وقيعا • 03 جەلتوقسان، 2021

قوستانايدا 20 جەرىنەن پىشاقتالعان ازامات امان قالدى

72 رەت كورسەتىلدى

قوستانايدا ءدامحانانى جالعا العان ەر ادامعا جاس جىگىت 20 رەت پىشاق سۇققان. جابىرلەنۋشىنىڭ قىزى الەۋمەتتىك جەلىدە قاندى وقيعانىڭ ءمان-جايىن باياندادى، دەپ حابارلايدى Egemen.kz.

«بۇل جاعدايدىڭ ءدال مەنىڭ وتباسىمدا بولعانى مەن ءۇشىن اۋىر ءتيدى. بارلىعى ادىلەتتى تۇردە شەشىلگەنىن قالايمىن. 20 پىشاق جاراقاتى بۇل قول سىلتەيتىن نارسە ەمەس» دەپ جازدى ول.

وقيعا قوستاناي قالاسىنداعى «سارىكول»  ءدامحاناسىندا بولعان.

«اكەم 20 پىشاق جاراقاتىن الدى، ماڭىزدى اعزالارى (باۋىر، اسقازان جانە وكپە) زاقىمداندى. قىلمىسكەر بولعان جاعدايدان كەيىن جەدەل جاردەم شاقىرىپ، وقيعا ورنىنان قاشىپ كەتكەن. اكەمە كۇردەلى وپەراتسيا جاسالدى، ارى قاراي ول رەانيماتسيادا جاتتى، قازىر جالپى پالاتاعا اۋىستىرىلدى»، دەپ جازدى جابىرلەنۋشىنىڭ قىزى.

بەلگىلى بولعانداي، قاندى وقيعادان كەيىن زارداپ شەگۋشى 30 قاراشا كۇنى پوليتسياعا ارىز جازعان. ال 1 جەلتوقسان كۇنى 28 جاستاعى كۇدىكتى قولعا تۇسكەن.

وسى وقيعاعا قاتىستى قوستاناي قالاسى پوليتسيا دەپارتامەنتىنىڭ ءباسپاسوز قىزمەتى تۇسىنىكتەمە بەردى.

«اتالعان فاكتى بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتى ۇستالىپ، قوستاناي قالاسىنىڭ پب ۋاقىتشا ۇستاۋ يزولياتورىندا وتىر. تانىستار اراسىنداعى جانجال ىشىمدىك ءىشۋ كەزىندە بولعانى انىقتالدى. وزگە اقپارات قر قىجك 201-بابىنا سايكەس جاريا ەتۋگە جاتپايدى»، دەپ حابارلادى ءباسپاسوز قىزمەتى.

سوڭعى جاڭالىقتار

ۇقساس جاڭالىقتار