عىلىم • 27 قازان، 2021

ۇلتتىق اكادەميالىق كىتاپحانادا «شورا سارىباەۆ اتىنداعى وقۋ زالى» اشىلدى

127 رەت كورسەتىلدى

شورا سارىباەۆ - ءتول عىلىم مەن ءبىلىمنىڭ دامۋىنا ولشەۋسىز ۇلەس قوسقان عالىم. اكادەميكتىڭ وتاندىق ءتىل عىلىمى مەن تۇركى دۇنيەسىنە سىڭىرگەن ەلەۋلى ەڭبەگىن ناسيحاتتاۋ ماقساتىندا قر ۇلتتىق اكادەميالىق كىتاپحاناسىندا «شورا سارىباەۆ تاعىلىمى» اتتى عىلىمي-پراكتيكالىق كونفەرەنتسيا ءوتتى، دەپ جازادى Egemen.kz.

عىلىمي-پراكتيكالىق كونفەرەنتسيا اياسىندا كىتاپحانا تورىنەن «شورا شامعالي ۇلى سارىباەۆ اتىنداعى وقۋ زالى» اشىلدى.

عالىمنىڭ ۇرپاعى شورا سارىباەۆتىڭ تاعىلىمدى عۇمىرىندا جيناپ، قۇراستىرعان جەكە كىتاپحاناسىن قر ۇلتتىق اكادەميالىق كىتاپحاناسىنىڭ قورىنا سىيعا تارتتى. سونىڭ ىشىندە عالىمنىڭ جەكە كىتاپحاناسىندا جيناقتالعان 5000-نان استام قازاق ءتىل ءبىلىمىنىڭ ديالەكتولوگيا، مورفولوگيا، لەكسيكولوگيا، لەكسيكوگرافيا، بيبليوگرافيا، ءتىل تاريحى، اۋدارما، ەسىمناما، ت.ب. سالالارىنا ارنالعان عىلىمي زەرتتەۋ ەڭبەكتەرى دە بار.

شورا سارى­باەۆتىڭ تاعىلىمدىق-تانىمدىق ەڭبەكتەرى مەن عيبراتتى عۇمىرىن ۇلگى ەتۋگە ارنالعان شاراعا بعم عىلىم كوميتەتىنىڭ ءتورايىمى جاننا قۇرمانعاليەۆا، بعم ءتىل ساياساتى كوميتەتىنىڭ توراعاسى ادىلبەك قابا، قر پارلامەنتىنىڭ دەپۋتاتتارى قازىبەك يسا، دارحان مىڭباي، ءامىرحان راقىمجانوۆ، قازاقستان جازۋشىلار وداعىنىڭ توراعاسى ۇلىقبەك ەسداۋلەت، پەداگوگيكا عىلىمدارىنىڭ دوكتورى، پروفەسسور، قر ۇلتتىق اكادەميالىق كىتاپحاناسىنىڭ باسشىسى ءۇمىتحان مۇڭالباەۆا، ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى انار فازىلجانوۆا، مەملەكەت جانە قوعام قايراتكەرلەرى مىرزاتاي جولداسبەكوۆ، ءادىل احمەتوۆ، قۋانىش سۇلتانوۆ، قر ۇلتتىق عىلىم اكادەمياسىنىڭ اكادەميكتەرى ءۋاليحان قاليجان، باۋىرجان وماروۆ، دارحان قىدىرالى، كارىمبەك قۇرماناليەۆ، شەرۋباي قۇرمانباي ۇلى قاتىستى. 

جينالعاندار عالىمنىڭ ءتىل ءبىلىمى مەن تۇركى دۇنيەسىن دامىتۋعا قوسقان ۇلەسىن ايرىقشا اتاپ ءوتىپ، اكادەميكتىڭ اتىنا اشىلعان وقۋ زالىنىڭ ىزدەنۋشىلەر، عىلىمعا قىزىعۋشىلار ءۇشىن ەرەكشە پايدالى بولاتىنىنا سەنىم ءبىلدىردى. 

جيىندا ءسوز العان مەملەكەت قايراتكەرى مىرزاتاي جولداسبەكوۆ عالىم جايلى ەستەلىكتەرىمەن ءبولىسىپ، كىتابىن سىيعا تارتتى.

سونىمەن بىرگە، حالىقارالىق تۇركى اكادەمياسىنىڭ پرەزيدەنتى  دارحان قىدىرالى وقۋ زالىندا شورا سارىباەۆتىڭ كىتاپتارى عانا ەمەس، قولدانعان بۇيىمدارىنىڭ دا قويىلعانىن اتاپ ءوتىپ، كىتاپحانا ءارى عالىمنىڭ مۋزەيى دەپ باعا بەردى. سونداي-اق، تۇركى اكادەمياسى شىعارعان 150 كىتاپتى وقۋ زالىنا تارتۋ ەتەتىنىن جەتكىزدى.

عىلىمي-پراكتيكالىق كونفەرەنتسيا بارىسىندا اكادەميك سەيىت قاسقاباسوۆ، پارلامەنت دەپۋتاتى امىرحان راقىمجانوۆ، اقىن ۇلىقبەك ەسداۋلەت ءسوز سويلەپ، قازاق عىلىمىنىڭ شوقتىعى بيىك تۇلعاسىنىڭ وقۋ زالىنىڭ اشىلعانىمەن قۇتتىقتادى.

 

سوڭعى جاڭالىقتار

نار نارىمبەتوۆ ەدى...

قازاقستان • كەشە

«وميكرون» شتامى وقشاۋلايدى

كوروناۆيرۋس • كەشە

پورترەتتەگى پاراسات

ەلباسى • كەشە

ۇقساس جاڭالىقتار