قازان ايىنا جوسپارلانعان سىرت ايدىنداعى سوڭعى ەكى ويىنىن جەڭىسپەن اياقتاپ, ءتاۋىر ويىن كورسەتە باستاعان «بارىس» قايتا ساتسىزدىككە ۇشىرادى. ءوز ايدىنىندا «يوكەريت» كلۋبىن قابىلداعان جەرلەستەرىمىز قارسىلاستارىنا 1:4 ەسەبىمەن جول بەردى. ءبىرىنشى كەزەڭ تەڭ دارەجەدە وتسە دە, كەزەڭ اياقتالار تۇستا ەپتىلىك تانىتقان قوناقتار يوني ورتيو قورعاعان قاقپاعا جاۋاپسىز ەكى شايبا سوعىپ كەتتى. كەزدەسۋدىڭ 16-مينۋتىندا كاللە كوسيلا ەسەپ اشسا, 19-مينۋتتا نيكلاس ەنسەن مەرگەندىك تانىتتى.
ويىننىڭ ەكىنشى كەزەڭى دە فينليانديالىق حوككەيشىلەردىڭ باسىمدىعىمەن ءوتتى. 29-مينۋتتا نيكلاس ەنسەن تاعى دا مەرگەندىگىمەن كوزگە ءتۇسىپ, ءدۋبلدىڭ اۆتورى اتاندى. ءۇشىنشى كەزەڭنىڭ باسىندا قارسىلاس ويىنشىسى مۇزايدىننان ەكى مينۋتقا قۋىلىپ, سان باسىمدىعىنا يە بولعان «بارىس» 42-مينۋتتا ەسەپ ايىرماسىن قىسقارتتى. گولدىڭ اۆتورى – نيكيتا ميحايليس. دەگەنمەن ماتچ سوڭىنا دەيىن ايدىن يەلەرىنىڭ تارازى باسىن تەڭەستىرۋگە شامالارى جەتپەدى. كەزدەسۋدىڭ اياقتالۋىنا 30 سەكۋند قالعاندا «يوكەريت» ويىنشىسى ماركو انتيللا بوس قاقپاعا گول سالىپ, ويىننىڭ نۇكتەسىن قويدى – 1:4.
