بىلەكتى دە جۇرەكتى جاستار سىنالار بايقاۋعا اۋدانداردىڭ كىل مىقتىلارى قاتىستى. ءاربىر جاس سارباز جەڭىسكە ۇمتىلدى, كۇشتىلىكتەرىن, ەپتىلىكتەرىن كورسەتكىسى كەلدى.
جيىننىڭ شىمىلدىعى «تۋعان جەرىم مەنىڭ – قازاقستانىم!» چەللەندج بايقاۋىمەن ءتۇرىلدى. سايىس بولعان سوڭ ءبىرى سۇرىنەدى, ەندى ءبىرى بابىنا, باعىنا قاراي ونى ءساتتى اياقتاپ جاتادى. ونىڭ ءبارىن قازىلار ساراپتاپ, سارالاپ وتىردى. ال تۋرنيككە تارتىلۋدا, ارقاعا جاتىپ, دەنەنى كوتەرۋدە ساربازداردىڭ كۇشتىلەرى ىرىكتەلدى. اك-74 اۆتوماتىن بولشەكتەپ, جيناقتاعان ساربازدار ەپتىلىكتەرىن شاپشاڭدىقتارىن كورسەتتى. بايقاۋ ونلاين ۇيىمداستىرىلعانىمەن, قىزىقتى ءوتتى.
– «ايبىن» اسكەري-پاتريوتتىق جاستار جيىنى اسكەري قىزمەت بەدەلىن, اسكەري قىزمەتشىنىڭ مارتەبەسىن ارتتىرۋعا باعىتتالعان بىرەگەي ءىس-شارا. وڭىرلىك سايىستىڭ جەڭىمپازدارىنان وبلىستىق قۇراما جاساقتالىپ, 2022 جىلى رەسپۋبليكالىق جيىندا باقتارىن سىنايدى, – دەيدى شىعىس قازاقستان وبلىسى قورعانىس ىستەرى جونىندەگى دەپارتامەنتى باستىعىنىڭ ورىنباسارى ەرلان رامازانوۆ.
اسكەري جيىندى ۇيىمداستىرۋشىلاردىڭ كوزدەگەن ماقساتى – جاستاردى پاتريوتتىق باعىتتا تاربيەلەۋ, اسكەري-پاتريوتتىق كلۋبتاردىڭ, «جاس سارباز» سىنىپتارىنىڭ جۇمىستارىن جانداندىرۋ. سونداي-اق جاستار اراسىندا سالاماتتى ءومىر سالتىن ناسيحاتتاۋدىڭ ءبىر جولى دا وسى.
سايىستىڭ قورىتىندىسى بويىنشا, ءۇشىنشى ورىندى جارما اۋدانىنىڭ «اق ءبورى» اسكەري-پاتريوتتىق كلۋبىنىڭ كومانداسى, ەكىنشى ورىندى اياگوز اۋدانىنىڭ «جاس ارتيللەريست» اسكەري-پاتريوتتىق كلۋبىنىڭ كومانداسى ەنشىلەدى. ال ءبىرىنشى ورىندى ريددەر قالاسىنىڭ «سۇڭقار» اسكەري-پاتريوتتىق كلۋبىنىڭ كومانداسى قانجىعاعا باسسا, باس جۇلدەنى سەمەي قالاسىنا قاراستى بۇلاق اۋىلىنىڭ «اۋىل ارلاندارى» اسكەري-پاتريوتتىق كلۋبىنىڭ كومانداسى جەڭىپ الدى.
– «اسكەري-پاتريوتتىق تاربيە بەرۋ جانە جاستاردى اسكەري قىزمەتكە ىنتالاندىرۋ جونىندەگى شارالار كەشەنىن ىسكە اسىرۋ» جوباسى اياسىندا ونلاين فورماتتاعى «ايبىن» اسكەري-پاتريوتتىق جاستار جيىنىنا وبلىستىڭ 15 قالاسى مەن اۋدانىنان 75 جاس باق سىناستى. بۇل ءىس-شارا وبلىستا جىل سايىن جالعاسىن تابادى, – دەدى شىعىس قازاقستان وبلىسى ىشكى ساياسات باسقارماسى باسشىسىنىڭ ورىنباسارى يرينا سميت.
جيىن وبلىستىق ىشكى ساياسات باسقارماسىنىڭ مەملەكەتتىك الەۋمەتتىك تاپسىرىسى اياسىندا «قازاقستان حالىقارالىق قۇقىقتىق قارىم-قاتىناس قورى» قوعامدىق قورىنىڭ ۇيىمداستىرۋىمەن ءوتتى. سايىسقا قازاقستان رەسپۋبليكاسى قورعانىس مينيسترلىگى شىعىس قازاقستان وبلىسىنىڭ قورعانىس ىستەرى جونىندەگى دەپارتامەنتى مەن وبلىستىق ءبىلىم باسقارماسىنىڭ قولداۋىمەن وتكىزىلدى.
شىعىس قازاقستان وبلىسى
