سپورت • 28 قازان، 2021

جولداما ءۇشىن جانتالاس

47 رەت كورسەتىلدى

بۇل كۇندەرى شورت-ترەكتەن قازاقستان ۇلتتىق قۇراماسىنىڭ وكىلدەرى كەلەسى جىلى قىتايدا وتەتىن قىسقى وليمپيا ويىندارىنا جولداما بەرەتىن الەم كۋبوگى كەزەڭىنىڭ جارىستارىنا قاتىسۋدا. جۋىردا عانا قىتايدا وتكەن بايراقتى باسەكەنىڭ ءبىرىنشى كەزەڭىندە ءساتتى ونەر كورسەتكەن جەرلەستەرىمىز بۇگىن جاپونيادا باستالاتىن ەكىنشى كەزەڭدە دە ۇزدىكتەر قاتارىنان كورىنۋدى كوزدەيدى.

پاندەمياعا بايلانىستى بىل­تىرعى رەسمي جارىستاردىڭ بارىنەن سىرت قالعان سپورتشىلار ءۇشىن بيىلعى ماۋسىمنىڭ ماڭىز­ى وتە جوعارى. ويتكەنى اينالدىرعان 3-4 ايدىڭ ىشىندە بۇكىل جارىستارعا قاتىسىپ، وليم­پيا ويىندارىنا جولداما الىپ ۇلگەرۋ كەرەك. سول ءتورت جىل­دىقتىڭ باستى دوداسىنا لي­تسەنزيا بەرەتىن باسەكەنىڭ العاش­قى كەزەڭىن بەيجىڭ (قىتاي) قالاسى قابىلدادى. مادىعالي قار­سىبەكوۆ باسشىلىق ەتەتىن قا­زاقستان كومانداسى ءۇشىن الەم كۋ­بوگىنىڭ العاشقى ىرىكتەۋ كەزە­ڭى ويداعىداي اياقتالدى دەپ ايتۋعا تولىق نەگىز بار. سەبەبى بەي­جىڭ ايدىنىندا ءبىزدىڭ سپورتشىلار ءۇش قاشىقتىق بويىنشا فينالعا شىعىپ، ونىڭ ەكەۋىندە جۇلدەگەرلەر قاتارىنان كورىندى. اتاپ ايتقاندا، 1500 مەترگە جارىسۋدا ءادىل عالياحمەتوۆ كۇمىس، 500 مەتر قاشىقتىقتا دەنيس نيكيشا قولا مەدال يەلەندى.

بۇل – ءادىل عالياحمەتوۆتىڭ الەمدىك دودالارداعى ءبىرىنشى، سو­نىمەن قاتار 1500 مەتردەگى قا­زاقستان قۇراماسىنىڭ دا جەڭىپ العان تۇڭعىش مەدالى. ياعني قا­زاقستان شورت-ترەگى ءۇشىن تاريحي مەدال دەسەك تە بولادى. ال بۇعان دەيىنگى جارىستاردا جەر­لەس­تەرى­مىز تەك 1000 جانە 500 مەتر قا­شىق­­تىقتا عانا ەل قور­جىنىنا جۇلدە سالىپ كەلگەن ەدى.

سوندا-اق 23 جاستاعى ورال­دىق سپورتشى ءۇشىن كۇمىس جۇل­دەنىڭ قۇنى التىنمەن پارا-پار دەسەك تە بولادى. ويتكەنى ءادىل في­نالدىق سايىستا كىل مىق­تى­­لارمەن سىنعا تۇسە وتىرىپ، مارە سىزىعىن ەكىنشى بولىپ كەستى. وتانداسىمىز فينالدا وليم­­پيادانىڭ ءۇش جەڭىم­پازى­مەن سايىسقا ءتۇستى. اتاپ ايتار بولساق، ءادىل عالياحمەتوۆ ەستافەتادا 2018 جىلعى پحەنچحان وليمپياداسىنىڭ چەمپيوندارى ليۋ شاولينگ پەن ليۋ شاوانگ جانە سوچي وليمپياداسىنىڭ جە­ڭىمپازى سەمەن ەليستراتوۆپەن جۇلدەگە تالاستى.

«ەكىنشى ورىن يەلەنگەنىمە وتە قۋانىشتىمىن. بۇل – مەنىڭ عانا ەمەس، بۇكىل كوماندانىڭ، قا­زاقستاننىڭ جەڭىسى. مۇنىمەن بو­ساڭسىپ قالمايمىز. الدا الەم كۋبوگىنىڭ ءۇش كەزەڭى بار. سونىڭ قورىتىندىسى بويىنشا وليمپيادا جولداماسى ساراپقا سالىنادى. دەمەك، تارتىستى كە­زەڭنىڭ ءبارى الدا»، دەدى ءادىل جارىستان سوڭ ۇلتتىق وليمپيادا كوميتەتىنىڭ ءباسپاسوز قىزمەتىنە بەرگەن سۇحباتىندا.

