وزگە ۇلت جاستارى اراسىندا قازاق ءتىلىنىڭ قولدانىس اياسىن كەڭەيتۋ, قازاق ءتىلىنىڭ ەتنوسارالىق قارىم-قاتىناس ءتىلى رەتىندەگى قىزمەتىن نىعايتۋ جانە مەملەكەتتىك ءتىلدى مەڭگەرگەن قوعامدىق بەلسەندى وزگە ۇلت جاستارىن ىنتالاندىرۋدى ماقسات ەتكەن شاراعا رەسپۋبليكانىڭ 14 وبلىسى مەن نۇر-سۇلتان, الماتى, شىمكەنت قالالارىنان ىرىكتەلگەن ۇزدىكتەر قاتىستى.
مەملەكەتتىك ءتىلدى رۋحاني-مادەني قۇندىلىق رەتىندە دارىپتەگەن 21-35 جاس ارالىعىنداعى قوعامدىق بەلسەندى ەتنوس جاستارى مەملەكەتتىك ءتىلدى دامىتۋعا قوسقان ۇلەستەرى, ءبىلىم, مادەنيەت, سپورت سالاسىنداعى جەتىستىكتەرى باياندالعان بەينەروليك ۇسىنىپ, بەرىلگەن تاقىرىپتا وي تولعادى. سونىمەن قاتار «مەنىڭ تاۋەلسىز قازاقستانىم» تاقىرىبىندا ەسسە جازدى.
بايقاۋعا قاتىسۋشىلاردىڭ ءتىلدى مەڭگەرۋ دەڭگەيىن, جاۋاپتارىنىڭ مازمۇندىلىعى مەن ەرەكشەلىگىن, قازاق تىلىندە تازا سويلەۋىن باعالاعان بىلىكتى ادىلقازىلاردىڭ شەشىمىمەن اقمولالىق اناستاسيا يرۋباەۆا باس جۇلدەنى يەلەندى. ودان كەيىنگى ءبىرىنشى ورىنعا تۇركىستاندىق مۋاتتار اديحانباەۆا لايىق دەپ تابىلدى. ەكىنشى ورىندى شىمكەنتتىك حۋرماتوي ابدۋحاميدوۆا قانجىعالادى. ال استانالىق اندرەي پوتانين مەن اتىراۋلىق يرينا چەچەنەۆا ءۇشىنشى ورىندى تەڭدەي ءبولىستى. الماتى قالاسى مەن شىعىس قازاقستان وبلىسىنىڭ ءۇمىتىن ارقالاعان گالينا دۋراچەنكو مەن راۆانا يبراگيموۆا ىنتالاندىرۋ سىيلىقتارىمەن ماراپاتتالدى.
مەملەكەتتىك ءتىلدى ۇلتارالىق قاتىناس تىلىنە اينالدىرۋعا باعىتتالعان ءىس-شارا جىل سايىن جالعاسا بەرەتىن بولادى.
