جاستارعا بەرىلگەن ۇلكەن مۇمكىندىك
اتاپ ايتقاندا, Astana Hub, «ترانستەلەكوم» اق جانە Plug and Play IT ەكوجۇيەنى دامىتۋ, ينۆەستيتسيا تارتۋ, اكسەلەراتسيا باعدارلامالارىن قۇرىپ ىسكە اسىرۋ, سونداي-اق دارىندى جاستاردى وقىتىپ, قارىم-قاتىناستى نىعايتۋعا نيەتتى.
«بۇگىنگى قوعام ەكونوميكالىق دامۋدىڭ فاكتورى رەتىندە ستارتاپ ەكوجۇيەسىن دامىتۋدىڭ ماڭىزدىلىعىن مويىندايدى. كومپانيالارىمىز بەن قوعامداستىقتىڭ مۇددەسى ءۇشىن ۇزاق مەرزىمدى جانە ءتيىمدى ىنتىماقتاستىقتىڭ قاجەت ەكەنىنە سەنىمدىمىز. بۇل قازاقستانداعى ستارتاپ ەكوجۇيەسىن دامىتۋعا سەپتىگىن تيگىزەدى دەگەن ۇمىتتەمىز», دەدى Plug and Play كومپانياسىنىڭ وكىلى سانجار تارومي.
وسى ىنتىماقتاستىق ارقىلى Astana Hub جانە «ترانستەلەكوم» اق Plug and Play كومپانياسىنىڭ ەلىمىزدەگى وكىلدىگىنىڭ قولداۋىمەن كورپوراتيۆتىك اكسەلەراتوردى ىسكە قوسۋعا مۇمكىندىك الدى. وسىلايشا, 20 IT ستارتاپشى كرەمني القابىنىڭ ساراپشىلارىنان ءتالىم الىپ, ينۆەستيتسيا تارتۋعا, سونداي-اق ءىرى كورپوراتسيامەن قاناتقاقتى جوبانى ىسكە قوسۋ ارقىلى Playbook Plug and Play پلاتفورماسىندا ورنالاسۋىنا جول اشىلادى. بۇل اكسەلەراتورعا الەمنىڭ وزگە ەلدەرىنەن IT كوماندالار قاتىساتىنىن ەسكەرسەك, قازاقستاندىق كومپانيالارعا ولارمەن دە ءوزارا جۇمىس ىستەۋگە تۋرا كەلەدى.
«كەز كەلگەن ستارتاپتىڭ نەگىزگى ماقساتتارىنىڭ ءبىرى – نارىقتا قالىپ, ونىمگە دەگەن سۇرانىستى ارتتىرۋ. وزگەلەردىڭ كولەڭكەسىندە قالماي Google, PayPal نەمەسە Dropbox سياقتى اڭىزعا اينالۋدىڭ جولى قانداي؟ بۇل سۇراققا وسى كومپانيالاردىڭ ءساتتى شىعۋىنا ىقپال ەتكەن Plug and Play-دان باسقا ەشكىم جاۋاپ بەرە المايدى. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ قولداۋىمەن «ترانستەلەكوم» اق جانە Plug and Play Kazakhstan-نىڭ ىنتىماقتاستىعى ارقىلى جاس IT كومپانيالاردىڭ الەۋەتىن ارتتىرۋدى جالعاستىرامىز», دەدى Astana Hub-تىڭ باس ديرەكتورى ماعجان ماديەۆ.
ءسوز ورايى كەلگەندە ايتا كەتەيىك, Plug and Play Tech Center – شتاب-پاتەرى كرەمني القابىندا ورنالاسقان الەمدەگى ەڭ ءىرى اكسەلەراتور جانە ينۆەستور. ولاردىڭ پلاتفورماسى 40 مىڭنان ارتىق ستارتاپتى, 500-دەن اسا الەمدەگى جەتەكشى كورپوراتسيانى, ونىڭ ىشىندە ۋنيۆەرسيتەتتەر مەن مەملەكەتتىك مەكەمەلەردى, سول سەكىلدى 300-دەن استام ۆەنچۋرلىق قوردى, بىرىكتىرەدى. جىل سايىن Plug and Play الەم بويىنشا ستارتاپتارعا 25 مىڭ دوللاردان 500 مىڭ دوللارعا دەيىن ينۆەستيتسيا بولەدى.
ەلەكتروندى ۇكىمەت رەيتينگىندە ۇزدىكتەر قاتارىندا
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ ايتۋىنشا, ەلىمىزدىڭ ەلەكتروندى ۇكىمەتتى دامىتۋدا جانە تسيفرلى قىزمەتتەردى ۇسىنۋدا ايتارلىقتاي ناتيجەلەرى بار. ايتسە دە بۇل باعىتتا اتقارىلۋى ءتيىس شارۋا ءالى شاش ەتەكتەن, دەدى ۆەدومستۆو باسشىسى.
