وسى كەزەڭدە وقۋشىلار ءۇش بىردەي قايىرىمدىلىق جوباسىنا قاتىسادى:
- بالالار ءۇيىنىڭ تاربيەلەنۋشىلەرىنە ارنالعان جىلى كيىمدەردى جيناۋ بويىنشا «جىلۋلىق سىيلا» جوباسى,
- بالالار ءۇيىنىڭ تاربيەلەنۋشىلەرى مەن مۇقتاج وتباسىلارعا ارنالعان ۇستەل ويىندارىن, ويىنشىقتاردى جيناۋ بويىنشا «بىرگە وينايىق»,
- الماتى قالاسى مەن الماتى وبلىسىنىڭ سابيلەر ءۇيىنىڭ بالالارىنا ارنالعان «Pampers Drive» جوباسى.
مەكتەپ باسشىلىعىنىڭ ايتۋىنشا, قايىرىمدىلىق مەرەكەلىك اكتسيالاردى ۇيىمداستىرۋ العاشقى كۇننەن باستاپ-اق يگى داستۇرگە اينالعان. 22 جىلدان بەرى مەكتەپتە وقىعاندار ەرىكتى تۇردە مۇقتاج جاندارعا قاجەتتى زاتتاردى جيناۋعا قاتىسۋدا.
– سوڭعى 4 جىلدان بەرى ءبىز «ماحابباتقا قۇقىق» قورىمەن سەرىكتەسپىز. بىلتىر سولاردىڭ كومەگىمەن 250 بالانى, سونىمەن قاتار «كەڭەس» ورتالىعى مەن شىلىك قالاسىنىڭ بالالار ءۇيىنىڭ بۇلدىرشىندەرىن كومەكپەن قامتىدىق. ولارعا كەرەكتى زاتتاردى, ۇستەل ويىندارى مەن مەكتەپ وقۋشىلارى اتىنان كىتاپتار تاپسىرىلدى, - دەدى حالىقارالىق «ميراس» مەكتەبى ديرەكتورىنىڭ تاربيە ءىسى جونىندەگى ورىنباسارى اللا قۇربانوۆا.
سونىمەن قاتار مەكتەپتە باسقا دا قايىرىمدىلىق جوبالارى بار. سولاردىڭ ءبىرى – «ونكولوگيا مەن گەماتولوگيا بالالار ءبولىمى پاتسيەنتتەرىنە ارنالعان «باتىلدىق قوراپشاسى».
ستۋدەنتتەر, اتا-انالار مەن حالىقارالىق «ميراس» مەكتەبىنىڭ قىزمەتكەرلەرى جىل سايىن ءپاللياتيۆتى كومەك ورتالىعىنداعى اۋىر ناۋقاس بالالارعا ارناپ ويىنشىقتار جيناۋعا بەلسەندى تۇردە اتسالىسىپ كەلەدى.
اكتسيانىڭ نەگىزى يدەياسى – پروتسەدۋرالىق كابينەتكە نەمەسە وپەراتسياعا بارا جاتقان بالانى قولداۋ. پروتسەدۋرا الدىندا بالاعا «باتىلدىق قورابىنداعى» وزىنە ۇناعان كەز كەلگەن ويىنشىقتى الۋىنا رۇقسات ەتىلەدى. سول ارقىلى بالاعا پروتسەدۋرالىق كابينەتتىڭ نەمەسە وپەراتسيالىق بولمەنىڭ تابالدىرىعىن اتتاعان ساتىندە ءسال دە بولسا جۇبانىش سىيلاۋ.
– قايىرىمدىلىقتىڭ ماڭىزى وتە زور, سەبەبى سەنىڭ كىم ەكەنىڭ نەمەسە قايدا وقيتىنىڭ ماڭىزدى ەمەس, كىم بولساڭ دا كومەكتەسە الاسىڭ. كەمىندە ءبىر ادام سەنىڭ كومەگىڭدى باعالايتىنى انىق. مەن ءوز اتا-انامنىڭ جانە مەكتەبىمنىڭ ۇلگىسىندە قايىرىمدىلىقپەن اينالىسا باستادىم. كەلەشەكتە دە وسى يگى ىستەرمەن اينالىسا بەرەمىن, – دەدى قايىرىمدىلىق كوميتەتىنىڭ كوشباسشىلارىنىڭ ءبىرى, مەكتەپ وقۋشىسى مارسەل ماراتوۆا.
ەسكە سالا كەتسەك, «قايىرىمدى ىستەر مارافونى» جالپىۇلتتىق جوباسى وسى جىلدىڭ اقپان ايىندا مەملەكەت باسشىسى قاسىم-جومارت توقاەۆتىڭ باستاماسىمەن ىسكە قوسىلعان. بۇگىنگى تاڭدا جوباعا 3 ميلليونعا تارتا قازاقستاندىق اتسالىسۋدا; ال اتاۋلى الەۋمەتتىك كومەكتى 200 مىڭعا تارتا ادام الدى.
جوبا قر اقپارات جانە قوعامدىق دامۋ مينيسترلىگىنىڭ گرانتتىق قاراجاتىمەن, ازاماتتىق باستامالاردى قولداۋ ورتالىعىنىڭ قولداۋىمەن ىسكە اسىرىلۋدا.
