ىستانبۇلداعى حالىقارالىق قىلمىستىق پوليتسيا ۇيىمىنىڭ باس اسسامبلەياسى – ينتەرپولدىڭ 89-شى سەسسياسى ءوتىپ جاتىر, وندا قازاقستاندىق دەلەگاتسيانى ىشكى ىستەر ءمينيسترى ەرلان تۇرعىمباەۆ باسقارادى.
اسسامبلەياعا 160 ەلدىڭ وكىلدەرى, سونداي-اق ينتەرپولدىڭ ۇلتتىق ورتالىق بيۋروسى, ونىڭ ىشىندە قازاقستان مەن حالىقارالىق ۇيىمدار – بۇۇ, دسۇ, حكۇ, Europol, Ameripol, Aseanapol باسشىلارى, ورتالىق امەريكا, مەكسيكا جانە كاريب ءوڭىرى پوليتسيا باسشىلارىنىڭ كوميسسياسى جانە ت.ب. قاتىسادى.
اسسامبلەيادا ينتەرپولدىڭ جاھاندىق قاۋىپسىزدىكتى قامتاماسىز ەتۋدە ماڭىزدى ءرول اتقاراتىنى, جالپى قىلمىسپەن كۇرەس سالاسىندا قاتىسۋشى ەلدەردىڭ ۇلتتىق قۇقىق قورعاۋ ورگاندارىنىڭ كۇش-جىگەرىن بىرىكتىرۋ سالاسىندا كەڭ مۇمكىندىكتەر بەرەتىنى اتاپ ءوتىلدى.
تۇركيا رەسپۋبليكاسىنىڭ پرەزيدەنتى رەجەپ ەردوعان قاتىسۋشىلارعا ارناعان سوزىندە حالىقارالىق تەرروريزمگە قارسى كۇرەستەگى حالىقارالىق قىلمىستىق پوليتسيا ۇيىمىنىڭ ماڭىزدىلىعىن اتاپ ءوتتى.
– مەن ءۇشىن وركەنيەتتەر توعىساتىن وسى قالادا ينتەرپول اسسامبلەياسىن قابىلداۋ ۇلكەن مارتەبە. بۇل كەزدەسۋ ءبارىمىزدىڭ ەلىمىزدىڭ قاۋىپسىزدىگى مەن قورعالۋىن قامتاماسىز ەتۋگە ۇلكەن ۇلەس قوسادى دەپ سەنەمىن, – دەپ اتاپ ءوتتى تۇركيا باسشىسى.
اسسامبلەيا الاڭىندا ەرلان تۇرعىمباەۆتىڭ تۇركيا رەسپۋبليكاسىنىڭ ىشكى ىستەر ءمينيسترى سويلۋ سۇلەيمانمەن, سونداي-اق سينگاپۋر, كورەيا رەسپۋبليكاسى, ءباا جانە ت.ب. پوليتسيا ۆەدومستۆولارى دەلەگاتسيالارىنىڭ باسشىلارىمەن ەكىجاقتى كەزدەسۋلەرى ءوتتى. شەتەلدىك ارىپتەستەرىمەن كەزدەسۋ بارىسىندا مينيستر حالىقارالىق پوليتسيا ىنتىماقتاستىعىنىڭ وزەكتى ماسەلەلەرى, سونىڭ ىشىندە ترانسۇلتتىق قىلمىس, ەسىرتكى بيزنەسى, زاڭسىز كوشى-قون, ادام ساۋداسى, كيبەرقاۋىپسىزدىك, قىلمىسكەرلەردى ۇستاۋ جانە باسقا دا ماسەلەلەردى تالقىلادى.
