ايماقتار • 01 جەلتوقسان، 2021

ءال-فارابي اتىنداعى قازۇۋ ستۋدەنتتەرى كاسىپكەر اتاندى

62 رەت كورسەتىلدى

تاۋەلسىزدىكتىڭ 30 جىلدىعى مەن تۇڭعىش پرەزيدەنتى كۇنىنە وراي ءال-فارابي اتىنداعى قازاق ۇلتتىق ۋنيۆەرسيتەتىندە جاس كاسىپكەرلەر فورۋمى ءوتتى، دەپ جازادى Egemen.kz.

قازۇۋ مەن TAN Media Group ۇيىمداستىرعان فورۋمعا نۇرلان سماعۇلوۆ، ارمانجان بايتاسوۆ، اسىلبەك قوجاحمەتوۆ، قايرات ماجىباەۆ، گاۋھار قاپپاروۆا، نۇرجان جاڭابەكوۆ جانە باسقا دا كوپتەگەن تانىمال كاسىپكەرلەر قاتىسىپ، ءسوز سويلەدى. 

ءال-فارابي اتىنداعى قازۇۋ-دىڭ باسقارما توراعاسى – رەكتور جانسەيىت تۇيمەباەۆ جينالعانداردى فورۋمنىڭ اشىلۋىمەن قۇتتىقتاپ، ماڭىزدىلىعىنا توقتالدى. ءوز سوزىندە ۋنيۆەرسيتەت باسشىسى جاس بۋىندى كاسىپكەرلىككە باۋلۋ، ەل ەكونوميكاسىن دامىتۋ ءۇشىن وزەكتى ەكەنىن جەتكىزدى.

«تۇڭعىش پرەزيدەنتىمىز – ەلباسى نۇرسۇلتان نازارباەۆ قىزمەتىنە كىرىسكەن العاشقى جىلدارى «الدىمەن – ەكونوميكا، سودان سوڭ – ساياسات» قاعيداسىن ۇستاندى. بۇل ءوز كەزەگىندە ەلىمىزدىڭ نارىقتىق ەكونوميكاعا كوشۋىنە، كاسىپكەرلىكتى دامىتۋعا، ەل ەڭسەسىن كوتەرۋگە جول اشتى. قازاقستان ەكونوميكاسىنىڭ تاۋەلسىزدىك جىلدارى باعىندىرعان بەلەس، العان اسۋىندا كاسىپكەرلىكتىڭ ۇلەسى زور. قازىرگى تاڭدا ءبىزدىڭ ەلىمىزدە جاس بيزنەسمەندەرگە جان-جاقتى قولداۋ كورسەتىلىپ كەلەدى. ماسەلەن، قازۇۋ-دا ەكونوميكا جانە بيزنەس جوعارى مەكتەبى جۇمىس ىستەيدى. جىل سايىن وسى جەردەن 500 باكالاۆر، ماگيستر جانە PhD دوكتورلارى وقۋلارىن تامامداپ شىعادى. بۇگىنگى ءوتىپ جاتقان فورۋمنىڭ جاس ماماندار ءۇشىن بەرەرى مول دەپ ەسەپتەيمىن»، دەپ اتاپ ءوتتى جانسەيىت تۇيمەباەۆ.

فورۋم اياسىندا ءسوز سويلەگەن كاسىپكەرلەردىڭ كوپشىلىگى قازاق ۇلتتىق ۋنيۆەرسيتەتىنىڭ تۇلەكتەرى. سولاردىڭ ءبىرى – «Muzzone» مۋزىكالىق تەلەارناسىنىڭ جانە «TAN Media Group» جشس باسشىسى، ءال-فارابي اتىنداعى قازۇۋ ديرەكتورلار كەڭەسىنىڭ مۇشەسى ارمانجان بايتاسوۆ. ول ۋنيۆەرسيتەت قابىرعاسىندا وقىپ ءجۇرىپ-اق كاسىپكەرلىكپەن اينالىسقانىن ايتادى.

