كوروناۆيرۋس • 06 جەلتوقسان، 2021

ەلباسى: «پاندەميانىڭ سوعىستان نەسى كەم؟»

682 رەت كورسەتىلدى

ەلباسى نۇرسۇلتان نازارباەۆتىڭ Egemen Qazaqstan گازەتىندە جاريالانعان «تاۋەلسىزدىك تاعىلىمى» ماقالاسىندا الەمدىك پاندەميانىڭ جاھاندىق ەكونوميكا مەن ادام ومىرىنە تيگىزگەن اسەرى جونىندە پىكىر ءبىلدىردى، دەپ حابارلايدى Egemen.kz.

«مىنە، ەكى جىلدان بەرى دۇ­نيە ءجۇزى الاڭ كۇي كەشۋدە. كوروناۆيرۋس دەرتىنەن تۋىن­داعان پاندەميا الەمدىك ەكونو­ميكانى عانا ەمەس، ءوندىرىس پەن ەڭبەكتى ۇيىمداستىرۋدى، عىلىم مەن تەحنولوگيا دامۋىن، جالپى ادامنىڭ ويلاۋ جۇيەسىن ايتارلىقتاي وزگەرتتى. ەڭ الدىمەن، ادامزاتقا ورتاق ىندەت دامۋ دەڭگەيىنە قاراماستان ەل مەن ەلدىڭ ەكونوميكاسى مەن تەحنولوگياسىن جاقىنداستىرىپ، ءبىر-بىرىمەن ىنتىماقتاستىرا باستادى. سونىڭ نەگىزىندە جاڭا جاھاندىق ەكونوميكالىق پاراديگما قالىپتاستى»، دەپ جازادى ەلباسى.

ول، سونداي-اق، نوبەل سىي­لى­عىنىڭ عىلىم سالا­سىن­داعى لاۋرەاتتارى جاقىندا ء«بىزدىڭ عالامشار، ءبىزدىڭ بولاشاعىمىز» ءسامميتىنىڭ قورى­تىن­دىسىن شىعارىپ، الەم مەملەكەت­تەرىنە ۇندەۋ جاساعانى جونىندە ءسوز قوزعادى.

«ولار: «ەگەر وسى بەسجىلدىقتا ترانسفور­ماتسيالىق شارالار قابىلدانباسا، ادامزاتتىڭ بولاشاعىنا اۋىر قاتەر تونەتىن بولادى... قوعامنىڭ ەڭ كەدەي جانە مارگينالدانعان توپتارى مەيلىنشە ءالسىز جىكتەر كۇيىندە قالا بەرەدى»، دەدى. بۇل مەنىڭ وسىدان تۋرا 30 جىلداي بۇرىن، 1992 جىلدىڭ 5 قازانىندا، بىرىك­كەن ۇلتتار ۇيىمىنىڭ مىنبەسى­نەن ايتقان ۇسىنىستارىممەن استاسىپ جاتىر. ءبىز سول كەزەڭنىڭ وزىندە الەم­­نىڭ ەڭ باي مەملەكەتتەرىنىڭ اس­كە­ري-سوعىس ماقساتىنا قاراس­تىراتىن شىعىن­دارىنىڭ 1%-ىن ءبولۋ ارقىلى ادامزاتقا ايتىپ كەلمەيتىن، توتەنشە اپاتتارعا قارسى كۇرەسۋدىڭ حالىقارالىق قورىن جاساۋدى ۇسىنعان ەدىك. اڭگىمە ول كەزدە بۇۇ-نىڭ بىتىم­گەرشىلىك كۇشتەرى تۋرالى بول­عان ەدى، بىراق، بىرىنشىدەن، ماڭىز­دىسى يدەيا جانە ۇجىمدىق ارە­كەتتەستىكتىڭ تەتىگى بولاتىن، ەكىن­شىدەن، ءتۇرلى ەلدە تاۋلىك سايىن جۇزدەگەن، مىڭداعان ادام­دى باۋداي ءتۇسىرىپ جاتقان پان­دەميانىڭ سوعىستان نەسى كەم؟  ەگەر ءدال سول كەزدە مەن ۇسىن­عانداي قور جاسالعان بولسا، قازىرگى پاندەميا جاعدايىندا كەدەي مەملەكەتتەرگە كوروناۆيرۋس­پەن كۇرەسۋگە جانە ونىڭ زياندى زارداپتارىن جويۋعا باعىتتالعان شارالاردى ۇيىمداس­تىرۋعا مول مۇمكىندىك تۋعان بولار ەدى»، دەدى قازاقستاننىڭ تۇڭعىش پرەزيدەنتى.

سوڭعى جاڭالىقتار

اماناتقا ادالدىق

ادەبيەت • كەشە

ديلليان ۋايت قاھارىنا ءمىندى

كاسىپقوي بوكس • كەشە

ۇقساس جاڭالىقتار