جي كومەگىمەن جاسالدى
ەكى مىڭنان استام سارباز تەگىن ءبىلىم الادى
قورعانىس مينيسترلىگىنىڭ مالىمەتىنشە, سوڭعى جىلدارى گرانتتىق باعدارلاماعا قاتىسۋعا نيەت بىلدىرەتىن ساربازدار سانى تۇراقتى ءوسىپ كەلەدى.
باعدارلاما ىسكە قوسىلعالى 10 مىڭنان استام سارباز ءبىلىم گرانتىنا يە بولعان. گرانتتاردى ءبولۋ «سارباز 2.0» تسيفرلىق جۇيەسى ارقىلى جۇرگىزىلەدى.
«2025 وقۋ جىلىنا مەرزىمدى اسكەري قىزمەت وتكەرگەن ازاماتتارعا 2314 ءبىلىم بەرۋ گرانتى بولىنسە, 2026 وقۋ جىلىنا 2553 گرانت قاراستىرىلعان. بۇل گرانتتار قورعانىس مينيسترلىگى, ۇلتتىق ۇلان, شەكارا قىزمەتى, توتەنشە جاعدايلار مينيسترلىگى جانە مەملەكەتتىك كۇزەت قىزمەتى اراسىندا ۇلەستىرىلەدى.
باعدارلاماعا ەلىمىزدىڭ بارلىق وڭىرىنەن جاستار قاتىسىپ جاتىر. اسىرەسە وڭتۇستىك قازاقستان, الماتى, شىعىس قازاقستان جانە اقمولا وبلىستارىنان ءوتىنىش بەرۋشىلەر كوپ. گرانت يەگەرلەرى كوبىنە IT-ماماندىقتار, ينجەنەرلىك-تەحنيكالىق باعىتتار جانە اقپاراتتىق قاۋىپسىزدىك سالالارىن تاڭدايدى.
تالاپكەرلەر اراسىندا ەڭ تانىمال جوعارى وقۋ ورىندارىنىڭ قاتارىندا Astana IT University, ءال-فارابي اتىنداعى قازاق ۇلتتىق ۋنيۆەرسيتەتى, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى جانە ق.ي. ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى بار», دەلىنگەن مينيسترلىكتىڭ رەداكتسيا ساۋالىنا بەرگەن جاۋابىندا.
مەملەكەتتىك كۇزەت قىزمەتى: كوكتەمدە شاقىرىلعان ساربازدار انت قابىلدادى
«اسكەر ماعان ومىرلىك باعىت بەردى»
تۇركىستان وبلىسى تۇلكىباس اۋدانى مىڭباي اۋىلىنىڭ تۋماسى بالابەك داستان دوسجان ۇلى مەرزىمدى اسكەري قىزمەتتەن كەيىن جوعارى وقۋ ورنىنا گرانتپەن ءتۇسىپ, بۇگىندە ستۋدەنت اتانىپ وتىر. ول اسكەردىڭ ءوز ومىرىنە ۇلكەن وزگەرىس اكەلگەنىن ايتادى.
داستان جامبىل وبلىسىنداعى 75/263 اسكەري بولىمىندە مەرزىمدى اسكەري قىزمەت وتكەرگەن. اسكەرگە اتتانار الدىندا ءۇش جوعارى وقۋ ورنىن تاڭداعانىمەن, گرانتقا يە بولامىن دەپ ناقتى ويلاماعانىن جاسىرمايدى. قىزمەت بارىسىندا جاۋىنگەرلىك دايىندىق پەن اسكەري قۇقىق نەگىزدەرى بويىنشا جوعارى ناتيجە كورسەتىپ, ۇزدىك سارباز اتانعان.
قازىر ول شىمكەنت قالاسىنداعى م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ 3-كۋرس ستۋدەنتى. بولاشاق ماماندىعى – سپورت جانە تۋريزم فاكۋلتەتىندەگى العاشقى اسكەري دايىندىق باعىتى.
