تۇڭعىش پرەزيدەنتىمىز, ەڭ الدىمەن, تاۋەلسىزدىكتى ساقتاۋ جونىندەگى قاستەرلى قۇندىلىققا نازار اۋدارعان. شىن مانىندە, تاۋەلسىزدىكتەن ارتىق باقىت تا, ودان اسقان بەرەكە دە جوق. سوندىقتان وسى ۇعىمدى حالىققا جەتكىزۋ, ەلگە ءتۇسىندىرۋ – ءبارىمىزدىڭ ازاماتتىق پارىزىمىز. ەركىن ەل بولماساق, ءبىز وتكەنىمىزدى سارالاپ, بۇگىنىمىزدى باعامداپ, بولاشاعىمىزدى بولجاي المايمىز. سوندىقتان ەلدىگىمىزدى ەڭسەلى, ەگەمەندىگىمىزدى باياندى ەتۋ – بارشامىزدىڭ ابىرويلى مىندەتىمىز.
مەملەكەت رەتىندە ءوسىپ-وركەندەۋ ءۇشىن بىرلىك پەن كەلىسىمنىڭ ماڭىزى زور. ەلباسى ايتقانداي, بۇل – ەلدىگىمىزدىڭ مىزعىماس تىرەگى. راسىمەن, قازاقستاننىڭ بۇگىنگىدەي وردالى ەلگە اينالۋى – تاتۋلىق پەن سىيلاستىق ارقاسى. ءبىز بۇل تۇرعىدان الەمگە ۇلگى كورسەتە الدىق. وسىنىڭ ءبارىن حالقىمىز «بىرلىك بولماي تىرلىك بولمايدى» دەپ, ءبىر-اق اۋىز سوزگە سىيدىرا بىلگەن. قازىر سىن-قاتەرلەر زامانى دەپ جاتىرمىز. جەر-جەردە ءتۇرلى جاعدايلار بولىپ جاتقانىن دا كورىپ وتىرمىز. ال قازاقستان سونىڭ بارىنەن بىرلىك پەن كەلىسىمنىڭ ارقاسىندا اينالىپ ءوتتى. وسى باقىتىمىز ۇزاعىنان بولعاي.
ەلباسى ايتقان ءۇشىنشى تۇعىر – اتا-بابادان ميراس بولعان جەردى ساقتاۋ. مەنىڭشە, جەر مەن تاۋەلسىزدىك – ەگىز ۇعىم. جەردى قورعاۋ ول – تاۋەلسىزدىكتى قورعاۋ دەگەن ءسوز. بابالارىمىزدان قالعان «ۇلتاراقتاي جەر قىمبات» دەگەن اسىل ءسوز بار. سوندىقتان ءبىز ءۇشىن جەر – ەڭ قىمبات قازىنا. ونى قاسىق قانىمىز قالعانشا قورعاۋىمىز كەرەك.
تۇڭعىش پرەزيدەنتىمىز توقتالعان ءتورتىنشى دۇنيە – سالت-ءداستۇر جانە وتباسىلىق قۇندىلىق. جاسىراتىنى جوق, كەيىنگى كەزدەردە وتباسىلىق قۇندىلىقتىڭ تومەندەپ كەتكەنىن بايقاپ ءجۇرمىز. ەلباسى سول سەبەپتى, بۇل ماسەلەگە باسا ءمان بەرىپ وتىر. الداعى ۋاقىتتا ەلدىكتىڭ ماڭىزدى تىرەگى سانالاتىن وسى ينستيتۋتتىڭ دەڭگەيىن كوتەرۋ ءۇشىن جۇدىرىقتاي جۇمىلۋىمىز قاجەت. بۇل جولدا اۋىلداعى اق ساقالدى اتالارىمىز بەن اق جاۋلىقتى اجەلەرىمىزدىڭ سوزدەرىنە قۇلاق ءتۇرۋ, سوعان توقتاۋ, سودان ساباق الۋ بۇرىنعىداي ۇلتتىق دەڭگەيگە كوتەرىلۋگە ءتيىس. ءبىز «ۇلكەنگە – قۇرمەت, كىشىگە – ىزەت» كورسەتە بىلگەن حالىقپىز. وسى ۇلتتىق كودىمىزدى جاڭعىرتىپ قانا قويماي, تۇرمىس-سالتىمىزعا ەركىن ەنگىزسەك, بىرەگەيلىگىمىزدىڭ ىرگەسى بەكي تۇسەرى ءسوزسىز.
نۇرسۇلتان ءابىش ۇلى اتاپ وتكەن ۇلتتىق مادەنيەتتى ساقتاۋ, ءبىلىم مەن ەڭبەككە, پراگماتيزمگە باسىمدىق بەرۋ – تاۋەلسىزدىگىمىزدى نىعايتۋ جولىنداعى اسا ماڭىزدى قۇندىلىقتار. مۇنىڭ ءبارى سىن ساعاتتا ۇلت بولىپ ۇيىسىپ, ەل بولىپ ىلگەرى جىلجۋ ءۇشىن قاجەت. سوندىقتان ەلباسى ايتقان جەتى تۇعىردىڭ ءمانى مەن ماڭىزىن حالىققا كەڭىنەن ءتۇسىندىرۋىمىز كەرەك. ءتىپتى بۇل قاعيداتتاردى مەكتەپ باعدارلاماسىنا ەنگىزىپ, وسكەلەڭ ۇرپاقتىڭ ساناسىنا ءسىڭىرۋدىڭ دە بەرەرى مول دەپ ەسەپتەيمىن.
اكىم ىسقاق,
قوعام قايراتكەرى
