ءدۇبىرلى دودادا قازاقستاننىڭ نامىسىن ءۇش سپورتشى قورعايدى. ولار – كيريلل گەراسيمەنكو, اناستاسيا لاۆروۆا جانە زاۋرەش اقاشەۆا. بۇل سپورتشىلاردىڭ بارلىعى دا سان مارتە ەل بىرىنشىلىگىندە توپ جارىپ, كوپتەگەن حالىقارالىق جارىسقا قاتىسقان. ماسەلەن, الەمدىك رەيتينگتە 46-ورىندا تۇرعان 24 جاستاعى گەراسيمەنكو 2016 جىلى ريو-دە-جانەيرو جانە 2021 جىلى توكيودا الاۋى تۇتانعان وليمپيا ويىندارىندا جانە بىرنەشە الەم چەمپيوناتىندا ونەر كورسەتتى. ITTF تىزىمىندە 167-ساتىعا جايعاسقان 26 جاستاعى لاۆروۆا دا كۇنشىعىس ەلىندە وتكەن عالامدىق دودادا باق سىناعان ەدى. سول سەكىلدى ۇزدىكتەر رەيتينگىندە 170-ورىندى ەنشىلەپ وتىرعان اقاشەۆانىڭ دا قازىرگى قارقىنى جامان ەمەس.
حيۋستونداعى چەمپيوناتتا ەرلەر مەن ايەلدەردىڭ ارقايسىنان 128 سپورتشىدان باق سىنايدى. ودان بولەك, 64 جۇپتىڭ ونەرىن تاماشالايمىز. بۇل جارىس وليمپيادالىق جۇيە بويىنشا وتەدى. ياعني جەڭگەنى بىردەن كەلەسى كەزەڭگە شىعادى, ال جەڭىلگەنى سول مەزەتتە كورەرمەندەر قاتارىنا قوسىلادى.