«گرانت الۋ ءۇشىن ارنايى دايىندالعان جوقپىن. ەشقانداي ەمتيحان تاپسىرمادىم. اسكەردەگى جاقسى كورسەتكىشتەرىمنىڭ ارقاسىندا گرانت يەگەرى اتاندىم. بۇل جاڭالىقتى ەستىگەندە ەرەكشە سەزىمدە بولدىم. شىنىمدى ايتسام, ولاي بولادى دەپ كۇتپەدىم», دەيدى داستان.
ونىڭ ايتۋىنشا, اسكەر تەك فيزيكالىق دايىندىق ەمەس, ادامنىڭ مىنەزىن قالىپتاستىراتىن ۇلكەن مەكتەپ.
«اسكەري انت قابىلداعان ساتتەن باستاپ ءوز ەلىمنىڭ, وتباسىمنىڭ الدىنداعى جاۋاپكەرشىلىكتى تەرەڭ سەزىندىم. اسكەردە جۇرگەندە تەك دەنە شىنىقتىرىپ قانا قويماي, مورالدىق-پسيحولوگيالىق تۇرعىدان شىڭدالدىم. قانداي قيىندىق بولسا دا توزە بىلۋگە, تاباندىلىق تانىتۋعا ۇيرەتتى. اسكەر – ءومىر مەكتەبى دەگەن ءسوز بەكەر ايتىلماعان», دەيدى سارباز.
داستاننىڭ اسكەري سالاعا جاقىن بولۋىنا وتباسىنىڭ دا ىقپالى زور بولعان. ونىڭ اكەسى كەڭەس اسكەرى قاتارىندا 1988-1990 جىلدارى گەرمانيا مەن پولشادا قىزمەت ەتكەن. اتاسى دا كەزىندە ۆلاديۆوستوك ماڭىنداعى چيتا قالاسىندا اسكەر قاتارىندا بولعان.
ەلىمىزدە 1000-نان استام سارباز گرانت يەگەرى اتاندى: تولىق ءتىزىم جاريالاندى
ال تۋعان اعاسى بالابەك جەڭىسبەك دوسجان ۇلى – قازاقستان قارۋلى كۇشتەرىنىڭ وفيتسەرى, مايور شەنىندەگى اسكەري قىزمەتكەر. قازىرگى تاڭدا ول شىعىس قازاقستان وبلىسى كۇرشىم اۋدانىنداعى اۋە قورعانىسى كۇشتەرىنىڭ اسكەري بولىمىندە قىزمەت اتقارىپ ءجۇر.
داستاننىڭ پىكىرىنشە, اسكەردەن كەيىن بەرىلەتىن ءبىلىم گرانتتارى كوپتەگەن جاس ءۇشىن ۇلكەن مۇمكىندىك.
«قازىرگى قوعامدا كوپبالالى نەمەسە الەۋمەتتىك جاعدايى تومەن وتباسىنان شىققان جاستاردىڭ ءبارى بىردەي وقۋعا تۇسە المايدى. كەيبىرى ۇبت-دان ءسۇرىنىپ, كەيىن وقۋ تۋرالى ويدان الىستاپ كەتەدى. وسىنداي جاستار ءۇشىن اسكەردەگى گرانت – ۇلكەن مۇمكىندىك ءارى جاڭا جول. اسكەري بورىشىن ادال وتەپ, گرانتقا تۇسۋگە تالپىنۋعا بولادى», دەيدى ول.
ول اسكەردەن قاشاتىن جاستار تۋرالى دا ءوز ويىن جەتكىزدى.
«ەشتەڭەدەن قورىقپاي, اسكەرگە بارىپ كەلۋ كەرەك دەپ ويلايمىن. سەبەبى وتان الدىنداعى بورىشتى وتەۋ – ءار ازاماتتىڭ پارىزى. قازىرگى گەوساياسي جاعداي كۇردەلى كەزەڭدە جاستار ەلگە دەگەن جاۋاپكەرشىلىكتى سەزىنۋى قاجەت. مەملەكەت تاراپىنان جاسالىپ جاتقان قولداۋلار مەن مۇمكىندىكتەردى ءتيىمدى پايدالانىپ, ءبىلىم الىپ, ەل دامۋىنا ۇلەس قوسۋعا بولادى», دەيدى داستان.
