قازاقستان • 01 جەلتوقسان، 2021

بۇگىن – تۇڭعىش پرەزيدەنت كۇنى

133 رەت كورسەتىلدى

بۇگىن – قازاقستان رەسپۋبليكاسىنىڭ تۇڭعىش پرەزيدەنتى كۇنى، دەپ حابارلايدى Egemen.kz.

ايتۋلى داتا وسىدان 10 جىل بۇرىن، ناقتى ايتساق، 2011 جىلدىڭ 10 جەلتوقسانىندا قر پارلامەنتى سەناتى دەپۋتاتتارىنىڭ باستاماسىمەن بەكىتىلگەن بولاتىن.

«قازاقستان رەسپۋبليكاسىنداعى مەرەكەلەر تۋرالى» قر زاڭىنا تولىقتىرۋ ەنگىزىلىپ، 1 جەلتوقسان قازاقستان رەسپۋبليكاسىنىڭ تۇڭعىش پرەزيدەنتى كۇنى دەپ بەلگىلەندى. 1991 جىلدىڭ 1 جەلتوقسانىندا نۇرسۇلتان نازارباەۆ تاۋەلسىز قازاق ەلىنىڭ تۇڭعىش پرەزيدەنتى رەتىندە قىزمەتكە كىرىستى.

اتالمىش مەرەكەنىڭ 1 جەلتوقسان سايىن تويلانۋىندا وسىنداي ءمان بار. كسرو ىدىراعان تۇستا تاۋەلسىزدىگىن جاريالاعان قازاقستاننىڭ تۇڭعىش پرەزيدەنتى بولعانى ەسكەرىلىپ، سول تۇستا قولعا الىنىپ، جۇزەگە اسقان ءتۇرلى باستامالار مەن رەفورمالار، مەملەكەت قۇرۋ جولىندا جاسالاۋى ءتيىس ستاندارتتى شارالاردىڭ ءبارى ەلباسى ەسىمىمەن بىرگە اتالىپ ءجۇر.

اراعا عاسىرلار سالىپ، مەملەكەتتىلىگىن قايتارعان قازاق ەلىنىڭ العاشقى باسشىسى بولعانىنا وراي، تۇڭعىش پرەزيدەنت ەرەكشە قۇقىققا يە تۇلعا بولىپ سانالادى. ونىڭ تاۋەلسىزدىكتىڭ ەلەڭ-الاڭ شاعىندا اتقارعان قىزمەتى زاڭنامالىق تۇرعىدان جوعارى باعاسىن العان. «تۇڭعىش پرەزيدەنت»، «ەلباسى»، «ۇلت كوشباسشىسى» دەگەن رەسمي مارتەبەلەرى بار.

نۇرسۇلتان نازارباەۆتىڭ قازاقستان تاريحىنداعى ورنى تۋرالى قالام تەربەيتىن كەيبىر تاريحشىلار مەن ساياساتتانۋشىلار ەلدەگى ەڭ سۇيەكتى جوبالار مەن ەلەۋلى تاريحي وقيعالاردىڭ ءبارىنىڭ باستاۋىندا ەلباسى تۇرعانىن جازىپ ءجۇر. اتاپ ايتساق، قر قارۋلى كۇشتەرىنىڭ قۇرىلۋى، شەكارانىڭ دەليميتاتسياسى مەن دەماركاتسياسى، ۇلتتىق ۆاليۋتا – تەڭگەنىڭ اينالىمعا شىعۋى، ەل استاناسىنىڭ الماتىدان اقمولاعا اۋىستىرىلۋى، سەمەي يادرولىق سىناق پوليگونىنىڭ جابىلۋى، ۇلتتىق التىن-ۆاليۋتا قورىنىڭ قۇرىلۋى، كونستيتۋتسيانىڭ بىرنەشە رەت جەتىلدىرىلۋى، ەۋرازيالىق جەونوميكالىق وداقتىڭ قۇرىلۋى جانە وعان قازاقستاننىڭ مۇشە رەتىندە كىرۋى سياقتى وقيعالاردى ەلباسىنىڭ ەڭبەگى رەتىندە باعالاۋ ءۇردىسى بار.

قازاقستاننىڭ دامۋ باعىتىن ايقىنداپ وتىرعان «قازاقستان-2050» ستراتەگياسى دا ەلباسىنىڭ باستاماسىمەن قابىلدانعان. 2019 جىلدىڭ 19 ناۋرىزىندا نۇرسۇلتان نازارباەۆ ءوزىنىڭ پرەزيدەنتتىك وكىلەتىن قازىرگى پرەزيدەنت قاسىم-جومارت توقاەۆقا تابىستادى. وسى وقيعانىڭ اياسىندا استانانىڭ اتاۋى تۇڭعىش پرەزيدەنتتىڭ اتىنا نۇر-سۇلتان بولىپ اۋىستىرىلدى.

سوڭعى جاڭالىقتار

ۇقساس جاڭالىقتار