ەلباسى • 02 جەلتوقسان، 2021

پورترەتتەگى پاراسات

97 رەت كورسەتىلدى

تاپ وسى تۋىندىعا ەلباسى ەرەكشە قىزىققان دەسەدى. اۆتورى – بەلگىلى قىلقالام شەبەرى كاميل مۋللاشەۆ. بۇل جاي عانا كوشىرمە كەسكىندەمە ەمەس، تاۋەلسىز قازاقستان تاريحىنىڭ تۇسپالداماسى. ءبىر جىل بويى شەبەرحانادان شىقپاي جازىلعان تۋىندى بۇگىندە ەلباسى مۋزەيىنىڭ تورىندە جارقىراپ تۇر.

ازاتتىق قۇسى اسپاندا سامعاعالى الاش بالاسىنىڭ قيالى مۇزارتتارمەن بەتتەستى. ونەردىڭ كەرەگەسى كەڭەيىپ، قالام­گەر بولسىن، قىلقالام شەبەرى بول­سىن ويىن ەركىن جەتكىزىپ، تۇيسىگىن تەرەڭنەن تارتتى. وعان وسى كارتينا دالەل بولا الادى.

تاۋەلسىزدىك جايلى ءسوز قاۋزالسا ەلباسى، ەلباسى جايلى اڭگىمە ايتساق، تاۋەلسىزدىك ءسوزىمىزدىڭ تۇزدىعى بولاتىنى انىق. ەگەمەندىككە قول جەتكىزگەلى بەرى قازاق دالاسىندا بەينەلەۋ ونەرىنىڭ مايتالماڭدارى جاھاندانۋ داۋىرىندەگى جاڭا قازاقستاننىڭ كەلبەتىن سىزا باستادى. ءبىرى – شەكسىز ىزگىلىكتى قۇس قاناتى تالاتىن ۇلان-عايىر دالادان ىزدەسە، ءبىرى – ۇلتتىڭ تىرەگى بولعان تۇلعالاردان تاپتى. ماسەلەن، وقىرمانعا ۇسىنىلىپ وتىرعان «ەل­باسى. تۇڭعىش پرەزيدەنت ن.ءا.نازارباەۆ پور­ترەتى» كارتيناسى جەكە ادامنىڭ اۆتوپورترەتى ەمەس، ول مۇقىم حالىقتىڭ ءجۇرىپ وتكەن جولىنىڭ بوياۋى. ونى سۋرەتشىنىڭ ءوزى دە مويىندايدى.

«1996 جىلى ەلباسى مەنىڭ كارتينالارىمدى رەزيدەنتسياسىنا الدىردى. قازاقتىڭ ماڭدايىنا بىتكەن اتاقتى اكتەر ءاسانالى ءاشىموۆ ەكەۋمىز قابىلداۋىندا بولدىق. شىعارمالارىمدى تاماشالاپ بولعان سوڭ، قولىمدى الىپ، الداعى ماقسات­تارىمەن ءبولىستى. ارتىنان كومەك­شىلەرى ەلباسىنىڭ پورترەتىن سالساق دەگەن ۇسىنىس تاستادى. بىردەن ىسكە كىرىسىپ كەتتىم. جۇمىستى اياقتاپ، سىيلىق رەتىندە جولدادىم. ەلباسى كورىپ، ريزا بولعان ەكەن. كومەكشىلەرى راحمەتىن ايتتى»، دەيدى اۆتور.

سۋرەتشىنى مەملەكەتتىڭ دامۋىنا ماڭىزدى ءرول اتقارعان تاريحي تۇلعالار كوپتەن قىزىقتىرعان ەكەن. سودان دا بولار، 2014 جىلى ەلباسى نۇرسۇلتان نازارباەۆتىڭ پورترەتىن قايتا جازۋدى قولعا الادى. وسىلايشا، ەكى بىردەي تۋىندى سالتاناتتى پورترەت جانرىندا جازىلادى. بۇل – ەكى كوزقاراس بيىگىندە تۇلعاعا دەگەن ۇلكەن قۇرمەتتىڭ جەمىسى. العاشىندا ۇلت كوشباسشىسىنىڭ ۇلتتىڭ تىزگىنىن ەندى قولعا العان كەزەڭىن بەرسە، ەكىنشىسىندە قازاقتى الەمگە تا­نىت­­قان شاعىن جەتكىزگەن.

باقساڭىز، العاشقى پورترەتتە قا­زاقى كومپونەنت بەلسەندىرەك كور­سە­تىلگەن. زاماناۋي كوستيۋمنىڭ ۇس­تى­نەن جامىلعان التىنمەن كەستەلەنگەن قى­زىل شاپان، ويۋلى كىلەم، تاۋ ەتەگىندە سوزىلعان استانامىز ادەمى بەدەرلەنگەن.

ال ەكىنشى پورترەتتە باسقا دەتالداردى نەگىزگە العان. فيگۋرا اسپاننىڭ تازا كوگىندە قالىقتاعان گلوبۋستىڭ فو­نىندا جازىلعان. وندا شەڭبەردە بەلگى­لەنگەن قازاقستان كارتاسى جەردىڭ باي­تاقتىعىن جەتكىزەدى. سول دارقان دالا­مىزدىڭ نۇرسۇلتان نازارباەۆتاي داڭقتى ۇلى بار ەكەنىن ماقتانىشپەن بايان­دايدى. وكىنىشكە قاراي، ەكىنشى پورترەت ءبىزدىڭ قولىمىزعا تۇسپەدى. ونى دا سۋ­رەتشى ەلباسىعا سىيلاعان ەكەن.

سوڭعى جاڭالىقتار

شابىت پەن شاراپ

ادەبيەت • بۇگىن، 22:13

ديلەتانتتان داۋىرگە دەيىن

ادەبيەت • بۇگىن، 21:57

ەرتەڭ اۋا رايى قانداي بولادى؟

قازاقستان • بۇگىن، 16:20

اندرادەنى مۋنگيا الماستىرۋى مۇمكىن

كاسىپقوي بوكس • بۇگىن، 14:25

ۇقساس جاڭالىقتار