كوروناۆيرۋس • 28 قازان، 2021

«جاسىل» ايماقتاعى جەتىسۋدا ىندەت جۇقتىرۋ ازايعان جوق

34 رەت كورسەتىلدى

جەتىسۋدا جۇقپالى ىندەتتىڭ تارالۋى باسەڭدەگەندەي بولعانىمەن، قاۋىپ ءالى سەيىلگەن جوق. دەرەك بويىنشا وبلىستا وتكەن تاۋلىك ارالىعىندا 137 ادامنان كوروناۆيرۋس بەلگىسى انىقتالدى. ال پاندەميا كەزەڭىنەن بەرى دەرتتىڭ قۇرىعىنا ىلىنگەن ناۋقاس سانى 54 759 ادامعا جەتىپ وتىر.

وسىنشا ادامنىڭ كوروناۆيرۋسپەن اۋىرعانى زەرتحانالىق تەكسەرۋ ارقىلى راستالعان. قازىر وبلىس – ىندەت تارالۋى كورسەتكىشى بويىنشا «جاسىل» ايماق ساناتىندا. سوڭعى كۇندەرى اۋرۋ اسقىنىپ، مەديتسينالىق كومەككە جۇگىنگەن ناۋقاستار سانى جونىنەن وبلىس ورتالىعى وزىپ تۇر. تالدىقورعاندا 40 ادام اۋىرعان. مۇنان بولەك، تەكەلى قالاسىندا – 17، الاكول اۋدانىندا – 16، تالعار اۋدانىندا – 15، قاراساي مەن پانفيلوۆ اۋداندارىندا – 11، قاراتال اۋدانىندا – 10، ۇيعىر اۋدانىندا – 7 ناۋقاس، ەڭبەكشىقازاق، كوكسۋ، بالقاش، ەسكەلدى اۋداندارىندا – 2 ناۋقاستان، ال جامبىل اۋدانىندا 1 ناۋقاس دارىگەر كومەگىنە جۇگىنگەن. سونداي-اق بارلىعى
1 100 ادام ستاتسيونارلىق ەم قابىلداۋدا. اۋرۋحانالارعا ءبىر تاۋلىكتە 73 ادام ءتۇسىپ، 50 ادام شىعارىلدى. ايماقتاعى ينفەكتسيالىق توسەكتىك ورىن جۇكتەمەسى 46،5 پايىز شاماسىندا جانە جان­ساق­تاۋ بولىمىندە 42 پاتسيەنت جاتسا، ونىڭ 4-ەۋى وكپەنى جاساندى تىنىستاندىرۋ اپپاراتىنا قوسىلعان كورىنەدى.

وبلىستا ىندەتكە قارسى ەكپە سالۋ قارقىندى ءجۇرىپ جاتىر. ماسەلەن، ۆاكتسينانىڭ 1-كومپونەنتىن 798 671 ادام الىپ ۇلگەرگەن. ال ەكپەنىڭ 2-كومپونەنتىن 719 775 ادام سالدىرىپتى.

ايتپاقشى، الماتى وبلىسىندا العاش رەت اۋداندىق اۋرۋحانا دەڭگەيىندە وكپەسى تولىق زاقىمدانعان جۇكتى ايەل ەمدەلىپ شىقتى. ەم-شارا ەكستراكورپورالدى مەمبرانالىق وكسيگەناتسيا اپپاراتىن پايدالانا وتىرىپ جۇزەگە اسىرىلدى. ىلە اۋداندىق ورتالىق اۋرۋحاناسىنا جۇكتى كەلىنشەك COVID-19 دياگنوزىمەن، وكپەسىنىڭ 90 پايىزى زاقىمدانعان كۇيىندە جەتكىزىلگەن ەدى.

– 9 تامىز كۇنى جۇكتىلىكتىڭ 38-39 اپتاسىنداعى ايەل وتە اۋىر جاعدايدا اۋرۋحاناعا تۇسكەن بولاتىن. اۋىر حالدە تۇسكەن ايەلگە دەرەۋ وتا جاسالىپ، بالا امان-ەسەن دۇنيەگە كەلدى. بىراق ناۋقاستىڭ جاعدايى ناشارلاپ، قان قۇرامىن وتتەگىمەن قانىقتىراتىن ەكمو اپپاراتىنا قوسۋعا تۋرا كەلدى. ناۋقاس 31 كۇننەن كەيىن عانا وزدىگىنەن دەم الا باس­­­تا­دى، – دەيدى ىلە اۋدانى اۋرۋحاناسىنىڭ باس دارىگەرى باۋىرجان ىسقاق.

ال ءتورت بالانىڭ اناسى بايانسۇلۋ امانگەلديەۆا جانساقتاۋ بولىمىندە مەديتسينا قىزمەتكەرلەرىنىڭ كومەگىمەن قايتا اياققا تۇرىپ، وزدىگىنەن دەم الۋدى، قوزعالۋدى ۇيرەنگەنىن ايتادى.

– مەن جانساقتاۋ بولىمىندە 47 كۇن جاتتىم. ەكى اي بويى بالالارىمدى كورۋ ارمان بولدى. وكىنىشكە قاراي، بۇرىن كوپشىلىك جينالعان جەردە بەتپەردە تاققان ەمەسپىن. بۇل مەنىڭ باستى قاتەلىگىم بولدى. ويتكەنى ماسكا تاققان كەزدە ءوزىمدى جايسىز سەزىنىپ، اۋا جەتپەي تۇرعانداي بولاتىن. الايدا ءبىر جۇتىم اۋانى وزدىگىمنەن جۇتا الماي قينالعاندا قاتتى وكىندىم. قاتەلىگىمنىڭ سالدارىنان وتباسىمدى، تۋعان-تۋىستارىمدى، مەنىڭ ءومىرىم ءۇشىن ەكى اي بويى كۇرەسكەن دارىگەرلەردى اۋرەگە سالدىم. قازىر امان-ەسەن جازىلىپ، وتباسىما ورالدىم. دارىگەرلەرگە العىسىم شەكسىز، – دەيدى ول.

جۇقپالى ىندەتپەن كۇرەستە جەڭىسكە جەتكەن بايانسۇلۋ اۋرۋحانادا 58 كۇن جاتسا، سونىڭ 47 كۇنىن جانساقتاۋ بولىمشەسىندە وتكىزگەن ەكەن. جالپى، ىلە اۋداندىق اۋرۋحاناسىنىڭ دارىگەرلەرى ەمحاناعا COVID-19 دياگنوزىمەن جەتكىزىلىپ، وكپەسى 80 پايىزعا دەيىن قابىنعان تاعى دا بەس جۇكتى ايەلدىڭ جانىن امان ساقتاپ، ەمدەپ شىعاردى.

 

الماتى وبلىسى

 

سوڭعى جاڭالىقتار

ۇقساس جاڭالىقتار