– سەرىك, جۇلدە قۇتتى بولسىن! چەمپيوناتتا ساعان قانداي مىندەت جۇكتەلدى؟
– راحمەت! جارىسقا قاتىسقان سپورتشىنىڭ ءبىر عانا مىندەتى بار, ول – جەڭىسكە جەتىپ, توپ جارۋ. وكىنىشكە قاراي, فينالدا ءسۇرىندىم. التىن جۇلدە الىپ, ەلدىڭ ءانۇرانىن بەلگراد تورىندە شىرقاتا الماعانىم ءۇشىن جانكۇيەر قاۋىمنان كەشىرىم سۇرايمىن. وسىعان دا شۇكىرشىلىك ەتەمىن. ويتكەنى بۇل جۇلدەنىڭ ءوزىم تۋىپ-وسكەن ءوڭىر – پاۆلودار وبلىسى ءۇشىن ماڭىزى زور. چەمپيونات بارىسىندا قاتە-كەمشىلىكتەر كەتتى. ەندى سولارمەن جۇمىس ىستەپ, ولقىلىقتاردىڭ ورنىن تولتىرۋعا تىرىسامىز. بۇيىرتسا, كۇمىستى التىنعا اينالدىرامىن.
– فينالدا سىلبىر كورىندىڭ. جەڭىسكە جەتۋگە نە كەدەرگى بولدى؟
– اقتالعانداي بولامىن عوي. دەگەنمەن فينالعا شارشاڭقىراپ جەتكەنىم راس. ويتكەنى اقتىق جەكپە-جەككە دەيىن بەس بوكسشىمەن جۇدىرىقتاستىم. ىشىندە وسالى جوق. الدىمەن موڭعوليا وكىلى ەنح-امار حارحۋدى جەڭدىم. ول – ازيا چەمپيونى. ودان كەيىن جاپونيالىق رەيتو ءتسۋتسميدى جارىس جولىنان ىعىستىردىم. بۇل جىگىت – جاستار اراسىنداعى الەم چەمپيونى. سوسىن ۇندىستاندىق روحيت موردىڭ وسال تۇسىن تاۋىپ, شيرەك فينالدا رەسەيلىك ەدۋارد ساۆۆينمەن بوكستاستىم. جارتىلاي فينالداعى قارسىلاسىم كۋبالىق وسۆەل كابالەرو گارسيا بولدى. كۋبالىقتاردىڭ قانداي دەڭگەيدەگى بوكسشىلار ەكەنى بەلگىلى عوي. ال فينالدا اقش قۇراماسىنىڭ وكىلى دجامال حارۆيگە ەسە جىبەردىم. سوڭعى قارسىلاسىم وتە جىلدام ەكەن. كەيبىر تۇستا ونىڭ جىلدامدىعىنا ىلەسە الماي جاتتىم. باسقا دا قاتەلىكتەرگە جول بەردىم. ەندىگى ماقسات – بەلگرادتا كەتكەن ەسەنى قايتارۋ.
– جارتىلاي فينالدا كۋبالىق بوكسشىنى نوكداۋنعا جىبەرىپ, جەڭىسكە جەتتىڭ. مىقتى قارسىلاستىڭ مىسىن باسۋ قيىنعا ءتۇستى مە؟
– ارينە. قازاقستان مەن كۋبا بوكسشىلارى – رينگتەگى بىتىسپەس قارسىلاستار. سوندىقتان مۇنداي جەكپە-جەكتەردىڭ ماڭىزى زور. مەنىمەن جۇدىرىقتاسقان وسۆەل كابەلەرو گارسيا مىقتى بوكسشى. تاجىريبەسى دە تولىسقان. پانامەريكا ويىندارىنىڭ چەمپيونى دەگەن اتاعى بار. جەكپە-جەككە دەيىن ونىڭ جۇدىرىقتاسۋ مانەرىن زەرتتەدىك. بۇعان دەيىنگى كەزدەسۋلەرىنە تالداۋ جۇرگىزدىك. سونىڭ ناتيجەسىندە دىتتەگەن ماقساتىمىزعا قول جەتكىزدىك.
– توكيو وليمپياداسىندا باسقا سەرىكتى كوردىك. الەم بىرىنشىلىگىندە شارشى الاڭعا مۇلدە باسقا سەرىك شىققانداي اسەر قالدىردى. بۇل جايىندا نە ايتاسىڭ؟
– ەكەۋى دە ءىرى جارىس, بىراق اتموسفەراسى بولەك. وليمپيادادا جىبەرگەن كەمشىلىكتەردى الەم چەمپيوناتىندا قايتالاماۋعا تىرىستىق. قاتەمەن جۇمىس جۇرگىزدىك. سونىڭ ناتيجەسى بولار, بالكىم.
– جوعارىدا بۇل جۇلدەنىڭ پاۆلودار ءوڭىرى ءۇشىن ماڭىزى زور دەپ قالدىڭ. نەگە؟
– ويتكەنى بۇل – الەم چەمپيوناتتارىنان پاۆلودارلىق بوكسشىلارعا بۇيىرعان العاشقى مەدال. جالپى, مەن تاۋەلسىزدىك العالى بەرى الەم چەمپيوناتىنا قاتىسقان ەكىنشى پاۆلودارلىق ەكەنمىن. بۇعان دەيىن نيكولاي كۋلپين 1993 جىلعى بىرىنشىلىكتە +91 كيلودا جۇدىرىقتاسىپ, ¼ فينالعا دەيىن جەتىپتى. ول كىسىنى كورگەن جوقپىز. 2003 جىلى قايتىس بولىپ كەتىپتى. مىنە, سودان بەرى 28 جىل وتكەندە, تاۋەلسىزدىكتىڭ 30 جىلدىعىندا وسىنداي تاريحي جەتىستىككە قول جەتكىزگەنىمە قۋانىشتىمىن. جەكە باپكەرىم ازامات ماقاجانوۆقا ايتار العىسىم شەكسىز. ونىڭ دا الەم چەمپيونى ەكەنىن جاقسى بىلەسىزدەر. اسكەريلەر اراسىندا توپ جارعان. باپكەرىمنىڭ سول ءبىر جەڭىستى جولىن بەلگرادتا جالعاستىرۋدى كوزدەپ ەدىم. رەتى كەلمەدى. الدا ءالى تالاي جارىس بار. چەمپيون تۇعىرىندا تۇراتىن ءسات تۋارىنا سەنەمىن.
– سەنىمىڭ اقتالسىن!
اڭگىمەلەسكەن
فارحات قايرات ۇلى,
«Egemen Qazaqstan»
