ول العاشقى اينالىمدا الەمنىڭ 24-راكەتكاسى, ۇلىبريتانيالىق دەنيەل ەۆانسپەن كۇش سىناستى. ءبىرىنشى پارتيادا قازاقستاندىق تەننيسشى جەڭىلدى – 2:6. ەسەسىنە ەكىنشى سەتتە كۇش الىپ, قارسىلاسىنان 7:5 ەسەبىمەن باسىم ءتۇستى. ال شەشۋشى ءۇشىنشى پارتيادا ەسەپ 4:4 بولعان مەزەتتە قازاقستاندىق سپورتشى برەيك جاسادى. ايتسە دە ويىنعا دوپ قوسۋ ساتىندە ءجيى قاتەلەسىپ, قارسىلاسى تارازى باسىن تەڭەستىرىپ كەتتى. دەگەنمەن, ا.بۋبليك ەكىنشى مۇمكىندىگىن ءمۇلت جىبەرمەي, تاعى دا 7:5 ناتيجەسىمەن جەڭىستى ج ۇلىپ اكەتتى.
تارتىستى وتكەن ماتچ 2 ساعات 15 مينۋتقا سوزىلدى. باسەكە بارىسىندا ا.بۋبليك 24 ەيس جاساپ, 5 برەيك-پوينتتىڭ ۇشەۋىن پايدالاندى. قارسىلاسى 3 ەيس, 3 برەيككە (12 برەيك-پوينت) قول جەتكىزدى. وسىلايشا قازاقستان وكىلى ءوزىنىڭ سپورتتىق جولىندا العاش رەت پاريج ماستەرس ءتۋرنيرىنىڭ ەكىنشى اينالىمىنا شىقتى. ەندى ول جۇلدە قورى 2,6 ملن ەۋرودان اساتىن جارىستى جالعاستىرۋ ءۇشىن الەمنىڭ سەگىزىنشى, وسى دودانىڭ 6-راكەتكاسى نورۆەگيالىق كاسپەر رۋدپەن كۇش سىناسادى.