«قازۇۋ – ءبىزدىڭ الما ماتەرىمىز. بۇگىنگى جيىنعا قاتىسۋشىلاردىڭ كوبى ستۋدەنت كەزىندە ءبىلىم مەن بيزنەستى قاتار الىپ جۇرگەندەر. 90-جىلدارى وتە قيىن بولدى. سوعان قاراماستان، بيزنەسكە دەگەن قىزىعۋشىلىعىمىزدىڭ ارقاسىندا وسىنداي جەتىستىككە جەتتىك. ال قازىرگى جاستاردىڭ كاسىپپەن اينالىسۋىنا بارلىق مۇمكىندىكتەر قاراستىرىلعان. تەك كىتاپ وقىپ، وي ورىستەرىن جەتىلدىرۋى قاجەت»، دەيدى ۋنيۆەرسيتەت تۇلەگى.

سونداي-اق فورۋمدا ءسوز سويلەگەن قازاقستاندىق بيزنەسمەن جانە قوعام قايراتكەرى، RG Brands جانە Resmi Group نەگىزىن قالاۋشى قايرات ماجىباەۆ ساپالى ءبىلىم بەرۋدىڭ ماڭىزدىلىعىنا توقتالدى. ول ءوز كەزەگىندە ءبىلىمدى كاسىپكەر مول تابىسقا جەتەتىنىن ايتتى. سول سەبەپتەن ول جاستاردى بيزنەس باستاۋدا قورىقپاۋعا شاقىردى.

سپيكەرلەر پايدالى اقپاراتپەن ءبولىسىپ قانا قويماي، قاتىسۋشىلاردىڭ سۇراقتارىنا جاۋاپ بەردى.

ءىس-شارا بارىسىندا ءال-فارابي اتىنداعى قازۇۋ مەن «TAN Media Group» جشس ىنتىماقتاستىق تۋرالى مەموراندۋمعا قول قويدى.

سونىمەن قاتار فورۋم اياسىندا ەكى اپتا بۇرىن ۇيىمداستىرىلعان «Media café» بايقاۋىنىڭ قورىتىندىسى جاريالاندى. سايىستا ءۇش ادامنان قۇرالعان توپ، ياعني نۇرسۇلتان وڭداسىنوۆ، اسەم ەرلانوۆا، ءدىنامان سەرىكقان وزدەرىنىڭ كرەاتيۆتى جوبالارىن ۇسىنىپ، ءبىر جىل كوفەحانانى باسقارۋ گرانتىن جەڭىپ الدى. فورۋم ۇيىمداستىرۋشىلارى ۋنيۆەرسيتەت اۋماعىندا كوفەحانانىڭ قۇرىلۋىن تولىق قارجىلاندىرادى. وعان بارلىق قاجەتتى جابدىقتارمەن قامتاماسىز ەتۋ، وقىتۋ كىرەدى.

وسىلايشا ۋنيۆەرسيتەت قابىرعاسىندا العاش رەت وتكەن فورۋمعا قاتىسا وتىرىپ، ستۋدەنتتەر پايدالى اقپارات الدى.

سوڭعى جاڭالىقتار

كيىز باسۋ ونەرى دارىپتەلدى

ايماقتار • بۇگىن، 08:59

بلوگەرلەر باسەكەسى

ايماقتار • بۇگىن، 08:57

ەلى ەسكەندىرىن ەسكە الدى

ونەر • بۇگىن، 08:55

ورەندەر شىقتى سايىسقا

ايماقتار • بۇگىن، 08:37

احۋال ءالى كۇردەلى

الەم • بۇگىن، 08:35

تاڭداۋ جاساۋ – تاماشا مۇمكىندىك

رەفەرەندۋم-2022 • بۇگىن، 08:32

جاستار ءوز ۇلەسىن قوسادى

رەفەرەندۋم-2022 • بۇگىن، 08:30

ۇقساس جاڭالىقتار