گولوۆكين-مۋراتا اراسىنداعى جەكپە-جەك بۇعان دەيىن ءتۇرلى باق-تا جەلتوقساندا وتەدى دەپ حابارلانعانىمەن, بوكسشىلاردىڭ وزدەرى, ولاردىڭ پروموۋتەرلەرى, ءتىپتى كەزدەسۋدى تىكەلەي ەفيردە ۇسىناتىن DAZN پلاتفورماسى دا رەسمي مالىمدەمەگەن ەدى. دەگەنمەن وتكەن اپتانىڭ سوڭىندا ەكى بوكسشى دا وزدەرىنىڭ الەۋمەتتىك جەلىدەگى پاراقشالارىندا ايقاستىڭ ناقتى ۋاقىتى مەن وتەتىن جەرىن جانكۇيەرلەرگە جاريالادى.
جەكپە-جەك رەسمي حابارلانعان كۇنى ەكى بىلعارى قولعاپ شەبەرى وزدەرىنىڭ الداعى كەزدەسۋ تۋرالى ويلارىن ورتاعا سالدى.
گەننادي گولوۆكين: «جاپونياداعى جانكۇيەرلەرىمە كەزەكتى Big Drama Show-دى ۇسىناتىنىما قۋانىشتىمىن. بۇل ەلدە بوكس وتە تانىمال سپورت ءتۇرى سانالادى. مۋراتا – مىقتى چەمپيون. بۇل – ەكى بوكسشى ءۇشىن دە كەرەمەت بوكس كەشى بولادى دەپ ۇمىتتەنەمىن. ويتكەنى ورتاعا ەكەۋمىزدىڭ دە چەمپيوندىق بەلدىگىمىز باسكە تىگىلەدى. بوكس جانكۇيەرلەرىنە تاماشا جەكپە-جەك ۇسىنامىز».
ريوتا مۋراتا: «مەنىڭ اۋەسقوي جانە كاسىپقوي بوكستا وتكىزگەن جەكپە-جەكتەرىمنىڭ ءبارى گەننادي گولوۆكينمەن بولاتىن ايقاسقا دەيىنگى دايىندىق جۇمىستارى بولدى دەپ ەسەپتەيمىن. سەبەبى, ءدال وسى كەزدەسۋ مەنىڭ ورتا سالماق پەن بوكس تاريحىنداعى ورنىمدى ايقىنداپ بەرمەك. گولوۆكين – ۇزاق ۋاقىت ورتا سالماقتىڭ كوشىن ۇستاعان تاجىريبەلى بوكسشى. مەن ءۇشىن ول ءالى جەڭىلگەن جوق. وعان دەگەن قۇرمەتىم ەرەكشە.
پاندەميا سالدارىنان ەڭ كەيىنگى ايقاسىمدى وسىدان ەكى جىل بۇرىن وتكىزدىم. بىراق ماعان بۇل ەكى جىلدىق ءۇزىلىس جەمىستى بولدى. وسى ۋاقىت ارالىعىندا فيزيكالىق جاعدايىم مەن سوققىمنىڭ كۇشىن ارتتىرىپ, باپكەرلەرمەن قارقىندى جاتتىعۋ وتكىزدىك. وسىنداي ايقاس جاپونيادا وتەتىنىنە قۋانىشتىمىن. مەن ءۇشىن بۇل – ۇلكەن قۇرمەت».
گەننادي گولوۆكين كەيىنگى جەكپە-جەگىن بىلتىرعى جەلتوقساندا پولشالىق كاميل شەرەمەتامەن وتكىزگەن بولاتىن. اقش-تىڭ فلوريدا شتاتىنداعى Seminole Hard Rock Hotel & Casino ارەناسىندا ۇيىمداستىرىلعان ايقاستا وتانداسىمىز قارسىلاسىن جەتىنشى راۋندتا تەحنيكالىق نوكاۋتپەن جەڭگەن ەدى.
ال ريوتا مۋراتا بولسا, سوڭعى رەت شارشى الاڭعا 2019 جىلدىڭ جەلتوقسانىندا كوتەرىلدى. سول جىلى ول كانادالىق ستيۆەن باتلەرمەن (28-1-1) ءوز ەلىندە جۇدىرىقتاسىپ, بەسىنشى راۋندتا تەحنيكالىق نوكاۋتپەن باسىم تۇسكەن.