2017 (الماتى) جانە 2019 (كراس­نويارسك) جىلدارعى قىسقى ۋنيۆەرسيادانىڭ قولا جۇلدەگەرى، قۇرامانىڭ تاجىريبەلى سپورتشىسى دەنيس نيكيشا بۇل جولى دا ۇزدىكتەر قاتارىنان كورىنىپ، قولا جۇلدەگە قول جەتكىزدى. كەيىنگى جىل­دارى جار­قىن جەڭىسىمەن كوز­گە تۇسە الماي جۇرگەن وتان­داسىمىز ءۇشىن بۇل مەدال وعان ۇلكەن سەرپى­لىس اكەلگەنى راس. 500 مەترگە جۇگى­رۋدەن باستى ەكى قار­سىلاسى – قى­تاي جانە كانا­دا سپورتشىلارى جا­رىستان شەت­تەتىلگەن سوڭ، دەنيس­تىڭ جۇل­دە­گەر­لەر قاتارىندا بولاتىنى بار­شاعا بەلگىلى ەدى.

«500 مەترگە جۇگىرۋدەن قولا جۇلدەگەر اتاندىم. وليمپياداعا جولداما بەرەتىن ليتسەنزيالىق جارىستا جۇلدەلى ورىننان كورىنۋ – ۇلكەن جەتىستىك. بۇل – مەنىڭ عانا ەمەس، بۇكىل كوماندانىڭ ورتاق جەڭىسى. كەلەسى جارىستاردا دا بارىمىزدى سالىپ، ونەر كورسەتۋگە تىرىسامىز»، دەدى دەنيس.

2016 جىلعى الەم كۋبوگىنىڭ جەڭىمپازى، ۇلتتىق قۇرامانىڭ ۇزدىكتەرىنىڭ ءبىرى ابزال اجىعاليەۆ قىتايداعى جارىستا تەك 500 مەتر­دە باق سىناعان بولاتىن. وكى­نىش­كە قاراي، ول ەكى رەت ەسكەرتۋ الىپ، فينالدىق باسەكەدەن تىس قالدى.

«ليتسەنزيالىق الەم كۋبوگى­نىڭ العاشقى كەزەڭىن ەكى جۇل­دەمەن قورىتىندىلادىق. ۇزاق ۇزىلىستەن كەيىن مۇزايدىنعا ورال­عان سپورتشىلار ءۇشىن بۇل – تا­ماشا جەتىستىك. بۇگىنگە دەيىن 1000 مەتر­گە جۇ­گىرۋدەن نۇربەرگەن جۇ­ما­عا­زيەۆ پەن 500 مەترگە جۇگى­رۋ­دەن ابزال اجىعاليەۆ الەم كۋبو­گىندا جۇلدە العان بولاتىن. دەنيس نيكيشانىڭ قولا جۇل­دەسى دە قۋانىشىمىزدى ەسەلەي ءتۇستى. بۇل – ءالى باستاماسى. الدا الەم كۋبوگىنىڭ ءۇش كە­زەڭى بار. ءبىز قازىرگى قارقى­نى­مىزدى جوعالتپاي، بەيجىڭ وليم­پياداسىنا جولداما الۋ ءۇشىن بار كۇشىمىزدى سالامىز»، دەيدى مادىعالي قارسىبەكوۆ.

بۇگىن جاپونيانىڭ ناگويا قالاسىندا باستالاتىن الەم كۋبوگىنىڭ ەكىنشى كەزەڭى 31 قازاندا ءوز مارەسىنە جەتەدى. ال ءۇشىنشى كەزەڭنىڭ جارىس­تارى 18-21 قاراشا كۇندەرى ما­جارستاننىڭ دەبرەتسەن قالا­سىن­دا، سوڭعى شەشۋشى كەزەڭ 25-28 قاراشا كۇندەرى نيدەر­لاندتىڭ دور­درەحت قالاسىندا وتەدى. وسى جا­رىستاردىڭ قورى­تىن­دىسىنان كەيىن بەيجىڭ وليمپياداسىنا جولداما العان سپورت­شىلار ءتىزىمى بەلگىلى بولادى.

سوڭعى جاڭالىقتار

ۇقساس جاڭالىقتار