«وسى ورايدا «قازاقستان ستۋدەنتتەر اليانسى» وتكىزەتىن رەيتينگكە ەرەكشە توقتالىپ وتۋگە بولادى. بۇل رەيتينگ ءبىلىم الۋشىلاردىڭ ساۋالداماسىنىڭ نەگىزىندە جاسالىپ, الەۋمەتتىك جەلىلەردە بەلسەندى تۇردە جارنامالانىپ ءجۇر. اتالعان رەيتينگتى دايىنداۋشىلار ەكىنشى جىل قاتارىنان قازاقستاننىڭ ۇزدىك جانە ساپاسى تومەن جوعارى وقۋ ورىندارى بويىنشا ءتىزىمدى جاريالايدى. ولاردىڭ 2020 جىلعى رەيتينگىندە كورسەتىلگەن بىردە-ءبىر ۇزدىك ۋنيۆەرسيتەت وسى جىلعى ۇزدىك جوعارى وقۋ ورىندارىنىڭ قاتارىنا كىرمەگەنى, ال وتكەن جىلعى ەڭ ناشار 10 ۋنيۆەرسيتەتتىڭ قاتارىندا بولعان نارحوز ۋنيۆەرسيتەتى بيىل ۇزدىك جوو-لار قاتارىنا كىرگەنى ەستە قالارلىق جايت. ەگەر ۇزدىكتەر ءتىزىمى جىل سايىن وزگەرىپ وتىرسا جانە وعان اكادەميالىق جەتىستىكتەرى تۋرالى ەشكىم ەستىمەگەن ۋنيۆەرسيتەتتەر كىرە الاتىن بولسا, قازاقستاندىق اكادەميالىق رەيتينگتەر تۋرالى قانداي جاقسى پىكىر بولۋى مۇمكىن؟ سونىمەن قاتار قازاقستان ستۋدەنتتەرى اليانسىنىڭ رەيتينگى مەملەكەت قارجىسىنا جاسالادى. ساۋالداما جۇرگىزىلگەن جوباعا ازاماتتىق باستامالاردى قولداۋ ورتالىعى 20 ملن تەڭگەگە جۋىق قاراجات بولىنگەن», دەپ اتاپ ءوتتى اكادەميالىق ادالدىق ليگاسىنىڭ ساراپشىسى ياكوۆ ۆورونكوۆ.
ال «اتامەكەن» ۇكپ باسقارما مۇشەسى ولجاس ورداباەۆتىڭ ايتۋىنشا, ناتيجەدە كورسەتىلگەن مۇنداي ۇلكەن ايىرماشىلىق رەيتينگ ادىستەمەسىندە ايتارلىقتاي كەمشىلىكتەردىڭ بار ەكەنىن اڭعارتادى.
«ادەتتە, ناتيجەلەردىڭ سونشالىقتى ءارتۇرلى بولۋى رەيتينگ ادىستەمەسىنىڭ وزگەرگەنىن كورسەتەدى. ياعني اقپاراتتار وزگەردى جانە تۇزەتىلدى. بۇل – ازىرلەۋشىلەر ءالى دە دۇرىس ادىستەمەنى ىزدەپ ءجۇر دەگەندى بىلدىرەدى. سەبەبى ەگەر ادىستەمە قالىپتاسقان بولسا, ول ايتارلىقتاي وزگەرمەيدى, ويتكەنى وزگەرتۋدىڭ ءوزىنىڭ بەلگىلى ءبىر نەگىزدەمەسى بار. مۇنى تەك وسىلاي وبەكتيۆتى تۇرعىدا تۇسىندىرۋگە بولادى», دەدى ول ءوز سوزىندە.
ءىس-شارا بارىسىندا اكادەميالىق ادالدىق ليگاسىنىڭ وكىلى ياكوۆ ۆورونكوۆ جوعارى وقۋ ورىندارىنىڭ كەز كەلگەن اكادەميالىق رەيتينگىسىنىڭ بەس نەگىزگى ماقساتىنىڭ بولۋى كەرەك ەكەنىن اتاپ ءوتتى. ياعني تالاپكەرلەردى جانە وزگە دە مۇددەلى تۇلعالاردى (جۇمىس بەرۋشىلەر, ورتالىق مەملەكەتتىك ورگاندار جانە ت.ب.) حاباردار ەتۋ, جوعارى وقۋ ورىندارىنا ۇيىمنىڭ جۇمىسىن جاقسارتۋعا مۇمكىندىك بەرەتىن دەرەكتەردى ۇسىنۋ, زەرتتەۋشىلەرگە دەرەكتەردى ۇسىنۋ, جوعارى وقۋ ورنى قىزمەتىن ادىستەمەدە بەلگىلەنگەن پارامەترلەر بويىنشا كەشەندى باعالاۋ جانە ازاماتتىق قوعام الدىنداعى ەسەپ.
ونىڭ ايتۋىنشا, قازىرگى ۋاقىتتا ءبىلىم بەرۋ باعدارلامالارىنىڭ ءبىر عانا رەيتينگى جوعارىدا كورسەتىلگەن ماقساتتارعا جاۋاپ بەرەدى. بۇل – جىل سايىن «اتامەكەن» ۇلتتىق كاسىپكەرلەر پالاتاسى جاسايتىن رەيتينگ. ولار ءاربىر جوعارى وقۋ ورنىنىڭ قىزمەتىن «مانساپتىق پەرسپەكتيۆالار», ء«بىلىم بەرۋ باعدارلاماسىنىڭ ساپاسى» جانە ء«بىلىم الۋشىلاردىڭ جەتىستىكتەرى» سياقتى ادىستەمەدە جازىلعان پارامەترلەر بويىنشا باعالايدى. بەلگىلەنگەن ينديكاتورلار بويىنشا نەگىزگى كورسەتكىشتەر رەسمي سايتتا اشىق جاريالانادى. ال ادىستەمە جىل سايىن جوعارى وقۋ ورىندارىنىڭ, اكادەميالىق ادالدىق ليگاسىنىڭ جانە باسقا دا ستەيكحولدەرلەردىڭ قاتىسۋىمەن قايتا قارالىپ, جاقسارىپ وتىرادى.
