سەميناردى ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ قىزمەتىن قولداۋ جونىندەگى جوبالىق كەڭسە مەن اقتوبە وبلىسىنىڭ اكىمدىگى ۇيىمداستىردى. وعان رەسپۋبليكانىڭ بارلىق وبلىسىنان وڭىرلىك كوميسسيالار جۇمىس توپتارىنىڭ وكىلدەرى, مەملەكەتتىك قىزمەتكەرلەر, عالىمدار, قوعام قايراتكەرلەرى, ماماندار, ەرىكتىلەر قاتىستى.
سەميناردىڭ ماقساتى – وڭىرلىك كوميسسيالاردىڭ مامانداندىرىلعان جۇمىس توپتارىنىڭ سەميناردا تالقىلانعان تاقىرىپ بويىنشا اتقارعان جۇمىستارى تۋرالى ەسەبىن تىڭداۋ, جۇرگىزىلىپ جاتقان عىلىمي زەرتتەۋلەر بويىنشا تاجىريبە الماسۋ, وڭىرلىك كوميسسيالاردىڭ عىلىمي-زەرتتەۋ جۇمىسىن جەتىلدىرۋ جولدارىن قاراستىرۋ جانە ولاردىڭ مەملەكەتتىك كوميسسيانىڭ جۇمىس توپتارىمەن ءوزارا ارەكەتتەستىگىن دامىتۋ.
ساياسي قۋعىن-سۇرگىن قۇرباندارىن تولىق اقتاۋ جونىندەگى وبلىستىق كوميسسيانىڭ ءتورايىمى, اقتوبە وبلىسى اكىمىنىڭ ورىنباسارى بۇلبۇل ەلەۋسىنوۆا كىرىسپە ءسوز سويلەدى. ول سەمينار تاقىرىبى بويىنشا وبلىستا اتقارىلىپ جاتقان جۇمىستار جونىندە اقپارات بەردى.
جيىن بارىسىندا ءسوز العان ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ قىزمەتىن قولداۋ جونىندەگى جوبالىق كەڭسە باسشىسى سابىر قاسىموۆ قازاقستان تاۋەلسىزدىك العان 30 جىل ىشىندە قازاقستاننىڭ بوستاندىعى مەن تاۋەلسىزدىگى, اۋماقتىق تۇتاستىعى ءۇشىن كۇرەسكەندەردى تولىق قۇقىقتىق جانە ساياسي وڭالتۋ تۋرالى ارنايى مەملەكەتتىك اكت قابىلداماعانىن اتاپ ءوتتى.
قازاقستان رەسپۋبليكاسىنىڭ 1993 جىلعى 14 ساۋىردەگى «جاپپاي ساياسي قۋعىن-سۇرگiندەر قۇرباندارىن اقتاۋ تۋرالى» زاڭىندا قۋعىن-سۇرگىن قۇرباندارىنىڭ بۇل ساناتى مۇلدە اتالماعان. دەگەنمەن بۇل قۋعىن-سۇرگىن ۋاقىتى جاعىنان ەڭ ۇزاق, ەڭ جۇيەلى, ەڭ جاسىرىن جۇزەگە اسىرىلعان. وتكەن ۋاقىت مەرزىمىنە قاراماستان, قازاقستاننىڭ بوستاندىعى مەن تاۋەلسىزدىگى ءۇشىن كۇرەسىپ قۋعىن-سۇرگىنگە ۇشىراعان حالىق, ساۋاتتى تۇردە كۇرەسە بىلگەن ساياسي جانە قوعامدىق ۇيىمدار, قوعامدىق-ساياسي, رۋحاني, قىزمەتتىك, عىلىمي, مادەني جانە شىعارماشىلىق سالالاردا قۋعىن-سۇرگىنگە ۇشىراعان تۇلعالار اقتالۋعا ءتيىس.
وسىعان بايلانىستى جۇمىس توبى جان-جاقتى تەكسەرۋ جۇرگىزىپ جاتىر. اتالعان ساناتتاعى بارلىق زارداپ شەككەندەردى تولىق ساياسي-قۇقىقتىق اقتاۋ جونىندەگى مەملەكەتتىك كوميسسيانىڭ وتىرىسىندا بىرقاتار ۇسىنىس ەنگىزبەك.
