تۇركىمەنستان باسشىسى اسكەري جانە قۇقىق قورعاۋ ورگاندارىنىڭ شارۋاشىلىق ءبولىمىن قۇرۋ جۇمىسىن تەكسەرۋ ماقساتىندا اشحاباد ماڭىنداعى اۋدانداردىڭ بىرىنە بارعان ساپارىندا تاپانشادان وق اتۋ شەبەرلىگىن كورسەتتى.
تۇركىمەنستان قارۋلى كۇشتەرىنىڭ جوعارعى باس قولباسشىسى اتىس الاڭىندا بولىپ, تاپانشادان نىساناعا وق اتتى.
«اتىس الاڭىندا مەملەكەت باسشىسى نىساناعا بىرنەشە رەت وق جاۋدىرىپ, بارلىق وقتار نىسانانىڭ ورتاسىنا ءتيدى, بۇل ۇلت كوشباسشىسىنىڭ جوعارى شەبەرلىگىن ايعاقتايدى», دەلىنگەن تۇركىمەنستان تەلەارناسىنىڭ حابارلاماسىندا.
گۋربانگۋلى بەردىمۇحامەدوۆ سپورتتىڭ اسكەري قولدانبالى تۇرلەرىمەن اينالىسۋ بارلىق جەكە قۇرامعا قاجەتتى تالاپ سانالاتىنىن جانە جاۋىنگەرلىك تاپسىرمالاردى ءساتتى ورىنداۋعا كومەكتەسەتىنىن اتاپ ءوتتى.
ءداستۇر بويىنشا بەردىمۇحامەدوۆ نىساناعا قولتاڭبا قالدىردى. پرەزيدەنت قۇقىق قورعاۋ ورگاندارىنىڭ باسشىلارىنا قارۋدىڭ الۋان تۇرىنەن مەرگەندىك شەبەرلىگىن ۇدايى كورسەتىپ كەلەدى. ماسەلەن, 2019 جىلعى ماۋسىمدا وتكەن اسكەري وقۋ-جاتتىعۋلاردا تۇركىمەنستان باسشىسى ۆەلوسيپەدپەن ات ۇستىندەگى تاپانشادان نىساناعا ءدال اتۋدى كورسەتكەن ەدى.
