2021 جىلى 1 شىلدەدە قابىلدانعان اكىمشىلىك راسىمدىك-پروتسەستىك كودەكستە سوت جۇيەسىنە بىرقاتار جاڭاشىلدىق ەنگىزىلگەن ەدى.
«اكىمشىلىك پروتسەستەگى ماڭىزدى ينستيتۋت – اقشالاي ءوندىرىپ الۋ بولىپ وتىر. بۇل – بۇرىنعى زاڭنامادا بولماعان جاڭا قۇرال. اكىمشىلىك كودەكس ەنگىزىلگەنگە دەيىن سوتتار ءىستى قاراۋ بارىسىندا قۇقىقبۇزۋشىلارعا تەك ەسكەرتۋ عانا جاساي الاتىن. ەندى سۋديانىڭ قولىندا اقشالاي ءوندىرىپ الۋ سياقتى قۇرال بار. بۇل قۇرال پروتسەسكە قاتىسۋشىلاردى, ونىڭ ىشىندە مەملەكەتتىك ورگانداردى دا تارتىپكە كەلتىرۋگە ىقپال ەتەدى», دەدى قانات مۋسين ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا.
ونىڭ ايتۋىنشا, ءتورت ايدىڭ ىشىندە سۋديالار 175 اقشالاي ايىپپۇل سالعان. جالپى ايىپپۇل كولەمى 6 ملن تەڭگەنى قۇراسا, ونىڭ شامامەن 5 ملن تەڭگەسى بيۋدجەتكە ءتۇسىپ ۇلگەردى.
«اقشالاي ءوندىرىپ الۋ تۋرالى سوت شەشىمىنە شاعىمدانۋعا بولادى, بىراق الدىمەن بۇل ايىپپۇل تولەنۋى كەرەك. سوندىقتان قازىر جاۋاپكەرلەر مەن مەملەكەتتىك ورگاندار اناعۇرلىم ءتارتىپتى بولا باستادى. ويتكەنى اقشالاي ءوندىرىپ الۋ سوماسى 10 اەك-تەن باستالىپ, 100 اەك-كە دەيىن جەتەدى. بۇل ايتارلىقتاي قوماقتى اقشا», دەيدى قانات مۋسين.
سونىمەن بىرگە سپيكەر اقشالاي ءوندىرىپ الۋ جاۋاپكەرشىلىگى كىمدەرگە سالىنعانىن ايتىپ بەردى.
«140 اقشالاي ايىپپۇل جاۋاپكەردىڭ تاراپىنا سالىندى. ادەتتە, بۇل اكىمشىلىك ورگاندار نەمەسە جەكە سوت ورىنداۋشىلارى. مىسالى, مەملەكەتتىك ورگاندار مەن جەرگىلىكتى اتقارۋشى ورگانداردىڭ قىزمەتكەرلەرىنە جالپى 97 اقشالاي جازا قولدانىلدى. ونىڭ ىشىندە مينيسترلىكتەردىڭ ءبىرىنىڭ كوميتەت توراعاسى, ىشكى مەملەكەتتىك اۋديت دەپارتامەنتىنىڭ, مەملەكەتتىك كىرىستەر دەپارتامەنتىنىڭ, پوليتسيا دەپارتامەنتىنىڭ باسشىسى سياقتى شەنەۋنىكتەر بار. ياعني, مۇندا قاراپايىم قىزمەتكەر جوق. اكىمدىك قىزمەتكەرلەرىنە 58 اقشالاي ايىپپۇل سالىندى, ونىڭ ىشىندە 6 قالا اكىمى, بەس اۋدان اكىمى جانە ءۇش اپپارات باسشىسى بار», دەدى قانات مۋسين.