«ەلىمىزدەگى IT-يندۋستريا مەن تسيفرلاندىرۋ جۇمىسى مەملەكەت پەن IT-قوعامداستىقتىڭ قارقىندى بايلانىسى ەسەبىنەن جولعا قويىلدى. بۇگىندە حالىقارالىق رەيتينگتەردە جەتكەن جەتىستىگىمىز از ەمەس. مىسالى, بۇۇ-نىڭ ەلەكتروندى ۇكىمەتتى دامىتۋعا بايلانىستى كورسەتكىشىندە 9-ورىندا كەلەمىز. وسى رەيتينگتىڭ قوسالقى رەيتينگىندە «ونلاين قىزمەتتەر» سۋبيندەكسى جاعىنان الەمدە 11-ساتىدا تۇرمىز. بىراق وسىمەن توقتاپ قالۋعا بولمايتىنىن جاقسى تۇسىنەمىز.
تاياۋدا پرەزيدەنتكە اۆتوتىركەۋدەن 5 مينۋت ىشىندە وتۋگە بولاتىنىن كورسەتكەن ەدىك. مەنىڭ ويىمشا, الەمدەگى كەيبىر مەملەكەتتەردە مۇنداي قىزمەت ءالى كۇنگە دەيىن جوق. نەگە دەسەڭىز, بانك قوسىمشاسىنان شىقپاي-اق ساتۋشى مەن ساتىپ الۋشى 4-5 تۇيمەنى باسۋ ارقىلى كولىكتى قايتا راسىمدەپ, ساتۋ مامىلەسىن جاساي الادى. بۇل ايتارلىقتاي كورسەتكىش. بىلتىرعى قىركۇيەك ايىمەن سالىستىرعاندا بيىل ساتىپ الۋشىلاردىڭ 35%-دان استامى اۆتوكولىكتى ساتىپ الۋ ءراسىمىن ونلاين-فورماتتا ىسكە اسىردى. دەمەك بۇل كليەنتكە باعدارلانعان حالىقتىق قىزمەت ءتۇرىن جاساي العانىمىزدى اڭعارتادى. وسى جۇمىستى ادامداردىڭ اتالعان قىزمەتتى سانالى تۇردە تاڭدايتىنداي ەتىپ اتقاردىق», دەدى ب.مۋسين.
IT قىزمەتىنىڭ ەكسپورتى ۇلعايۋدا
Astana Hub-تىڭ باس ديرەكتورى ماعجان ماديەۆ ايتقانداي, بۇگىندە اتالعان تەحنوپاركتە 558 IT كومپانيا تىركەلگەن. ولاردىڭ 3 جىل ىشىندەگى جيىنتىق كىرىسى 166 ملرد تەڭگەنى قۇرادى. جىل سوڭىنا دەيىن تەحنوپارك قاتىسۋشىلارىنىڭ ەكسپورتىن 50 ملرد تەڭگەگە دەيىن جەتكىزۋ جوسپارلانعان. دەسە دە بۇل پاركتىڭ قاتىسۋشىسىنا اينالۋ وڭاي ەمەس, دەيدى م.ماديەۆ.
«بىرىنشىدەن, كومپانيانىڭ قىزمەتى IT نارىعىنا باعىتتالعان بولۋى ءتيىس. دەمەك تابىسىنىڭ 100%-ى وسى سالادان ءتۇسۋى قاجەت. ەكىنشىدەن, كومپانيانىڭ فيليالدىق جەلىسى بولماۋى كەرەك. ياعني ءىرى فيرما ەمەس, ستارتاپ بولعانى ابزال. ۇشىنشىدەن, تەحنوپاركتىڭ قاتىسۋشىسى كىرىسىنىڭ 1%-ىن Astana Hub-تىڭ پايداسىنا سالۋعا مىندەتتەلەدى. بۇل قاراجاتتى ەكوجۇيەنىڭ دامۋىنا جۇمساپ, قايتا ينۆەستيتسيالاۋعا جىبەرىلەدى», دەدى Astana Hub-تىڭ باس ديرەكتورى.
قازىر Seed Money باعدارلاماسى اياسىندا تەحنوپارك 35 ستارتاپتى ىرىكتەپ, ولارعا 5-20 ملن تەڭگەگە دەيىنگى كولەمدە قارجىلىق كومەك كورسەتىلەتىن بولادى.
Digital Bridge فورۋمىندا Astana Hub ۇيىمداستىرعان بايقاۋدا توپ جارعاندار انىقتالدى. ماسەلەن, Parqour, Kids Security, SipSim, FlowSell.me جانە Oqylyq.kz ستارتاپتارىنا بيزنەستى دامىتۋعا 20 ملن تەڭگەدەن بەرىلدى.
