اڭگىمە بارىسىندا قازاقستان مەن ددسۇ اراسىنداعى ىقپالداستىقتىڭ وزەكتى ماسەلەلەرى مەن پەرسپەكتيۆالارى تالقىلاندى. مەملەكەت باسشىسى باس ديرەكتورعا ەلىمىزدىڭ پاندەمياعا قارسى ءىس-قيمىلدار جونىندە قابىلداپ جاتقان شارالارى, ونىڭ ىشىندە قازاقستاندىق عالىمداردىڭ كوروناۆيرۋسقا قارسى ازىرلەگەن پرەپاراتتارى مەن حالىققا جاپپاي ۆاكتسينا سالۋ جۇمىستارىنىڭ جۇرگىزىلۋ بارىسى تۋرالى مالىمەت بەردى.
قاسىم-جومارت توقاەۆ تەدروس اندحانوم گەبرەيەسۋسپەن بۇعان دەيىنگى كەزدەسۋلەرىن ەسكە الا وتىرىپ, دۇنيەجۇزىلىك دەنساۋلىق ساقتاۋ ۇيىمى قازاقستاننىڭ سەنىمدى ارىپتەسى ەكەنىن اتاپ ءوتتى.
ء«بىز ءسىزدىڭ دۇنيەجۇزىلىك دەنساۋلىق ساقتاۋ ۇيىمىن دامىتۋعا قوسقان ۇلەسىڭىزدى جوعارى باعالايمىز. وكىنىشكە قاراي, الەم كۇردەلى كەزەڭدى باستان كەشىرىپ جاتىر. قازىر كوروناۆيرۋستىڭ جاڭا شتاممى — «وميكرون» انىقتالدى. ءبىز ىندەتپەن كۇرەستە ءاردايىم بىرگە بولۋىمىز كەرەك», دەدى پرەزيدەنت.
قاسىم-جومارت توقاەۆ تەدروس ادحانوم گەبرەيەسۋسكە ەكىنشى جاڭا QazCoVac-P ۆاكتسيناسى تۋرالى ايتتى. اتالعان پرەپارات كلينيكالىق زەرتتەۋلەر فازاسىنا كانديدات ۆاكتسينالار تىزىمىنە ەنگىزىلدى. پرەزيدەنت قازاقستاندىق ۆاكتسيناعا قولداۋ كورسەتكەنى ءۇشىن ددسۇ باسشىسىنا العىس ايتتى.
مەملەكەت باسشىسى ددسۇ-نىڭ ۆاكتسيناعا تەڭ قۇقىقتى جانە ءادىل قولجەتىمدىلىكتى قامتاماسىز ەتۋگە ۇمتىلىسىن تولىق قولدايتىنىن اتاپ ءوتىپ, قازاقستاندىق ۆاكتسينانى مۇقتاج ەلدەردىڭ بارىنە ۇسىنۋعا دايىن ەكەنىن ايتتى.
كەزدەسۋدە حالىقتىڭ دەنساۋلىعىن جاقسارتۋ ءۇشىن حالىقارالىق كۇش-جىگەردى جۇمىلدىرۋ قاجەت ەكەنى ايتىلدى. وسى رەتتە مەملەكەت باسشىسى دەنساۋلىق ساقتاۋ جۇيەسىندەگى ەكى ماڭىزدى – العاشقى مەديتسينالىق-سانيتارلىق كومەك پەن دەنساۋلىق ساقتاۋ سالاسىندا كورسەتىلەتىن قىزمەتپەن حالىقتى جاپپاي قامتۋ باعىتتارىن بىرىكتىرۋ تۋرالى ۇسىنىسىن جەتكىزدى.
تەدروس اندحانوم گەبرەيەسۋس قاسىم-جومارت توقاەۆتىڭ ددسۇ-نىڭ ماقساتتارى مەن ءىس-قيمىلدارىنا, سونىڭ ىشىندە العاشقى مەديتسينالىق-سانيتارلىق كومەكتى دامىتۋعا بايلانىستى باستامالارىنا بەيىلدىلىگى ءۇشىن قولداۋ ءبىلدىردى.
ۇيىمنىڭ باس ديرەكتورى ءوز كەزەگىندە قاسىم-جومارت توقاەۆقا كوروناۆيرۋسقا قارسى كۇرەس جونىندە قابىلدانىپ جاتقان شارالار, ۆيرۋستىڭ جاڭا شتامدارى جانە پاندەميانىڭ ودان ءارى ءورشۋ ستسەناريىنە قاتىستى بولجامدار تۋرالى مالىمەت بەردى. تەدروس اندحانوم گەبرەيەسۋس وسى ولىمگە سوقتىراتىن اسا قاۋىپتى ىندەتپەن كۇرەستە ۆاكتسينا سالۋدىڭ اسا ماڭىزدى ەكەنىن اتاپ ءوتتى.
