كەزدەسۋ بارىسىندا قوس تاراپ ساۋدا-ەكونوميكالىق, قارجى, ينۆەستيتسيا جانە مادەني-گۋمانيتارلىق سالالارداعى قاتىناستاردى دامىتۋدىڭ پەرسپەكتيۆالارىن قاراستىردى. سونداي-اق, پاندەمياعا قارسى كۇرەس شارالارىنا, كليماتتىڭ وزگەرۋىنە جانە ايماقتىق كۇن تارتىبىنە قاتىستى ماسەلەلەر تالقىعا سالىندى.
مەملەكەت باسشىسى قاسىم-جومارت توقاەۆ ەلىمىزدىڭ تىلەۋلەس دوسى ميحاي ۆارگاعا ءىلتيپات ءبىلدىرىپ, ونىڭ قازاقستانعا ساپارى تابىستى بولاتىنىنا جانە ەكى مەملەكەت اراسىنداعى ىنتىماقتاستىقتى ودان ءارى دامىتۋعا سەرپىن بەرەتىنىنە سەنىم ءبىلدىردى.
ماجارستان پرەمەر-ءمينيسترىنىڭ ورىنباسارى – قارجى ءمينيسترى قاسىم-جومارت توقاەۆقا العىس ءبىلدىرىپ, الەمدەگى ەپيداحۋالعا قاراماستان, قازاقستان مەن ماجارستان اراسىنداعى بايلانىستاردىڭ دامۋ قارقىنى باسەڭدەمەگەنىن ەسكە سالدى.
قازاقستان پرەزيدەنتى مەن ماجارستان پرەمەر-ءمينيسترىنىڭ 2019 جىلعى ساۋىردە نۇر-سۇلتان قالاسىندا تابىستى كەزدەسۋ وتكىزگەنىن ايتقان ميحاي ۆارگا ماجارستان باسشىلىعى قاسىم-جومارت توقاەۆتىڭ بۋداپەشتكە الداعى ۋاقىتتا جاسايتىن ساپارىن اسىعا كۇتىپ وتىرعانىن ايتتى.
ماجارستان ساياساتكەرى پرەزيدەنتكە پاندەميا كەزىندە كورسەتكەن قولداۋى ءۇشىن العىس ءبىلدىرىپ, نۇر-سۇلتان قالاسىنداعى بيزنەس-فورۋمنىڭ تابىستى وتكەنىن العا تارتتى. اتالعان شارا بارىسىندا بىرقاتار ماڭىزدى ينۆەستيتسيالىق كەلىسىمگە قول قويىلدى.
كەزدەسۋ سوڭىندا قاسىم-جومارت توقاەۆ قازاقستان مەن ماجارستان اراسىنداعى ىنتىماقتاستىقتى دامىتۋعا قوسقان ۇلەسى ءۇشىن ميحاي ۆارگانى II دارەجەلى «دوستىق» وردەنىمەن ماراپاتتادى.
