ەندىگى اڭگىمەنىڭ باعىت-باعدارى بەلگىلى سۋرەتشى ەۆگەني ءفريدليننىڭ «كامەنكا ءۇستىرتى» كارتيناسىنا قاراي ويىسپاق. پاۆلودارلىق قىلقالام شەبەرىنىڭ بارلىق كارتيناسى قالالاردىڭ, كوشەلەردىڭ, جەكەلەگەن عيماراتتاردىڭ, تابيعاتتىڭ جانە ادام تۇرمىسىنىڭ تاريحىنان تاعان تارتادى. ول ءوزىنىڭ كورگەن-بىلگەنىن جۇرەك كوزىنەن وتكىزۋگە شەبەر. سونىسىمەن دە ەرەكشە ىسپەتتى.
اۆتور تۋىندىلارىندا تابيعاتتىڭ رايى مەن بولمىسىن ءساتتى كورسەتە بىلەدى. ءوزى ءبىر سۇحباتىندا «الماتى مەنىڭ جۇرەگىمە وتە جاقىن, ونداعان جىل بويى ءبىزدىڭ وڭتۇستىك استانامىزدى سۇيسىنە وتىرىپ جازىپ كەلەمىن», دەپ ايتقانى بار. وعان كەرەمەت ساۋلەت ونەرى پەن قالانى قورشاپ تۇرعان تۇمسا تابيعاتتىڭ عاجايىپتارى شىنايى شابىت سىيلايتىنداي.
ەۆگەني فريدلين «كامەنكا ءۇستىرتى» كارتيناسىندا تاۋ پەيزاجى جانرىنا بەت بۇرادى. الىپ تاۋدىڭ ەتەگىندە اۋىل ورنالاسقان. ول كوك مۇنار ىشىندە كوزگە الىستان تۇسەدى. كوپقاباتتى ۇيلەردىڭ شاتىرلارى اقشا بۇلت ءتارىزدى اسپانعا ۇمسىنىپ تۇر, كورەرمەنگە اعاش بويىنا ورانعان كوشەلەردى مەڭزەيدى.
سۋرەتشى كارتينانىڭ الدىڭعى پلانىن جاسىل ءتۇستى ۇدەمەلەتە وتىرىپ, قانىق بوياۋمەن جازعان. بۋىرقانعان كوك رەڭكپەن ۇيلەردى بەينەلەي وتىرىپ, سەرپىندى تۇستىك اكتسەنت بەرەدى. ءتۇستىڭ قانىقتىعى بىرتە-بىرتە السىرەيدى دە, كورەرمەن الىستاعى ورماندى تاۋدىڭ قالاي پايدا بولعانىن كورەدى. كوگىلدىر تاۋلاردىڭ باسى بىرتىندەپ بۇلتقا ورانىپ, اعارا بەرەدى. تۋريستەردىڭ, ءتىپتى قازاقستاندىقتاردىڭ ۇنەمى تاڭدانىسىن تۋدىراتىن جازداعى قارلى الىپ شىڭدار مەن قالىڭ كوك ءشوپتىڭ قاراما-قايشىلىعىن ادەمى جەتكىزگەن. كارتينانىڭ قۇپياسى وسىندا.
قار, بوزعىلت اسپانداعى بۇلت, بۇلاردىڭ بارلىعى سالقىندىق پەن ىزعاردى, سۇتتەي پاك سۇلۋلىقتى سيپاتتاپ تۇر. تاۋلار ەشقاشان ءىش پىستىرمايدى. ولار قانداي دا ءبىر سىردى, كوزگە كورىنبەيتىن باسقا شىندىقتى جاسىرىپ تۇراتىنداي.