«ماقساتىم – جوعارى وقۋ ورنىنا ءتۇسۋ بولدى»
قاتارداعى جاۋىنگەر كەنجەبەك باقداۋلەت باعدات ۇلى – قوستاناي وبلىسى رۋدنىي قالاسىنىڭ تۋماسى. قازىرگى تاڭدا ول ۇلتتىق ۇلاننىڭ استانا قالاسىنداعى 6636 اسكەري بولىمىندە مەرزىمدى اسكەري قىزمەتىن اتقارىپ ءجۇر.
باقداۋلەت اسكەري قىزمەتكە 2025 جىلدىڭ ماۋسىم ايىندا شاقىرىلعان. ونىڭ ايتۋىنشا, قىزمەت بارىسىندا ساربازدار ءۇشىن تاكتيكالىق دايىندىق, اتىس دايىندىعى, ساپتىق جانە فيزيكالىق دايىندىق بويىنشا تۇراقتى ساباقتار وتكىزىلگەن.
«مەن بارلىق دايىندىقتار بويىنشا جاقسى ناتيجە كورسەتۋگە تىرىستىم. سونىڭ ارقاسىندا 2026 جىلدىڭ ءساۋىر ايىندا «سارباز 2.0» باعدارلاماسىنىڭ قورىتىندىسى بويىنشا ءال-فارابي اتىنداعى قازاق ۇلتتىق ۋنيۆەرسيتەتىنىڭ گرانتىن جەڭىپ الدىم», دەيدى سارباز.
ول الەۋمەتتىك قامتاماسىز ەتۋ باعىتى بويىنشا ءبىلىم الۋدى تاڭداعان. اسكەري قىزمەتى اياقتالعان سوڭ تۋعان جەرى قوستانايعا بارىپ, جاقىندارىمەن قاۋىشۋدى جوسپارلاپ وتىر. كەيىن الماتىعا بارىپ, ۋنيۆەرسيتەتكە قۇجاتتارىن تاپسىرىپ, وقۋىن جالعاستىرماق.
باقداۋلەتتىڭ بۇعان دەيىن ارنايى ورتا ءبىلىمى بولعان. ول سلەسار ماماندىعى بويىنشا ديپلوم العانىن ايتادى. سوعان قاراماستان جوعارى ءبىلىم الۋدى ارمانداپ, اسكەرگە دە سول ماقساتپەن كەلگەن.
«اسكەرگە كەلگەندە جوعارى وقۋ ورنىنا تۇسسەم دەگەن ارمانىم بولدى. سول ءۇشىن ساپتىق, تاكتيكالىق, ارنايى, اتىس جانە فيزيكالىق دايىندىقتاردىڭ بارىندە ءوزىمدى جاقسى قىرىمنان كورسەتۋگە تىرىستىم», دەيدى ول.
ساربازدىڭ ايتۋىنشا, اسكەري قىزمەت بارىسىندا اي سايىن قورىتىندى تەكسەرىستەر وتكىزىلىپ وتىرعان. سونىمەن قاتار 10 ايلىق قىزمەتتەن كەيىن «سارباز 2.0» باعدارلاماسى اياسىندا ارنايى تەست تاپسىرعان.
«تەستىلەۋ ناتيجەسىندە 74 بالل جينادىم. بىزگە ءتورت جوعارى وقۋ ورنىن تاڭداۋعا مۇمكىندىك بەرىلدى. مەن العاشقى تاڭداۋىما ءال-فارابي اتىنداعى قازاق ۇلتتىق ۋنيۆەرسيتەتىن قويعان ەدىم. سول ارمانىما قول جەتكىزىپ, وقۋعا تۇسكەنىمە وتە قۋانىشتىمىن», دەيدى باقداۋلەت.
«اسكەري قىزمەتتىڭ بەدەلى ارتتى»
پودپولكوۆنيك ەربولات ءالجانوۆ ساربازدارعا ءبىلىم گرانتتارىن بەرۋ باعدارلاماسى جاستاردىڭ اسكەرگە دەگەن كوزقاراسىن وزگەرتۋگە وڭ ىقپال ەتكەنىن ايتادى.
