ايماقتار • 01 جەلتوقسان، 2021

الماتىدا قالالىق دوستىق ءۇيى اشىلدى

62 رەت كورسەتىلدى

بۇگىن الماتىنىڭ قالالىق دوستىق ءۇيى سالتاناتتى تۇردە اشىلدى، دەپ حابارلايدى Egemen.kz.

دوستىق ءۇيى ەلىمىزدىڭ تۇڭعىش پرەزيدەنتى كۇنى اشىلدى، بۇل الماتىداعى ەتنومادەني بىرلەستىكتەردىڭ بارلىق وكىلدەرى ءۇشىن ۇلكەن ماڭىزعا يە. قازاقستان حالقى اسسامبلەياسىن قۇرۋدىڭ باستاۋىندا ەلباسى نۇرسۇلتان نازارباەۆ تۇردى. تۇڭعىش پرەزيدەنت ۇلتتىق تاريحقا دەگەن قۇشتارلىق بارلىق قازاقستاندىقتاردىڭ بويىندا ءوز باستاۋلارىنىڭ بىرلىگى سەزىمىن قالىپتاستىراتىنىن اتاپ ءوتتى.

الماتى – كوپتەگەن ەرەكشەلىكتەرى جانە ءتۇرلى ولشەمدەرى بويىنشا بىرەگەي قالا. ەڭ الدىمەن، ەتنيكالىق، مادەني ارتۇرلىلىك بويىنشا. سوندىقتان مەگاپوليس اكىمى باقىتجان ساعىنتاەۆتىڭ تاپسىرماسى بويىنشا اشىلعان قالالىق دوستىق ءۇيى ەتنوسارالىق ديالوگ، ءوزارا ءىس-قيمىل جانە قوعامدىق ۇيىمدارمەن ىنتىماقتاستىق الاڭىنا اينالادى. ەندى 36 ەتنومادەني بىرلەستىك ءبىر شاڭىراق استىندا بولادى.

1

جاروكوۆ كوشەسىندە ورنالاسقان كەڭ عيماراتتا داستۇرلەردى، تىلدەردى، مادەنيەتتى ساقتاۋ ءۇشىن بارلىق جاعداي جاسالعان. 24 كابينەت، كونفەرەنتس-زال، ءتىل سىنىبى، بي زالى، مەدياتسيا جانە قوعامدىق كەلىسىم كەڭەسى كابينەتتەرى، سونداي-اق قوعامدىق قابىلداۋ بولمەسى قاراستىرىلعان.

الماتى قالاسى قازاقستان حالقى اسسامبلەياسى توراعاسىنىڭ قوعامدىق ورىنباسارى، «يلداش» تاتار گۋمانيتارلىق دامۋ ورتالىعىنىڭ ءتورايىمى نۇريا نيازوۆا دوستىق ءۇيىنىڭ اشىلۋى قالالىق ەتنومادەني بىرلەستىكتەر ءۇشىن تاريحي ءسات بولىپ تابىلاتىنىن اتاپ ءوتتى.

2

«الماتى اكىمى باقىتجان ساعىنتاەۆتىڭ بىزگە، قالالىق اسسامبلەياعا تۇراقتى قولداۋىنىڭ ارقاسىندا كوپتەن كۇتكەن ءوزىمىزدىڭ قالالىق دوستىق ءۇيىمىز اشىلادى. بۇل قازاقستان رەسپۋبليكاسى تاۋەلسىزدىگىنىڭ 30 جىلدىعىندا جانە تۇڭعىش پرەزيدەنت كۇنىنە ورايلاستىرىلعان. وسى مۇمكىندىكتى پايدالانا وتىرىپ، بۇكىل قالالىق اسسامبلەيا اتىنان قالالىق ەتنومادەني بىرلەستىكتەر ءۇشىن وسى مەرەيتويلىق سىيلىق ءۇشىن شىنايى العىسىمدى بىلدىرگىم كەلەدى»، دەدى ن. نيازوۆا.

الماتى قالاسى قحا قوعامدىق كەلىسىم كەڭەسىنىڭ توراعاسى احمەتجان شاردينوۆ ورتاق شاڭىراق استىنداعى ەتنومادەني ورتالىقتار مەگاپوليستەگى ەتنوسارالىق كەلىسىمدى ساقتاۋ ءۇشىن ودان ءارى جۇمىس ىستەيتىنىن ايتتى.

«دوستىق ءۇيى – بۇل ءبىزدىڭ قوعامدا ورنىققان ۇيلەسىم مەن بەرىك بەيبىتشىلىكتى بەينەلەيتىن سيمۆولدىق نىشان. سوندىقتان ونىڭ اشىلۋى قالامىزدا بەيبىتشىلىك پەن كەلىسىمنىڭ ساقتالۋىنا ىقپال ەتەتىن تاعى ءبىر فاكتور بولۋى ءتيىس. قازاقستاندا تۇراتىن بارلىق ۇلت وكىلدەرىنىڭ اراسىنداعى بەيبىتشىلىك تۇراقتى ەكونوميكالىق ءوسىمنىڭ، الەۋمەتتىك جانە مادەني پروگرەستىڭ نەگىزى بولىپ تابىلادى»، دەيدى ا. شاردينوۆ.

ءوز كەزەگىندە، «قازاقستاندىق ورىس مادەني ورتالىعىنىڭ» باسشىسى، الماتى قالاسى قحا توراعاسىنىڭ ورىنباسارى ۆسەۆولود لۋكاشەۆ جاڭا قالالىق دوستىق ءۇيى ەندى بارلىق قاۋىمدار ءۇشىن ەتنوسارالىق قاتىناستار سالاسىنداعى ودان ءارى جۇمىس بويىنشا ناعىز باعدار بولادى دەپ ەسەپتەيدى.

«قالالىق دوستىق ءۇيىنىڭ اشىلۋى قازاقستاندىق بىرەگەيلىك پەن جالپىۇلتتىق بىرلىكتى نىعايتۋعا، قازاقستاننىڭ ەتنوستىق توپتارىنىڭ داستۇرلەرىن، تىلدەرىن، مادەنيەتتەرىن ساقتاۋ، ەتنوسارالىق تولەرانتتىلىق پەن قوعامدىق كەلىسىمدى قالىپتاستىرۋ بويىنشا ورتاق مىندەتتەردى شەشۋگە، سونداي-اق اسسامبلەيانىڭ ماقساتتارى مەن مىندەتتەرىنە قول جەتكىزۋدە ەتنومادەني بىرلەستىكتەردىڭ كۇش-جىگەرىن بىرىكتىرۋگە ىقپال ەتەدى»، دەدى ول.

سوڭعى جاڭالىقتار

ۇقساس جاڭالىقتار