شيرەك فينال جولداماسىنا تالاسقان التى بوكسشىمىزدىڭ جەڭىستى جولىن 57 كيلو سالماقتاعى سەرىك تەمىرجانوۆ باستاپ بەردى. 2016 جىلى پاۆلوداردا وتكەن جاستار اراسىنداعى ازيا چەمپيوناتىندا توپ جارعان ول ءۇش جارىم جىلدىڭ ىشىندە ەرەسەكتەر اراسىنداعى دودالاردا دا ءوزىن جاقسى قىرىنان كورسەتە باستادى. 2018 جىلى قازاقستان چەمپيوناتىنىڭ كۇمىس مەدالىن, 2019 جىلى ماجارستاندا وتكەن حالىقارالىق ءتۋرنيردىڭ باس جۇلدەسىن يەلەنگەن جەرلەسىمىز بيىل توكيو وليمپياداسىندا ونەر كورسەتتى. وكىنىشكە قاراي, ەكىنشى اينالىمدا الەم بىرىنشىلىگىنىڭ كۇمىس جۇلدەگەرى امەريكالىق بوكسشىعا ەسە جىبەرگەن ەدى. ەندى, مىنە, سەربياداعى الەمدىك سايىستا باق سىناپ, ءتۋرنيردىڭ شيرەك فينالىنا دەيىن جەتىپ وتىر. 23 جاستاعى وتانداسىمىز الەم بىرىنشىلىگىنىڭ 1/16 فينالىندا وزىنەن بويى دا, قولى دا ۇزىن ۇندىستاندىق روحيت مورمەن جۇدىرىقتاستى. اراقاشىقتىقتى ساقتاي وتىرىپ بوكستاسقان تەمىرجانوۆ جەكپە-جەكتى ءوز پايداسىنا شەشتى.
سەرىكتەن كەيىن شارشى الاڭعا شىققان ۇلتتىق قۇرامانىڭ كاپيتانى, 67 كيلو سالماقتاعى ساڭلاعىمىز ابىلايحان ءجۇسىپوۆ تە جانكۇيەرلەر سەنىمىن اقتاپ, شيرەك فينالعا شىقتى. قۇراما ساپىنداعى ەكى الەم, ەكى وليمپيا ويىندارىنا قاتىسقان جالعىز بوكسشىمىز بۇل سىندا پولشالىق داميان دۋركاچتى 5:0 ەسەبىمەن ايقىن جەڭدى.
قازاقستاندىق بوكسشىلاردان كۇندىزگى سەسسيانى 75 كيلو سالماق دارەجەسىندە ونەر كورسەتكەن 21 جاستاعى نۇرقانات رايىس تۇيىندەدى. بۇعان دەيىن جاستار اراسىندا بولسىن, ەرەسەكتەر اراسىندا بولسىن بىردە-ءبىر رەت الەم بىرىنشىلىگىندە جۇدىرىقتاسىپ كورمەگەن وتانداسىمىز شيرەك فينالعا جولداما بەرەتىن ايقاستا بوسقىندار قۇراماسىنىڭ وكىلى سۋليمان اسلاميمەن كەزدەسىپ, ارىپتەستەرىنىڭ جەڭىستى جولىن جالعادى. ءتىپتى جەرلەسىمىز ەكىنشى راۋندتا قارسىلاسىن ءبىر رەت ەسەڭگىرەتىپ تە الدى. جەكپە-جەك قورىتىندىسى بويىنشا نۇرقانات تورەشىلەردىڭ ءبىراۋىز شەشىمىمەن جەڭىسكە جەتتى – 5:0.
كەشكى سەسسيانىڭ شىمىلدىعىن الەم چەمپيوناتىنداعى جارقىن جەڭىسىنىڭ ارقاسىندا قازاقستاننىڭ عانا ەمەس, الەم جانكۇيەرلەرىنىڭ ىقىلاسىنا بولەنگەن ساكەن بيبوسىنوۆ اشىپ بەردى. ازيا بىرىنشىلىگىنىڭ كۇمىس جۇلدەگەرى, ءۇندىستاننىڭ ۇكىلەپ قوسقان تاجىريبەلى بوكسشىسى دەپاكپەن شارشى الاڭدا جۇدىرىقتاسقان بيبوسىنوۆ ءۇش
راۋند بويى قارسىلاسىنىڭ ادىمىن اشتىرعان جوق. ءسويتىپ, تورەشىلەردىڭ شەشىمى بويىنشا ايقىن باسىمدىقپەن جەڭىسكە جەتكەن وتانداسىمىز جۇلدەلى ورىندارعا قاراي تاعى ءبىر ماڭىزدى قادام جاسادى.
الەم چەمپيوناتىنداعى تاماشا جەكپە-جەكتەرىمەن بوكس ماماندارىنىڭ نازارىن وزىنە اۋدارعان ءساناتالى تولتاەۆ (63,5 كگ) كەشە تاعى ءبىر جارقىن جەڭىسىمەن جانكۇيەرلەرىن قۋانتتى. وتانداسىمىز جاستار اراسىنداعى ەۋروپا چەمپيوناتىنىڭ كۇمىس جۇلدەگەرى ۋكراينالىق دەنيس پەسوتسكيدەن ايلاسىن اسىرىپ, سىڭارى ساماتالىمەن بىرگە شيرەك فينالدا جۇدىرىقتاساتىن بولدى.
قۇرامامىزداعى تاعى ءبىر ەگىزدىڭ سىڭارى نۇربەك ورالباي (80 كگ) ارتىق كۇش جۇمساماي شيرەك فينالعا جولداما الدى. ماجارستاننان كەلگەن پال كوۆاچتى 5:0 ەسەبىمەن تىزە بۇكتىرىپ, ۇزدىك سەگىز سپورتشىنىڭ قاتارىنا كىرگەن ونىنشى قازاقستاندىق بوكسشى اتاندى.
وسىلايشا, قازاقستان قۇراماسىنىڭ بوكسشىلارى 13 سالماقتىڭ ونىندا شيرەك فينالعا شىعىپ, جالپىكوماندالىق ەسەپتە ءبىرىنشى ورىنعا جايعاستى. ەكىنشى ورىندا ¼ فينالعا 8 بوكسشىسى شىققان رەسەي قۇراماسى تۇر. ال التى بوكسشىسى قالعان وزبەكستان, كۋبا جانە اقش قۇرامالارى ءۇشىنشى ورىندى ءوزارا ءبولىسىپ تۇر. سونىمەن قاتار شيرەك فينالعا ءۇندىستان مەن تايلاندتىڭ – 5, ازەربايجاننىڭ 4 بوكسشىسى جولداما الدى.
