ناقتىلاي ايتقاندا, ساراپشىلار حالىقارالىق ديالوگ الاڭىندا ءۇش كۇن بويى (15-17 قاراشا) جاھاندىق ەكونوميكانىڭ ماڭىزدى ماسەلەلەرىن, گەوساياسات پەن حالىقارالىق قاتىناستاردى, كليماتتىڭ وزگەرۋى جانە ت.ب. تۇيتكىلدەردى تالقىلايدى.
«استانا كلۋبىنىڭ» جۇمىسى بارىسىندا قازاقستاننىڭ 30 جىلداعى دامۋ قارقىنىنا, ونىڭ ىشكى جانە سىرتقى ساياساتىن قالىپتاستىرۋداعى تۇڭعىش پرەزيدەنت نۇرسۇلتان نازارباەۆتىڭ رولىنە جەتە نازار اۋدارىلماق. وعان قوسا, جاڭا گەوساياسي جاعدايدا ايماقتىڭ دامۋ پەرسپەكتيۆالارىن تالقىلاۋ جوسپارلانعان.
2019 جىلى ەلباسىنىڭ باستاماسىمەن قۇرىلعان ء«تۇن ورتاسى بولعاندا: يادرولىق ديالوگ بويىنشا ارەكەت ەتۋ ۋاقىتى» تاقىرىبىنداعى جاھاندىق كوشباسشىلار اليانسىنىڭ وتىرىسىندا يادرولىق قاۋىپسىزدىك ماسەلەلەرى دە وسى «استانا كلۋبىنىڭ» كەزەكتى وتىرىسىنىڭ جۇمىسىندا تالقىلانباق. قازىرگى ۋاقىتتا كوشباسشىلاردىڭ جاھاندىق اليانسى 70-تەن استام كورنەكتى حالىقارالىق قايراتكەردى, ساياساتكەر مەن ساراپشىنى جانە نوبەل سىيلىعىنىڭ لاۋرەاتىن ءبىر ارناعا توعىستىرىپ وتىر.
يۆ لەتەرم – بەلگيانىڭ پرەمەر-ءمينيسترى (2008, 2009-2011), نينو بۋردجانادزە – ء«بىرتۇتاس گرۋزيا – دەموكراتيالىق قوزعالىس» پارتياسىنىڭ ءتورايىمى, گرۋزيا پرەزيدەنتىنىڭ مىندەتىن اتقارۋشى (2003-2004, 2007-2008), گرۋزيا پارلامەنتىنىڭ توراعاسى (2001-2008), دانيلو تۇرك – مادريد كلۋبىنىڭ پرەزيدەنتى, سلوۆەنيا پرەزيدەنتى (2007-2012), ابدۋللا گۇل – تۇركيا پرەزيدەنتى (2007-2014 جج.), دجوناتان گرانوفف – جاھاندىق قاۋىپسىزدىك ينستيتۋتىنىڭ پرەزيدەنتى (اقش), ۆلاديسلاۆ ينوزەمتسەۆ – پوستيندۋستريالدى قوعامدى زەرتتەۋ ورتالىعىنىڭ ديرەكتورى (رەسەي), دجەيمس ليندسەي – حالىقارالىق بايلانىستار كەڭەسىنىڭ (CFR) اعا ۆيتسە-پرەزيدەنتى جانە كوپتەگەن باسقا دا تۇلعا وسى جانە وزگە باعىتتار جايلى پىكىرلەرىن ورتاعا سالادى.
ديالوگ الاڭى سەسسياسىنىڭ اشىلۋ سالتاناتىندا ءسوز سويلەگەن نۇرسۇلتان نازارباەۆ قورىنىڭ ديرەكتورى, پارلامەنت ءماجىلىسىنىڭ دەپۋتاتى داريعا نازارباەۆا: ء«بىزدىڭ كلۋبتىڭ بۇرىنعى وتىرىسى 2019 جىلى وتكەن. ول وتىرىس مۇلدەم باسقا داۋىردە بولعان سەكىلدى. سودان كەيىن جەر-جەردە ۆيرۋستىڭ ءورشۋى ادەتتەگى ءومىر ءتارتىبىن وزگەرتىپ جىبەردى. ەكونوميكالار توقتاپ, الەمنىڭ كوپتەگەن ەلىندە وقشاۋلانۋ جاعدايى تۋدى. ۆيرۋس الەمدى ءدال بۇلاي وزگەرتەدى دەپ ەشكىم كۇتپەگەن ەدى. پاندەميا ءبىزدىڭ قانشالىقتى ءوزارا تىعىز بايلانىستى جانە ءبىر-بىرىمىزگە تاۋەلدى ەكەنىمىزدى تاعى ءبىر رەت دالەلدەدى. بۇگىندە حالىقارالىق قاۋىمداستىق بۇرىنعىدان دا بىرىگىپ ارەكەت ەتۋگە مۇقتاج», دەدى. سونداي-اق ول ء«وزارا سەنىمدىلىك رەجىمىن قالپىنا كەلتىرۋ – قازىرگى ۋاقىتتا حالىقارالىق ارەنادا جاسالۋعا ءتيىس جانە وسى ماقساتتا جان-جاقتى كومەك كورسەتۋ قاجەت. بۇل – «استانا كلۋبىنىڭ» باستى ميسسياسى» ەكەندىگىن اتاپ ءوتتى.