«بۇرىن كوپتەگەن جاس اسكەري قىزمەتتى تەك مىندەت رەتىندە قابىلداسا, قازىر ونى بولاشاققا مۇمكىندىك بەرەتىن ماڭىزدى كەزەڭ رەتىندە كورە باستادى. اسىرەسە جوعارى وقۋ ورنىنا تۇسۋگە نيەتتى جاستار ءۇشىن بۇل – ۇلكەن موتيۆاتسيا. اسكەر قاتارىندا ادال قىزمەت ەتكەن ساربازدارعا گرانت بەرۋ – مەملەكەت تاراپىنان كورسەتىلگەن ناقتى قولداۋ. بۇل جاستاردى تارتىپكە, جاۋاپكەرشىلىككە جانە وتان الدىنداعى بورىشتى وتەۋگە ىنتالاندىرادى. سونىمەن قاتار اسكەري قىزمەتتىڭ بەدەلىن ارتتىرۋعا دا اسەر ەتىپ وتىر.
بۇل باعدارلاما ساربازداردىڭ قىزمەتكە دەگەن ىنتاسىن كۇشەيتتى. قازىر كوپتەگەن جاس اسكەري بولىمدەرگە سانالى تۇردە كەلىپ, ءوز بولاشاعىن اسكەري قىزمەتپەن جانە بىلىممەن بايلانىستىرىپ جاتىر. ولار ءبىر جىلدىق قىزمەتتىڭ تەك اسكەري تاجىريبە عانا ەمەس, سونىمەن قاتار ءبىلىم الۋعا جول اشاتىنىن تۇسىنەدى.
باعدارلامانىڭ تاعى ءبىر ماڭىزدى تۇسى – الەۋمەتتىك ادىلدىك. اسكەردە جاقسى ناتيجە كورسەتكەن, ءتارتىپتى ءارى جاۋاپتى ساربازداردىڭ ەڭبەگى ەسكەرۋسىز قالمايدى. بۇل ءوز كەزەگىندە بولىمدەردەگى باسەكەلەستىكتى ارتتىرىپ, جاستاردى ءوزىن دامىتۋعا جەتەلەيدى», دەدى ول.
ونىڭ سوزىنشە گرانت بەرۋ باستاماسى اسكەردىڭ تارتىمدىلىعىن ارتتىرىپ قانا قويماي, جاستار اراسىندا پاتريوتتىق رۋحتىڭ كۇشەيۋىنە دە ىقپال ەتىپ وتىر.
قورعانىس مينيسترلىگىنىڭ مالىمدەۋىنشە باعدارلاما جاستار اراسىندا سۇرانىسقا يە. بۇگىندە جاستار اسكەري قىزمەتتى تەك ازاماتتىق بورىش رەتىندە ەمەس, ءبىلىم الۋعا جانە كاسىبي دامۋعا مۇمكىندىك بەرەتىن الەۋمەتتىك تەتىك رەتىندە قابىلداي باستاعان.
اسكەردەگى جاڭا تالاپ: ەندى سارباز قىزمەت بارىسىندا كەمىندە 5 كىتاپ وقۋعا مىندەتتى
سونىمەن قاتار ۆەدومستۆو باعدارلامانى ودان ءارى كەڭەيتۋ ماسەلەسى قاراستىرىلىپ جاتقانىن مالىمدەدى. اتاپ ايتقاندا, گرانتتار سانىن كوبەيتۋ, سەرىكتەس ۋنيۆەرسيتەتتەر ءتىزىمىن ۇلعايتۋ جانە اسكەري قىزمەتشىلەردى الەۋمەتتىك قولداۋ شارالارىن جەتىلدىرۋ جوسپارلانىپ وتىر.
دەگەنمەن جوبا اياسىندا شەشىمىن قاجەت ەتەتىن ماسەلەلەر دە بار. مينيسترلىك جاستار اراسىندا باعدارلامانىڭ مۇمكىندىكتەرى تۋرالى اقپاراتتاندىرۋدى كۇشەيتۋ, سۇرانىسقا يە ماماندىقتارعا بولىنەتىن ورىنداردى ارتتىرۋ جانە كونكۋرستىق ىرىكتەۋدىڭ تسيفرلىق جۇيەسىن جەتىلدىرۋ قاجەتتىگىن اتاپ ءوتتى.
