ەلوردادا وسى جىلدىڭ كۇز ايىنىڭ سوڭىنا دەيىن انالوگتى تەلەديداردى تولىعىمەن ءوشىرىپ, تسيفرلىققا كوشىرۋ جوسپارلانۋدا. بۇل جۇمىس تسيفرلىق ەفيرلىك تەلەحابار تاراتۋدى ەنگىزۋ جونىندەگى جوبانى ىسكە اسىرۋدىڭ ءتورتىنشى كەزەڭى شەڭبەرىندە جۇرگىزىلۋدە.
بۇگىندە ەلىمىزدىڭ ماڭعىستاۋ, جامبىل, تۇركىستان, الماتى, پاۆلودار, قوستاناي, سولتۇستىك قازاقستان وبلىستارى, الماتى جانە شىمكەنت قالالارى سياقتى وڭىرلەرىندە ەسكىرگەن تەلەحابارلار تولىعىمەن ءوشىرىلدى.
جوبانى ىسكە اسىرۋدىڭ ءتورتىنشى كەزەڭى اياسىندا 2021 جىلدىڭ 1 جەلتوقسانىنا دەيىن نۇر-سۇلتاندا انالوگتىق تەلەديداردى تولىعىمەن ءوشىرۋ جوسپارلانۋدا. تسيفرلىق ەفيرلىك تەلەحابار تاراتۋ جەلىسى بويىنشا ەلوردا تۇرعىندارى مەن قوناقتارىنا تسيفرلىق ساپادا 25 تەلەارنا قولجەتىمدى, ونىڭ ىشىندە: Qazaqstan, حابار HD, حابار 24, BALAPAN, ەل ارنا, Kazakh TV, ABAI TV, ەۋرازيا ءبىرىنشى ارناسى, استانا, Qazsport HD, مير, كتك, نتك, جەتىنشى ارنا, 31 ارنا, ستۆ, Almaty, Talim TV, Atameken Business, تۇران تۆ, Hit TV, Gakku Media, MuzLife, توي دۋمان جانە نوۆوە تەلەۆيدەنيە.
ساندىق تۆ-عا كوشۋ ارنالار سانىنىڭ كوبەيۋىنە جول اشادى. سونىمەن قاتار, تسەتۆ سۋرەت پەن دىبىستىڭ جوعارى ساپاسىن قامتاماسىز ەتەدى. مۇندا "انالوگتان" ايىرماشىلىعى كەسكىن ۇزىلمەيدى, دىبىس جوعالمايدى. بۇل سپۋتنيكتىك نەمەسە كابەلدىك تەلەديدارمەن بىردەي, بىراق ساندىق ەفيرلىك حابار تاراتۋ مۇلدەم تەگىن ەكەندىگىمەن ەرەكشەلەنەدى.
وعان قوسىلۋ ءۇشىن تەلەديدار DVB-T2 ساندىق تاراتۋ ستاندارتىن قولدايتىنىنا كوز جەتكىزۋ كەرەك, ابونەنت تەك دەتسيمەترلىك انتەننانى قوسۋى كەرەك. ەگەر تەلەديدارلار DVB-T2 ستاندارتىن قولداماسا, وندا ساندىق سيگنال قابىلداعىشىن ساتىپ الۋ كەرەك.
