ءبىز بۇل تاۋەلسىزدىكتى ايتار تۇستا مۇقاباسىن مىڭجىلدىقتاردىڭ شاڭى كومگەن التىن تامىرلى تاريحتى العا تارتاتىنىمىز بەلگىلى. البەتتە سول شەجىرەلى باياننىڭ كەيىنگى وتىز جىلىن مەجەلى مىندەتتەرىمىزدى ايقىنداپ, جارقىن جەتىستىكتەرىمىزدى جۇيەلى زەردەلەپ بەرگەن تەگەۋرىندى تۇلعا, ەلباسى نۇرسۇلتان نازارباەۆپەن بايلانىستىراتىنىمىز انىق. شيرەك عاسىردان استام شەجىرەلى جولدا كەمەڭگەر كوشباسشى كوشەلى مەملەكەت قۇرا ءبىلدى. ەلدى باسقارۋدا تولاعاي تابىسقا جەتۋدە تەك ماقساتتى قادامدار جاسادى.
تاۋەلسىزدىك – كەشەگىنى ۇلىقتاۋ مەن كەلەشەكتى ۇمىتپاۋدان تۇرادى. بۇگىنگى قازاقستاننىڭ ەسىمى – ەگەمەن, بەسىگى – بەيبىت تاۋەلسىز مەملەكەت دەر ەدىك.
ءبىز – سوناۋ ۇلى دالانىڭ تۇرانداي اسقاق قاسيەتتى تورىندە تۋ كوتەرگەن كوشپەلى كوك تۇرىك بابالارىمىزدىڭ تەكتى ۇرپاعىمىز.
اتا-بابامىزدان اماناتقا قالعان اسىل قۇندىلىعىمىز ازاتتىقتى بۇگىندە كۇيمەلى كەرۋەنگە تەڭەسەك, بايسالدى كوشتىڭ ساناتكەر كوشباسشىسى – ول ەلباسى نۇرسۇلتان نازارباەۆ!
بۇل كۇندە قازاقستان جەر-جاھانعا جاقسى اتىمەن تانىلىپ, جاسامپاز ىستەرىمەن جۇرتقا ۇلگى بولىپ وتىر. التى قۇرلىق الاش تورىنە جينالىپ جالپىادامزاتتىق تاقىرىپتاردى جاپپاي تالقىلايتىن دارەجەگە جەتتىك. ەلباسىنىڭ سارابدال ساياساتىنىڭ ارقاسىندا ساياسي قادامدارىمىز ساتىلاپ ءوسىپ, ەكونوميكالىق ەكپىنىمىز ەرەكشە ارتتى. رۋحاني باي مۇرالارىمىز زەردەلى ۇرپاقتىڭ زەيىنىن اشىپ, جادىمىزدا كونە تاريحتىڭ كومبەسى جاڭعىردى.
مۇنىڭ بارلىعىنا ەلباسىداي تەڭدەسسىز تۇلعانىڭ تەگەۋرىندى ىستەرى تەمىرقازىق بولىپ كەلگەنىن ءار كەز ايتىپ وتىرۋىمىز كەرەك. ۇلتتى ۇيىستىرۋدا, جۇرتتى جۇمىلدىرۋدا تۇڭعىش پرەزيدەنتتىڭ ەسەلى ەڭبەگى ارقاشان ەل ەسىندە. باعدارلى بولاشاققا بەت العان مەملەكەتتىڭ ءباسى بيىك, باسى ازات بولۋعا ءتيىس. الاشتىڭ اسقاق اقىنى سۇلتانماحمۇت تورايعىر ۇلىنىڭ:
«الاش تۋى استىندا, كۇن سونگەنشە سونبەيمىز!» دەگەن ايبىندى ءسوزى ءار قازاقتىڭ ايبارىن اسىراتىن رۋحتى ءسوز. الاش مۇراتى – ازاتتىقتىڭ تۇعىرىن بيىك, شىعىرىن بەرىك ەتۋ. ءبىز سول جولدا ءبىر جاعادان باس, ءبىر جەڭنەن قول شىعارا ءبىلۋىمىز ماڭىزدى. بۇگىندە ەلباسى قۇرعان مەملەكەتتىك ينستيتۋتتار تۇراقتى دامىپ كەلە جاتقانىن جاقسى بىلەمىز. ەلباسى باعىتى – ەرتەڭگى قازاقستاننىڭ باعدارى. ىلكىمدى ىستەرمەن ىلگەرى قادام جاساۋ – ەل حالقىن ىزگىلىك پەن ىرىلىككە تاربيەلەيدى.
ەل ەگەمەندىگىنىڭ ەلەۋلى جىلدارىندا ەلباسى نۇرسۇلتان نازارباەۆتىڭ باستاماسىمەن جۇزەگە اسقان جوسپارلى قادامدارىمىز ۇشان-تەڭىز. كەمەل كوشباسشىنىڭ كورەگەن ساياساتى ءوزى قابىلداعان ءتۇرلى باعدارلامادا انىق كورىندى. انا ءتىلىمىزدىڭ اياسى كەڭىپ, اتا تاريحىمىزدىڭ ارناسى ۇلعايدى. ءبىر سوزبەن ايتقاندا, بايىرعى تاريح بۇگىننەن بولاشاققا بەت تۇزەدى. ەلباسى بەلگىلەپ بەرگەن مەجەلى مىندەتتەردى ءمىنسىز اتقارۋىمىز ماڭىزدى.
ەلباسىنىڭ دارا بولمىسى دانا شەشىم شىعارۋدا قاتەلەسكەن جوق. ەلباسى جولى – ەگەمەن ەلىمىزدىڭ ەكىنشى تىنىسىن اشقان التىن داڭعىل.
