قوعام • 03 جەلتوقسان، 2021

الماتىدا «قازاق-قىرعىز – الاشتان» اتتى حالىقارالىق كونفەرەنتسيا ءوتتى

الماتىدا قر مەملەكەتتىك حاتشىسى قىرىمبەك كوشەرباەۆ پەن قىرعىز رەسپۋبليكاسىنىڭ مەملەكەتتىك حاتشىسى سۇيۇنبەك كاسمامبەتوۆتىڭ قاتىسۋىمەن وتكەن «قازاق-قىرعىز – الاشتان» اتتى حالىقارالىق عىلىمي-پراكتيكالىق كونفەرەنتسيا اياسىندا حالىقارالىق تۇركى اكادەمياسى جارىققا شىعارعان بىرقاتار ەڭبەكتەردىڭ تۇساۋكەسەر ءراسىمى ءوتتى، دەپ حابارلايدى Egemen.kz.

گاۋھار قاپاش

«دوستىق» ۇيىندە وتكەن اۋقىمدى شارا تۇركى الەمىنىڭ ورتاق ماقتانىشى، قازاق-قىرعىز باۋىرلاستىعىن بەكەمدەۋگە ولشەۋسىز ۇلەس قوسقان جىر الىبى جامبىل جاباەۆتىڭ 175 جىلدىعىن قورىتىندىلاۋعا، سونىمەن بىرگە، قىرعىز حالقىنىڭ كورنەكتى پەرزەنتتەرى ءجۇسىپ ابدراحمانوۆ پەن قاسىم تىنىستانوۆتىڭ تۋعانىنا 120 جىل تولۋىنا وراي ۇيىمداستىرىلىپ وتىر.

تاعىلىمدى شاراعا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ، قىرعىز رەسپۋبليكاسىنىڭ مەملەكەتتىك حاتشىسى سۇيۇنبەك كاسمامبەتوۆ، قىرعىز رەسپۋبليكاسى پرەزيدەنتىنىڭ كەڭەسشىسى ارسلان كويچيەۆ، قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا، قىرعىز رەسپۋبليكاسىنىڭ مادەنيەت، اقپارات جانە تۋريزم ءمينيسترى ازامات جامانكۋلوۆ، حالىقارالىق تۇركى اكادەمياسىنىڭ پرەزيدەنتى دارحان قىدىرالى، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەباەۆ، قىرعىز رەسپۋبليكاسى جوگوركۋ كەنەشىنىڭ دەپۋتاتى كانىبەك يماناليەۆ، قر ۇعا اكادەميگى، قازاقستان تاريحشىلار قاۋىمداستىعىنىڭ توراعاسى مامبەت قويگەلديەۆ، بەلگىلى قىرعىز تاريحشىسى زاينيدين كۋرمانوۆ، سونداي-اق ءبىر تۋعان ەكى ەلدىڭ زيالى قاۋىم وكىلدەرى مەن تانىمال عالىمدار قاتىستى.

كونفەرەنتسيا اياسىندا ءجۇسىپ ابدراحمانوۆتىڭ قىزمەتىنە جانە قىرعىز رەسپۋبليكاسىنىڭ قۇرىلۋىنا قاتىستى ارحيۆ ماتەريالدارى مەن تاريحي فوتوسۋرەتتەردەن ارنايى كورمە ۇيىمداستىرىلىپ، قاسىم تىنىستانوۆ ولەڭدەرىنىڭ تۇرىك تىلىنە اۋدارىلعان اكادەميالىق جيناعى تانىستىرىلدى.
كونفەرەنتسيانى حالىقارالىق تۇرىك اكادەمياسىنىڭ پرەزيدەنتى دارحان قىدىرالى جۇرگىزىپ وتىردى.

القالى جيىن بارىسىندا قۇتتىقتاۋ ءسوز سويلەگەن قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ قىرعىزستاندىق ارىپتەسىنە قازاقستانعا ارنايى ساپارى ءۇشىن ريزاشىلىعىن ءبىلدىرىپ، قازاق پەن قىرعىزعا ورتاق تۇلعالاردى ۇلىقتاۋعا ارنالعان سالتاناتتى جيىن ەكى ەلدىڭ رۋحاني بايلانىسىن بيىك بەلەسكە كوتەرەتىن يگى باستاما ەكەنىن اتاپ ءوتتى.

ءوز كەزەگىندە قىرعىز رەسپۋبليكاسىنىڭ مەملەكەتتىك حاتشىسى سۇيۇنبەك كاسمامبەتوۆ قوناقجاي قابىلداۋعا العىس ايتىپ، تاعىلىمدى شارانىڭ باۋىرلاس حالىقتاردىڭ بەكەم دوستىعىنىڭ ايقىن كورىنىسى ەكەنىن جەتكىزدى.

مارتەبەلى مەيمانداردىڭ قۇتتىقتاۋ سوزدەرىنەن كەيىن تانىمال تاريحشى عالىمدارى باياندامالار وقىپ، ج. ابراحمانوۆ پەن ق. تىنىستانوۆ جانە حح عاسىر باسىنداعى قازاق-قىرعىز زيالىلارى تۋرالى عىلىمي جاڭالىقتارمەن ءبولىستى.

كونفەرەنتسيادان قاتىسۋشىلار جامبىل جىلىنا وراي اباي اتىنداعى وپەرا جانە بالەت تەاترىندا قويىلعان «جامبىل جىراۋ» وپەراسىن تاماشالۋعا قاتىستى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز