قازاقستان • 27 قاراشا، 2021

قازاقستاندا 14 مىڭنان استام زاڭسىز اكىمشىلىك ءىس توقتاتىلدى

48 رەت كورسەتىلدى

باس پروكۋراتۋرا بيزنەس پەن ازاماتتاردى بەلگىلەنبەگەن جەرلەردە ساۋدا جاساعانى ءۇشىن جازالاۋدىڭ نەگىزدىلىگىن زەردەلەدى، دەپ حابارلايدى Egemen.kz.

باس پروكۋروردىڭ ورىنباسارى بولات دەمباەۆتىڭ ايتۋىنشا، اقبتك-ءنىڭ 204-بابىنىڭ 1-بولىگى بويىنشا جاۋاپكەرشىلىك ساۋدا ءۇشىن ارنايى ورىندار انىقتالعان كەزدە عانا تۋىنداۋى ءتيىس.

«ولاردى وبلىستىق، قالالىق جانە اۋداندىق اكىمدىكتەر انىقتايدى («جەرگىلىكتى مەملەكەتتىك باسقارۋ تۋرالى» زاڭنىڭ 27، 31-باپتارى). الايدا، كوپتەگەن وڭىرلەردە مۇنداي ورىندار بولعان جوق، بىراق ادامدارعا 12-دەن 27 مىڭ تەڭگەگە دەيىن ايىپپۇل سالىندى»، دەدى باس پروكۋروردىڭ ورىنباسارى بولات دەمباەۆ.

مىسالى، جەزقازعاندا ساۋدا ورىندارى انىقتالعان جوق، وسىعان قاراماستان كاسىپكەرلەر جاۋاپكەرشىلىككە تارتىلدى. پروكۋراتۋرا شارالارى بويىنشا 38 ءىس توقتاتىلدى، قالادا ساۋدا ورىندارى انىقتالدى.

«وسىعان ۇقساس، ەلىمىزدىڭ باسقا وڭىرىندە – اقمولا وبلىسىنىڭ زەرەندى اۋدانىندا پروكۋروردىڭ اكتىسى بويىنشا ساۋدا ورىندارى انىقتالدى. ناتيجەسىندە، 26 زاڭسىز قاۋلىنىڭ كۇشى جويىلدى»، دەپ ءتۇسىندىردى بولات دەمباەۆ.

جالپى، پروكۋراتۋرا شارالارى بويىنشا 14 مىڭنان استام زاڭسىز اكىمشىلىك ءىس توقتاتىلدى. اكىمدىكتەردىڭ شەشىمدەرىمەن ەلىمىزدىڭ بارلىق وڭىرلەرىندە 4 126 ساۋدا ورنى انىقتالدى.

جىبەرىلگەن بۇزۋشىلىقتار ءۇشىن 113 تۇلعا (87 پوليتسيا قىزمەتكەرى جانە اكىمدىكتەردىڭ 26 قىزمەتكەرى) تارتىپتىك جاۋاپكەرشىلىككە تارتىلدى.

باس پروكۋراتۋرانىڭ باستاماسىمەن ساۋدا جانە ينتەگراتسيا مينيسترلىگى بۇل ماسەلەنى باقىلاۋعا الدى.

سوڭعى جاڭالىقتار

ۋتيل الىمى ۋاقىتشا توقتاتىلدى

ەكونوميكا • بۇگىن، 12:51

دوللار باعاسى ارزاندادى

ەكونوميكا • بۇگىن، 11:32

ۇقساس جاڭالىقتار