نۇرسۇلتان نازارباەۆ قورى ديرەكتورىنىڭ ايتۋىنشا, ىندەت الەمدىك جۇيەدە بۇرىننان بەرى جالعاسىپ كەلە جاتقان تۇبەگەيلى وزگەرىستەرگە مۇرىندىق بول-
دى.
«الەمدە بۇل وزگەرىستەر قاي باعىتتا بولۋى كەرەك دەگەن تۇسىنىك جوق. بىزگە بۇگىندە ۇلكەن ەۋرازياداعى ديالوگتى كەشەندى تۇردە قايتا باستاۋ كەرەك ەكەنى ايدان انىق», دەدى داريعا نازارباەۆا.
ونىڭ پىكىرىن Thinking the Unthinkable جوباسىنىڭ نەگىزىن قالاۋشى جانە ونىڭ ديرەكتورى, لوندون كينگس كوللەدجىنىڭ پروفەسسورى, BBC World News جاڭالىقتار باعدارلاماسىنىڭ جۇرگىزۋشىسى (1996-2014) نيك گوۋينگ قولدادى. «الەمدە COVID-19-عا بايلانىستى مۇنداي جاعداي بولارىن ەشكىم ەلەستەتە المادى. بىرىككەن ۇلتتار ۇيىمىنىڭ باس حاتشىسى ءسوز ەتكەندەي, ءبىزدىڭ نازىك پلانەتامىزعا قاۋىپ ءتونىپ تۇر. بىزگە ورتاق كوزقاراس بويىنشا بىرىگۋ قاجەت. ەكونوميكاداعى جانە قوعامداعى تۇراقسىزدىق, بولىپ جاتقان كليماتتىق وزگەرىستەر جانە ت.ب. سالدارىنان تەرەڭ قايشىلىقتار تۋىندادى. عىلىم ەشتەڭەنى بولجاي المايدى. ەلدەر اراسىنداعى ديالوگ پەن ءوزارا ءىس-قيمىلدى كۇشەيتۋ قاجەت ەكەنى انىق», دەدى ساراپشى.
وسى ورايدا, «ەۋرازيا تاڭى» كىتابىنىڭ اۆتورى, Flint Global-دىڭ باس كەڭەسشىسى, پورتۋگاليانىڭ ەۋروپا ىستەرى جونىندەگى مەملەكەتتىك حاتشىسى (2013-
2015 ج.ج.) برۋنو ماساەش قازىرگى زاماننىڭ باستى سىن-قاتەرلەرىن اتادى جانە مەملەكەتتەردى سىن-قاتەرلەردى بىرگە جەڭۋگە شاقىردى. ء«بىز بيلىكتىڭ قايتا ءبولىنۋىن, قالىپتاسقان الەمدىك ءتارتىپتىڭ ەروزياسىن, ەۋروپا مەن اقش ەكونوميكاسىنىڭ داعدارىسىن كورىپ وتىرمىز. پاندەميا بۇل تەندەنتسيالاردى تەك ۋشىقتىردى. ءبىز اياق استىنان سەنىم مەن قاۋىپسىزدىكتىڭ وتە ماڭىزدى ەكەنىن تۇسىندىك. پاندەميا بىزگە ساباق بولدى. ودان العان ساباعىمىز ءتىپتى ءبىز بىلمەيتىن قاتەرلەرمەن كۇرەسۋ ءۇشىن قاجەت. وسى مۇددە ءبىزدى بىرىكتىرۋى ءتيىس. بۇل تۇرعىدان قازاقستان – وسىنداي ىمىراعا كەلۋدى, جاقسى بايلانىستا بولۋدىڭ كورسەتكىشى. تاۋەلسىزدىك جىلدارىندا قازاقستان ەلدەرمەن اشىق قارىم-قاتىناس ورناتىپ, ەۋرازيانى ءارتۇرلى قىرىنان زەرتتەپ, جاعدايعا ءارتۇرلى كوزقاراسپەن قارادى», دەدى برۋنو ماساەش.
ەستەرىڭىزگە سالا كەتەيىك, «استانا كلۋبىنىڭ» جۇمىسىنا 2015 جىلدان بەرى الەمنىڭ
40 ەلىنەن 200-دەن استام سپيكەر قاتىستى.
