مۋلتيسپيرالدى كومپيۋتەرلىك توموگرافيا – ادام دەنەسىنىڭ ىشكى مۇشەلەرىنىڭ كۇيى تۋرالى تەز اقپارات الۋعا مۇمكىندىك بەرەتىن زاماناۋي جانە ءدال دياگنوستيكالىق ءادىس. ورناتىلعان جابدىقتىڭ ارتىقشىلىعى – ونى پايدالانۋ كەزىندە پاتسيەنتتەر مەن قىزمەتكەرلەرگە رادياتسيالىق جۇكتەمە ازايادى. سايكەسىنشە زەرتتەۋ ۋاقىتى قىسقارادى جانە اپپاراتتىڭ وتكىزۋ قابىلەتى ارتادى.
«قازىر ءبىزدىڭ دەنساۋلىق ساقتاۋ سالاسى مەديتسينالىق كومەك كورسەتۋ ساپاسىن ارتتىرا وتىرىپ, پاتسيەنتكە باعدارلانعان قاعيداتقا دەن قويىپ جاتىر. دياگنوستيكادان ءوتۋ, مامانداردىڭ ۇسىنىستارى مەن قورىتىندىلارىن ءبىر جەردە الۋ وتە ىڭعايلى. مۇنداي ىڭعايلىلىق پاتسيەنت ءۇشىن دە, دارىگەرلەر ءۇشىن دە قاراستىرىلعان. جاڭا قۇرىلعى كەۋدە قۋىسىنىڭ اۋرۋلارىن ەرتە كەزەڭدە دياگنوستيكالاۋعا مۇمكىندىك بەرەدى. ونىڭ ۇستىنە قازىرگى پاندەميا جاعدايىندا ازاماتتاردىڭ دەنساۋلىعىن ۇدايى باقىلاۋ جانە قولداۋ ماڭىزدى», دەدى قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ.
وسى ورايدا قازان ايىنىڭ باسىندا №4 قالالىق ەمحانادا انگيوگرافيامەن كومپيۋتەرلىك توموگرافيانىڭ جاڭا اپپاراتى ورناتىلعانىن دا ايتا كەتكەن ءجون. كارديوپاكەتى بار زاماناۋي جابدىق جۇرەك-قانتامىر جۇيەسىنە تولىق دياگنوستيكا جۇرگىزەدى. 2020 جىلى وسىنداي ەكى اپپارات ەلوردالىق مەديتسينالىق ۇيىمدارعا جەتكىزىلدى.
بۇرىن حالىقتى دياگنوستيكالىق قىزمەتتەرمەن قامتۋ ءۇشىن فليۋوروگرافيالىق تەكسەرۋ بويىنشا 2 تسيفرلى جىلجىمالى كەشەن, 6 رەنتگەن-اپپارات, 2كت ساتىپ الىندى.
