Instagram جەلىسىندە جاريالانعان اقپاراتقا سايكەس, جول اپاتى اباي - گوركي كوشەلەرىنىڭ قيىلىسىندا بولعان.
«جاياۋ جۇرگىنشىنىڭ ۇستىنە كىرپىش قابىرعا قۇلاپ كەتتى. تەزىرەك ساۋىعىپ كەتۋىنە تىلەكتەسپىن. جۇرگىزۋشىلەر, جول ۇستىندە اباي بولىڭىزدار, جىلدامدىق رەجيمىن ساقتاڭىزدار! پوليتسيا قىزمەتكەرلەرى مەن جەدەل جاردەم قىزمەتىنە جەدەلدىگى ءۇشىن راحمەت», دەپ جازدى جەلى قولدانۋشىلارى.
وبلىستىق پوليتسيا دەپارتامەنتى جول اپاتى 1 قاراشا كۇنى ساعات 08:40-تا بولعانىن حابارلادى. ۆاز-2110 ماركالى اۆتوكولىگىنىڭ 21 جاستاعى جۇرگىزۋشىسى م.گوركي كوشەسىمەن ءجۇرىپ, اباي كوشەسىنىڭ قيىلىسىندا Honda ماركالى اۆتوكولىگىنە جول بەرمەگەن. ناتيجەسىندە ەكى كولىك سوقتىعىسىپ, ۆاز جۇرگىزۋشىسى جەكە ءۇيدىڭ قورشاۋىنا سوعىلعان. ءدال سول ساتتە كىرپىش قورشاۋ جاياۋ جۇرگىنشىنىڭ ۇستىنە قۇلاعان.
«جول-كولىك وقيعاسى سالدارىنان جاراقات العان ادام اۋرۋحاناعا جەتكىزىلدى. Honda اۆتوكولىگىنىڭ ەكى جولاۋشىسى مەديتسينالىق كومەككە جۇگىندى», دەپ ناقتىلادى پاۆلودار وبلىسى پد ءباسپاسوز قىزمەتى.
ۆەدومستۆودا اتاپ وتكەندەي, ۆاز-2110 اۆتوكولىگى ايىپ تۇراعىنا قامالدى.
قازىرگى ۋاقىتتا, تەكسەرۋ جۇمىستارى جۇرگىزىلىپ, ساراپتاما تاعايىندالدى.
