ءداستۇرلى تۇردە توعىزىنشى مارتە وتكىزىلىپ وتىرعان شارا تاۋەلسىزدىكتىڭ 30 جىلدىعى مەن تۇڭعىش پرەزيدەنت كۇنىنە وراي ۇيىمداستىرىلدى. ونىڭ باستى ماقساتى – يننوۆاتسيا مەن شىعارماشىلىقتى ۇشتاستىرۋ ارقىلى جاستار ءپاتريوتيزمىن دامىتۋ.
فورۋمعا ال-فارابي اتىنداعى قازۇۋ-دىڭ باسقارما توراعاسى – رەكتورى جانسەيىت تۇيمەباەۆ, ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى ەسەتجان قوسۋباەۆ, الماتى وبلىسى اقسۋ اۋدانى قاپال اۋىلدىق وكرۋگى اكىمى اپپاراتىنىڭ باس مامانى ۆلاديمير چەپەل, قر مادەنيەت سالاسىنىڭ ۇزدىگى, اقىن باقىت جاعىپار ۇلى جانە فورۋم جەڭىمپازدارى مەن ستۋدەنتتەر قاتىستى.
شارانىڭ باسىندا ءسوز سويلەگەن ۋنيۆەرسيتەت رەكتورى جانسەيىت تۇيمەباەۆ فورۋم قاتىسۋشىلارىن جەڭىسىمەن قۇتتىقتاپ, ىستىق لەبىزىن ءبىلدىردى.
– قازاقستان – دارىندى جاستار مەكەنى. ءبىزدىڭ ەلىمىزدە جاستاردىڭ الاڭسىز وقىپ, ءبىلىم الۋىنا, شىعارماشىلىقپەن اينالىسىپ, قالاعان ماماندىق يەسى اتانۋىنا بارلىق جاعداي جاسالعان. قازاقستاننىڭ بولاشاعى سىزدەرگە – سىزدەردىڭ بىلىمدەرىڭىزگە, ەنەرگيالارىڭىز بەن پاتريوتيزمدەرىڭىزگە بايلانىستى. تاۋەلسىز ەلىمىزدىڭ ماقتانىشىنا اينالىپ, ءومىردىڭ بارلىق سالالارىندا ۇلكەن جەتىستىكتەرگە جەتۋلەرىڭىزگە شىن جۇرەكتەن تىلەكتەسپىن!», – دەدى ۋنيۆەرسيتەت رەكتورى.
كەيىن جانسەيىت تۇيمەباەۆ ۋنيۆەرسيتەت ستۋدەنتتەرىن ءانۇراندى جاندى داۋىستا حورمەن ورىنداۋعا شاقىرىپ, جاستارمەن بىرگە شىرقادى.
رەسپۋبليكالىق فورۋمعا اعىمداعى جىلى 2000-عا جۋىق جۇمىس قابىلدانعان. سولاردىڭ ىشىنەن ىرىكتەلگەن 107 قاتىسۋشى ماراپات كەشىنە جولداما الىپ وتىر. بيىل فورۋمعا قاتىسۋشىلار ەسسە جازۋ, يننوۆاتسيالىق جوبا, كوركەم ءسوز وقۋ, بەينەروليك دايىنداۋ, ازاماتتىق-پاتريوتتىق باعىتتاعى پوەزيالىق شىعارما جازۋ, سىبايلاس جەمقورلىققا قارسى جوبا مەن سۋرەت ونەرى سياقتى سەگىز باعىت بويىنشا باق سىناستى. گالا-كونتسەرت بارىسىندا ءار نوميناتسيا بويىنشا جەڭىسكە جەتكەن گران-پري يەگەرلەرىنە ءبىر جىلدىق گرانت سەرتيفيكاتى تابىستالدى. سونىمەن قاتار شارادا ءبىرىنشى, ەكىنشى جانە ءۇشىنشى ورىن يەگەرلەرى دە ماراپاتتالدى.
«مەن جاستارعا سەنەمىن!» رەسپۋبليكالىق فورۋمىنىڭ گران-پري يەگەرلەرىنىڭ ءبىرى – سەمەي مەملەكەتتىك مەديتسينا ۋنيۆەرسيتەتىنىڭ ستۋدەنتى دامير شاديبەك ۇلى. ول «دارىگەر – ارداقتىماماندىق» بەينەروليك بايقاۋىنا ءوزىنىڭ تۋىندىسىن ۇسىنىپ, جەڭىسكە جەتىپ وتىر. «جاستاردىڭ ەڭبەگىن باعالاپ, مۇمكىندىك بەرەتىن بۇگىنگى فورۋمنىڭ ماڭىزدىلىعى وتە جوعارى. وسى فورۋمدى وتكىزۋگە مۇرىندىق بولعان بارشا ۇيىمداستىرۋشىلارعا العىسىم شەكسىز. جەڭىسكە جەتكەنىمە وتە قۋانىشتىمىن», – دەدى دامير شاديبەك ۇلى.
شارا سوڭى ارنايى دايىندالعان كونتسەرتتىك باعدارلامامەن اياقتالدى.
