فوتو: gov.kz
ءمينيستردىڭ ايتۋىنشا, سپورتشىنىڭ جالاقىسىن تولەمەۋگە قاتىستى ەشقانداي فاكتى انىقتالماعان. ال مۇنداي جاعدايدىڭ تۋىنداۋىنا بۇرىنعى كەلىسىمشارتتىڭ اياقتالۋى سەبەپ بولعان.
«ميحايل شايدوروۆ 2026 جىلدىڭ اقپانىنا دەيىن بۇرىنعى كەلىسىمشارت بويىنشا جالاقى الىپ كەلدى. وليمپيادادان كەيىن بۇل كەلىسىمشارت اياقتالدى. ناۋرىز ايىنان باستاپ جاڭا تسيكلگە ارنالعان كەلىسىمشارت جاسالۋى ءتيىس ەدى. قازىرگى تاڭدا جاڭا كەلىسىمشارتقا قول قويىلماعاندىقتان, جاڭا تولەمدەر بەرۋگە زاڭدى نەگىز جوق», دەدى ەربول مىرزابوسىنوۆ.
ۆەدومستۆو باسشىسى جاڭا كەلىسىمشارت بارلىق ۇلتتىق قۇراما سپورتشىلارىنا ورتاق تيپتىك شارت نەگىزىندە ۇسىنىلاتىنىن اتاپ ءوتتى. ونىڭ ايتۋىنشا, سپورتشىنىڭ وليمپيادالىق جەتىستىگى ەسكەرىلىپ, وعان تيىمدىرەك شارتتار قاراستىرىلعان.
«قارجىلاندىرۋدى قىسقارتۋ نەمەسە جاعدايدى ناشارلاتۋ تۋرالى اڭگىمە جوق. كەرىسىنشە, ونىڭ مارتەبەسى ەسكەرىلگەن. بىراق سپورتشى كەلىسىمشارتتاعى «مىندەتتەمەلەر» تارماعىمەن كەلىسپەگەن», دەدى مينيستر.
سونىمەن قاتار ول سپورتشىعا قاتىستى قىسىم جاسالىپ جاتقانى تۋرالى اقپاراتتى جوققا شىعاردى.
«بۇل جەردە قانداي دا ءبىر قىسىم نەمەسە جازالاۋ ورىن الىپ جاتقان جوق. بارلىق ماسەلە تەك زاڭدىق سيپاتتا قارالىپ جاتىر», دەدى ەربول مىرزابوسىنوۆ.
مينيستر وليمپيادا التىنى ءۇشىن بەرىلەتىن سىياقى ماۋسىم-شىلدە ايلارىندا تولەنەتىنىن, ال سپورتشىعا «ەڭبەك سىڭىرگەن سپورت شەبەرى» اتاعى بويىنشا بۇيرىق بۇرىننان دايىن ەكەنىن, تەك رەسمي تابىستاۋ ءراسىمى قالعانىن مالىمدەدى. سونداي-اق ول بارلىق ماسەلە باقىلاۋدا ەكەنىن ايتىپ, زاڭ اياسىندا شەشىلەتىنىن جەتكىزدى.
ەسكە سالا كەتەيىك, بۇعان دەيىن وليمپيادا چەمپيونى جالاقىسىنىڭ 5 اي بويى كەشىگىپ جاتقانىن ايتىپ مالىمدەمە جاساعان بولاتىن. جاعدايعا قاتىستى ەلىمىزدەن شىققان وليمپيدا چەمپيوندارى پىكىر بىلدىرگەن ەدى. سونداي-اق ميحايل شايدوروۆ جالاقى داۋىنا قاتىستى مالىمدەمە جاسادى.
