پارلامەنتشىلەر حالىقارالىق كۇن تارتىبىندەگى وزەكتى ماسەلەلەردى, پارلامەنتتىك اسسامبلەيانىڭ اعىمداعى قىزمەتىن, سونداي-اق الداعى 2022 جىلعا ارنالعان جۇمىس جوسپارىن تالقىلادى.
قازاقستاندىق پارلامەنءتشى بيۋرو وتىرىسىندا ەقىۇ پا ارناۋلى ءۋاكىلى رەتىندە ورنىقتى دامۋ ماقساتتارى سالاسىنداعى قىزمەتى تۋرالى ەسەپتى تانىستىردى.
سەناتوردىڭ پىكىرىنشە, بەلگىلى ءبىر پروگرەسكە قاراماستان, ماقساتتاردى ىسكە اسىرۋ جونىندەگى ءىس-قيمىلدار ءالى دە ءتيىسءتى قارقىن مەن اۋقىمعا جەتە قويعان جوق. كوروناۆيرۋس ينفەكتسياسىنىڭ تارالۋى مەن سوعان بايلانىستى ەكونوميكالىق پروبلەمالار ودم بۇكىل تىزبەسى بويىنشا ورنىقتى دامۋ كورسەتكىشتەرىنە تەرىس اسەر ەتتى.
«ودم جونىندەگى ارناۋلى ءۋاكىل رەتىندە 2030 جىلعا دەيىنگى كەزەڭگە ارنالعان ورنىقتى دامۋ سالاسىنداعى كۇن ءتارتىبى اياسىندا نەعۇرلىم باتىل ءىس-قيمىل جاساۋ ماقساتىندا پارلامەنتشىلەر ءوز وكىلەتتىگءى مەن حالىقتىڭ وزگەرىستەرگە دايىندىعى ارتا تۇسكەنىن پايدالانۋى كەرەك دەپ سانايمىن», دەدى ول.
اسقار شاكىروۆ ودم-نى ىسكە اسىرۋدى قامتاماسىز ەتۋدەگى ۇلتتىق پارلامەنتتەر مەن ەقىۇ پارلامەنتتىك اسسامبلەياسىنىڭ ءرولى تۋرالى 2022 جىلعى 26 قاڭتارداعى ۆەب-ديالوگتى ۇيىمداستىرۋ جونىندەگى جوسپارلارمەن ەقىۇ پارلامەنتشىلەرىن تانىستىردى.
شارا قاۋىپسىزدىك جونىندەگى ەقىۇ-نىڭ جان-جاقتى كوزقاراسىمەن ۇيلەسەتىن قاۋىپسىز ءارى ورنىقتى بولاشاق تۋرالى ويلارىن ىسكە اسىرۋدى كوزدەيتىن «حەلسينكي +50 – ءىس-قيمىلعا شاقىرۋ» باستاماسىن ىلگەرىلەتۋ تۇرعىسىندا جوسپارلانىپ وتىر.
سەنات توراعاسىنىڭ ورىنباسارى ستوكگولمدە بولعان كەزدە ەقىۇ مينيسترلەر كەڭەسىنىڭ 28-ءشى كەزدەسۋى اياسىندا شۆەد پارلامەنتىنىڭ ورتالىق ازيامەن دوستىق قاۋىمداستىعى باسشىسىنىڭ ورىنباسارى ميكاەل ستراندمانمەن كەلىسسوز جۇرگىزدى. وندا ەكىجاقتى ىنتىماقتاستىقتىڭ جاي-كۇيى مەن دامۋ كەلەشەگى تالقىلاندى. قازاقستان پرەزيدەنتى قاسىم-جومارت توقاەۆتىڭ جاڭعىرتۋ جونىندەگى كۇن ءتارتىبى اياسىندا جۇرگىزىلىپ جاتقان ساياسي رەفورمالار تۋرالى شۆەد پارلامەنتشىسى حاباردار ەتىلدى.
كەزدەسۋ قورىتىندىسى بويىنشا پارلامەنتارالىق بايلانىستاردى ۇدەتۋ تۋرالى ۋاعدالاستىققا قول جەتكىزىلدى.
