«بۇگىنگى تاڭدا قازاقستاندا «وميكرون» شتامى انىقتالعان جوق, ۆيرۋستى جۇيەلەۋ بويىنشا جۇمىستار جالعاسۋدا, ءبىز بۇل جۇمىستى تۇراقتى نەگىزدە جۇرگىزىپ كەلەمىز. بۇگىن ۇكىمەت وتىرىسىندا قوسىمشا شەشىم قابىلداندى - وسى شتامداردى سەكۆەناتسيالاۋ جۇمىسىن جالعاستىرۋ جانە جانداندىرۋ. ناتيجەلەردى جاقىن ارادا, جەلتوقساننىڭ ءۇشىنشى ونكۇندىگىندە, وسى راسىمدەردىڭ ۇزاقتىعىن ەسكەرە وتىرىپ بىلەتىن بولامىز», دەپ ءتۇسىندىردى مارات شورانوۆ.
مارات شورانوۆتىڭ ايتۋىنشا, «وميكرون» شتامى پتر سىناقتارىنا سەزىمتال, ول تەز انىقتالدى.
«بۇل كۇندەلىكتى پتر تەستىلەۋى بارلىق ناۋقاستاردا جاڭا شتاممنىڭ بار جوعىن انىقتايدى دەگەندى بىلدىرەدى. شتامدى انىقتاۋ ءۇشىن ۆيرۋستىڭ سەكۆەناتسياسى تۋرالى قوسىمشا زەرتتەۋ جۇرگىزۋ كەرەك, بۇل وتە كوپ ۋاقىتتى قاجەت ەتەتىن پروتسەسس. وعان شامامەن 2-4 اپتا كەتەدى. سوندىقتان ءبىز بۇل جۇمىستى باستادىق, جەلتوقسان ايىنىڭ سوڭىندا قازاقستان اۋماعىندا اينالىمداعى شتامداردىڭ تۇرلەرى تۋرالى تولىق كورىنىس بولادى», دەپ اتاپ ءوتتى ءبىرىنشى ۆيتسە-مينيستر.
ول دەنساۋلىق ساقتاۋ مينيسترلىگىندە جاڭا شتامدى ەمدەۋ تۋرالى حاتتاما بار ما دەگەن سۇراققا دا جاۋاپ بەردى.
«كوروناۆيرۋستىق ينفەكتسيانى ەمدەۋ حاتتاماسى بىرەۋ. ول شتاممدارعا بولىنبەيدى, سونىمەن بىرگە وسى شتامنىڭ كلينيكالىق بەلگىلەرى تۋرالى تولىعىراق اقپارات الۋ قاجەت. ۆيرۋس مۋتاتسياعا ۇشىرايتىنى تۇسىنىكتى. قازىرگى قۇلدىراۋعا قاراماستان, ارينە, ءبىز بۇل ۆيرۋستىڭ وزگەرۋى مۇمكىن ەكەنىن تۇسىنەمىز. بۇل ءتىپتى سوڭعى مۋتاتسيا بولماۋى مۇمكىن. ءبىز حاتتاماعا ءتيىستى تۇزەتۋلەر ەنگىزەمىز, بىراق باستىسى - ۆاكتسيناتسيا ماسەلەلەرىن, قولدانىستاعى ۆاكتسينالاردىڭ تيىمدىلىك دارەجەسىن زەرتتەۋ. تيىسىنشە, بۇل قوسىمشا ۋاقىتتى قاجەت ەتەدى», دەدى مارات شورانوۆ.
بۇعان دەيىن حابارلانعانداي, «وميكرون» كوروناۆيرۋستىق ينفەكتسيا شتامىنىڭ جاڭا نۇسقاسىنىڭ پايدا بولۋىن ەسكەرە وتىرىپ, ونى رەسپۋبليكا اۋماعىنا اكەلۋگە جول بەرمەۋ ماقساتىندا ۆەدومستۆوارالىق كوميسسيادا اعىمداعى جىلدىڭ 3 جەلتوقسانىنان باستاپ بوتسۆانا, وار, لەسوتو, ناميبيا, زيمبابۆە, موزامبيك, مالاۆي, ماداگاسكار, ەسۆاتيني, تانزانيا جانە گونكونگتان شەتەل ازاماتتارىنىڭ قر-عا كىرۋىنە شەكتەۋ ەنگىزۋ تۋرالى شەشىم قابىلداندى.
