جەتىستىكتەرمەن جەتىپ وتىر. ال، ەندىگى مىندەت – بارىمىزدى باعالاپ، جەڭىستى جولىمىزدى جالعاۋ. ءبىز ءاردايىم تاۋەلسىزدىگىمىزدى ساقتاۋعا، قورعاۋعا جانە نىعايتۋعا كۇش سالۋىمىز قاجەت. ول ءۇشىن تاتۋلىعىمىز بەرىك، بىرلىگىمىز بەكەم، تىرلىگىمىز تياناقتى بولۋعا ءتيىس. وسى باعىتتا ءبارىمىز جۇمىلىپ، ناتيجەلى ەڭبەك ەتە بەرەمىز دەپ سەنەمىن»، دەگەن ماۋلەن اشىمباەۆ قىزىلوردالىقتاردى تاۋەلسىزدىكتىڭ 30 جىلدىعىمەن قۇتتىقتاپ، ولارعا باق-بەرەكە تىلەدى.

سوڭعى جاڭالىقتار

ەرتەڭ اۋا رايى قانداي بولادى؟

قازاقستان • بۇگىن، 16:20

اندرادەنى مۋنگيا الماستىرۋى مۇمكىن

كاسىپقوي بوكس • بۇگىن، 14:25

ۇقساس جاڭالىقتار