ماسەلەن, قازاقستاندا كەڭەس وكىمەتىن كۇشتەپ ورناتۋعا قارسى كۇرەسكەندەردەن باستاپ, قازاقستاننىڭ ازاتتىعى مەن تاۋەلسىزدىگى جولىنداعى ۇلت-ازاتتىق كۇرەسكە قاتىسۋشىلار وسى ساناتقا ەنبەك. سونداي-اق كوپ ادام شىعىنىن اكەلگەن اعايىندىق ازامات سوعىسى مەن تاپتىق قارسىلىقتى جاساندى تۇردە ەنگىزۋگە قارسى كۇرەسكەندەر دە تىزىمگە الىنادى.
ايماقتىق قوزعالىستاردىڭ كوشباسشىلارى جانە الاش پارتياسىنىڭ بەلسەندىلەرى, الاشوردا ۇكىمەتىنىڭ, الاش اسكەري قۇرامالارىنىڭ مۇشەلەرى, سونداي-اق ولارعا ۇيىمداستىرۋشىلىق, قارجىلىق جانە ماتەريالدىق كومەك كورسەتكەن تۇلعالار دا وسى ساناتقا قوسىلماق.
س.قاسىموۆ قازاقستاننىڭ مۇددەسى, بوستاندىعى مەن تاۋەلسىزدىگى ءۇشىن تەك قازاقتار عانا ەمەس, وسى كۇرەسكە قارۋلى قاقتىعىستارعا دا جانە ساياسي-يدەولوگيالىق مايدانعا دا شىن جۇرەكتەن قاتىسقان جۇزدەگەن, مىڭداعان ورىس, وزبەك, ەۆرەي, ۋكراين, قىرعىز جانە باسقا دا حالىقتاردىڭ وكىلدەرى رەپرەسسياعا ۇشىراعانىن ءسوز ەتتى. بىراق ولار تۋرالى بىلەتىن ادامدار سانى وتە از. سوندىقتان ولاردىڭ ەرلىگىن جاڭعىرتۋ, ەسىمدەرىن قازاقستاندا ماڭگىلىككە قالدىرۋ وتە ماڭىزدى جانە بىزگە مىندەت ەكەندىگىنە دە باسا نازار اۋداردى. ء«بىز قازاق حالقىنىڭ ۇلتتىق مۇددەلەرى مەن قۇقىقتارىن قورعاعان نەمەسە ازاتتىق, تاۋەلسىزدىك ءۇشىن كۇرەسكە شاقىرعان عالىمداردىڭ, زەرتتەۋشىلەردىڭ, جازۋشىلاردىڭ, ونەر قايراتكەرلەرىنىڭ, رەجيسسەرلەردىڭ ەڭبەكتەرى مەن تاعدىرلارىن زەرتتەپ جاتىرمىز جانە ساياسي-قۇقىقتىق اقتاۋعا ۇسىناتىن بولامىز جانە ولار جوعارىدا اتالعان قىزمەتتەرى ءۇشىن قۋعىن-سۇرگىننىڭ ءارتۇرلى فورمالارىنا ۇشىراعان», دەدى س.قاسىموۆ.
جيىن بارىسىندا مەملەكەتتىك كوميسسيانىڭ جۇمىس توبى تاۋەلسىزدىكتىڭ 30 جىلدىعىنا وراي قازاقستاننىڭ تاۋەلسىزدىگى مەن اۋماقتىق تۇتاستىعى ءۇشىن كۇرەسكەندەردىڭ ەرلىگىن كوپەتنوستى حالقىمىزدىڭ ەڭ جوعارى ۇلتتىق مۇراسى دەپ تانۋدى ۇسىندى.
ەلىمىزدىڭ بارلىق 17 ايماعىنىڭ وكىلدەرى – وڭىرلىك كوميسسيالاردىڭ جۇمىس توپتارىنىڭ باسشىلارى مەن مۇشەلەرى دە بايانداماشىلار رەتىندە ءوز ويلارىن ءبىلدىردى.
