كىتاپ تانىستىرىلىمىنىڭ الماتىداعى ۇلتتىق كىتاپحانادا ۇيىمداستىرىلۋىنىڭ ءمانى بار. ادەبيەتسۇيەر قاۋىمعا ەسىمى ەتەنە تانىس قالامگەردىڭ ءومىرى مەن شىعارماشىلىعىنا قىسقاشا شولۋ جاساعان كىتاپحانا ديرەكتورى باقىتجامال قايىربەكقىزىنىڭ ايتۋىنشا, ءبىرتۋار جازۋشىنىڭ ءومىرى كىتاپ جانە كىتاپحانا جۇمىسىمەن تىعىز بايلانىستى. ول ەلىمىزدەگى كىتاپحانانى زامانعا ساي جابدىقتاپ, وقىرماننىڭ كىتاپقا قىزىعۋشىلىعىن ارتتىرۋعا, كىتاپ مادەنيەتىن كوتەرۋگە ىقپال ەتەتىن تەتىكتەرىن قاراستىرىپ, كىتاپحانا سالاسىنىڭ دامۋىنا ءوز ۇلەسىن قوسىپ, ۇلتتىق اكادەميالىق كىتاپحانانى باسقاردى. كىتاپتى ولشەۋسىز سۇيگەن قالامگەرگە ارناپ ۇلتتىق كىتاپحانا ء«بىرتۋار ەدى...» اتتى كورمە ۇيىمداستىرىپ, وقىرمانعا جازۋشى جايلى مول ماتەريال دەرەكتەرىن ۇسىندى. جازۋشىنىڭ بيوبيبليوگرافياسى جىلدان-جىلعا تولىعىپ كەلەدى. ۇلتتىق كىتاپحانانىڭ دەرەكقورىندا ر.وتارباەۆقا بايلانىستى 539 مالىمەت جيناقتالعان. بۇل باعىتتا بيوبيبليوگرافتار ءالى دە ىزدەنىس جۇمىسىن جالعاستىرا بەرەدى.
شارانىڭ مودەراتورى, «انا ءتىلى» گازەتىنىڭ باس رەداكتورى, قازاقستان پرەزيدەنتى سىيلىعىنىڭ لاۋرەاتى قالي سارسەنباي بيوبيبليوگرافيالىق كورسەتكىشتىڭ ماڭىزىنا توقتالدى. ادام جانىنىڭ كوز جەتپەس كوكجيەگىنىڭ جيھانگەرى بولۋدى جاس كۇنىنەن مۇرات ەتكەن ر.وتارباەۆتىڭ ادەبيەتكە الىپ كەلگەن العاشقى تىرناقالدى اڭگىمەسىنەن باستاپ كەمەلدەنگەن شاعىنداعى سوڭعى تۋىندىسىنا دەيىن تاۋىپ, شىعارماشىلىق مۇراسىن تۇگەندەپ, باي قازىناسىن تولىقتىرىپ, جيناقتاپ, رۋحاني اينالىمعا ەندىرۋ – ۇزاق ۋاقىتتان بەرگى قاجىرلى ەڭبەك جەمىسى.
ر.وتارباەۆتىڭ ەسىمى دراماتۋرگيا جانرىندا دا ءجيى جولىعادى. قالامگەردىڭ ءونىمدى ەڭبەك ەتكەن سالاسى وسى – دراماتۋرگيا. 2019 جىلى قۇرىلىپ, قىسقا مەرزىم ىشىندە اۆتوردىڭ ادەبي كەڭىستىگىنە تۇتاس شولۋ جاساپ, سوڭىندا قالعان مول ادەبي مۇراسىنىڭ جوقتاۋشىسى بولىپ وتىرعان «راحىمجان وتارباەۆ رۋحانيات قورى» بۇگىندە كوپتەگەن يگى ءىستىڭ باستاماشىسىنا اينالىپ ۇلگەردى. وسى ۋاقىتقا دەيىن اتقارىلعان شارۋانى ماحامبەت اتىنداعى اتىراۋ وبلىستىق اكادەميالىق دراما تەاترىنىڭ ديرەكتورى بەرىك جامەنوۆ ەرەكشە اتاپ ءوتتى. «قازاقستاندا ەلۋدەن استام تەاتر بار دەسەك, سولاردىڭ ىشىندە ر.وتارباەۆ پەسالارى قويىلماي قالعان تەاتر جوق دەۋگە بولادى. ول كىسىنىڭ دراماتۋرگياسى رەجيسسەرمەن ءتىل تابىسىپ تۇرعانداي جازىلاتىن ەرەكشەلىككە يە. ر.وتارباەۆ اتىنداعى حالىقارالىق تەاتر فەستيۆالى ءداستۇرلى ساباقتاستىعىن ۇزبەي كەلەدى. دراماتۋرگتىڭ پەسالارى رەسەي, قىرعىزستان, وزبەكستان تەاترلارىنىڭ ساحنالارىندا دا قويىلىپ جاتىر. وسى اتقارىلىپ جاتقان يگىلىكتى ءىستىڭ ءبارىنىڭ باسى-قاسىندا ر.وتارباەۆتىڭ رۋحانيات قورى ءجۇر», دەدى تەاتر ديرەكتورى.
تەاترعا كەرەك تاقىرىپتى ىشكى تۇيسىگىمەن سەزىپ, كەسەك دۇنيەلەر جازعان قالامگەر مىسىرعا كەتىپ, ەلىن اڭساۋمەن وتكەن بەيبارىستان باستاپ, جاڭگىر حان, امىرە, مۇقاعالي, فاريزا سەكىلدى ءبىر شوعىر تاريحي تۇلعالاردىڭ بەينەسىن جاساپ, ولاردىڭ كوركەم وبرازىن كورەرمەنمەن قاۋىشتىردى.
«ومىردە راحاڭ كەزدەسكەن ادامىنا دوس قۇشاعىن كەڭ اشقان باۋىرمال, اشىق-شاشىق, اقجۇرەك ادام بولسا, شىعارماشىلىعى دا ءوزىنىڭ بۋىرقانعان مىنەزى سياقتى ەدى, جازاتىن دا تاستاپ جۇرە بەرەتىن. بالكىم ماعان سەنگەنى بولار, مۇمكىن بالالارىنا ارقا سۇيەگەنى شىعار, قاعازعا ۇقىپتىلىعى جوق ەدى. الايدا سوڭىندا ىزدەيتىن وقىرمانىنىڭ كوپ ەكەنىنە كوزىم جەتتى. سول سەبەپتى جازعان دۇنيەلەرىن جيناقتاپ, بيوبيبليوگرافيالىق كورسەتكىش قۇرالى ەتىپ قۇراستىرۋدى ءجون كوردىك», دەدى جازۋشىنىڭ جارى ساۋلە وتارباەۆا.
راحىمجان وتارباەۆتىڭ اڭگىمەلەرى مەن پوۆەستەرى, روماندارى مەن پەسالارى قىرىق جىل بويى قازاق وقىرمانىنا رۋحاني ازىق بولىپ كەلەدى. جارىق كورىپ وتىرعان جاڭا بيوبيبليوگرافيالىق كورسەتكىش تە كەيىنگى ۇرپاقتىڭ سۇيىكتى جازۋشىسىن تانىپ-بىلۋىنە قىزمەت ەتەتىن جاردەمشى قۇرال بولماق. قالامگەردىڭ شىعارمالارى قاي كەزەڭدە دە, قاي كەڭىستىكتە دە ءوز وقىرمانىمەن ۇندەسىپ بىرگە جاساي بەرەدى.
الماتى
