سپورت • 26 قازان، 2021

چەمپيون سوڭعى تۋردا انىقتالادى

39 رەت كورسەتىلدى

فۋتبولدان قازاقستان چەم­پيوناتىنىڭ 25-تۋر ويىندارى اياسىندا بىرىنشىلىكتىڭ باس جۇلدەسىنەن الدەقاشان ءۇمىت ۇزگەن الماتىنىڭ «قاي­راتى» مەن بيىلعى چەم­­پيوندىقتان باستى ۇمىت­كەر ەلوردانىڭ «اس­تا­ناسى» كەزدەستى. ءبىراز جىل­دان بەرى ەكى كوماندا ارا­­سىنداعى كەزدەسۋ ەلىمىز­دەگى ەڭ تارتىستى ماتچ سانالادى. جانكۇيەرلەر تاراپىنان «ەل كلاسسيكوسى» دەپ ايدار تاعىلعان ەكى كلۋب ارا­سىنداعى بۇل جولعى تە­كەتىرەس تە ادەتتەگىدەي تار­تىس­­تى ءوتتى.

ەكى ۇجىم ءۇشىن دە بۇل جولعى ويىننىڭ ماڭىزدىلىعى وتە ەرەك­شە ەدى. سەبەبى «قايرات» ءوز الا­ڭىنداعى ويىندا «استانادان» جەڭىلىپ، ەلوردالىق كلۋبقا ءۇش ۇپايدى وپ-وڭاي ۇستاتا سالاتىن بولسا، وندا چەمپيوناتتاعى باستى قارسىلاسىنا چەمپيوندىق ءتاجدى دە ءوز قولىمەن تاپسىراتىن ەدى. الماتىلىق ۇجىم ءۇشىن «ورتا­لىق» ستاديوندا، ونىڭ ۇستىنە ءوز جان­كۇيەرلەرىنىڭ قولداۋىمەن وتكەن ويىندا «استانادان» جە­ڭىلۋگە بولمايدى. سوندىقتان بۇل ويىندا الماتىلىق كلۋبتى تەك جەڭىس قانا قاناعاتتاندىراتىن.

ال «استانا» ويىنشىلارى جەڭىسكە جەتەتىن بولسا، سىرت الاڭ­دا باستى قارسىلاستارىنان باسىم ءتۇسىپ، ءبىر جىل بۇرىن پاندەمياعا بايلانىستى الماتىدا وتكەن بى­رىنشىلىكتە جىبەرگەن ەسەسى مەن چەمپيوندىق اتاعىن دا قاي­تارىپ الۋعا تاعى ءبىر ماڭىزدى قادام جاسايتىن ەدى. ويتكەنى تۋر­نير كەستەسىندە «استانانى» وكشە­لەپ كەلە جاتقان «توبىل» ەلور­دالىقتاردان ءبىر ۇپاي قالىپ كەلە جاتقان-دى. سول ءۇشىن بۇل ويىندا «استاناعا» ءۇش ۇپاي اۋاداي قاجەت بولاتىن.

كەز­دەسۋدىڭ العاشقى مينۋت­تارىندا «استانا» فۋتبولشىلارى بەلسەندىرەك بولىپ، «قايرات» قاق­پاسىنىڭ الدىندا بىرقاتار قاۋىپتى شابۋىل ۇيىمداستىرىپ ۇلگەردى. بىراق قارىمتا شابۋىلعا يەك ارتقان الاڭ قوجايىندارى 8-مينۋتتا گول سوعىپ، ەسەپتە العا شىقتى. گولدىڭ اۆتورى – نەبويشا كوسوۆيچ. يان ۆوروگوۆسكيدىڭ اسىرعان پاسى العاشىندا «استانا» ويىنشىسىنا ءتيىپ، كەرى قايتتى. كەيىننەن دوپقا «قايراتتىڭ» چەر­نوگوريالىق فۋتبولشىسى ءبىرىنشى جەتىپ، «استانا» قاقپاشىسىن قاپى قالدىردى. بۇل ەسەپ ماتچ سوڭىنا دەيىن وزگەرىسسىز قالدى.

ءبىرىنشى تايمنىڭ سوڭىنا قاراي ماتچتا قىزىق وقيعا ورىن الدى. «استانانىڭ» باس باپكەرى اندرەي تيحونوۆقا كەزدەسۋدىڭ باس تورەشىسى يگور چەسنوكوۆتىڭ الاڭداعى ءىس-ارەكەتى ۇناماسا كەرەك، شاكىرتتەرىن ءبىرىنشى كەزەڭنىڭ اياقتالۋىنا ەكى مينۋت قالعاندا كيىنىپ-شەشىنۋ بولمەسىنە الىپ كەتتى. بىراق ارا­دا بىرنەشە مينۋت وتكەندە فۋت­بولشىلار قايتا الاڭعا شى­عىپ، ويىندى جالعاستىردى. ماتچتان كەيىن تيحونوۆ ويىن ساتىندە الاڭ­نان شىعىپ كەتۋ ءوزىنىڭ ەمەس، فۋت­­بول­شىلاردىڭ ورتاق شەشىمى ەكە­نىن ايتتى.

جالپى، بۇل – قازاقستان فۋت­بول تاريحىنداعى ءبىرىنشى جاعداي ەمەس. بۇعان دەيىن «قايسار» جانە «قايرات» فۋتبولشىلارى دا وسىن­داي جاعدايدى باستان وتكەرىپ، الاڭ­دى تاستاپ كەتكەن بولاتىن. ءبىر قىزىعى، ولار سول كەتكەننەن جاسىل الاڭعا قايتا ورالماعان ەدى.

وسىلايشا «قايرات» ماڭىزدى ويىندا قارسىلاسىنان 1:0 ەسە­بىمەن باسىم ءتۇستى. ال قاتار وتكەن «توبىل» مەن «شاحتەر» ارا­سىنداعى كەزدەسۋدە قوستا­ناي­لىق ۇجىم جەڭىسكە جەتىپ، تۋر­نير كەستەسىندە ءبىرىنشى ورىن­عا كوتەرىلدى. قوستانايعا ەكىن­شى قۇ­رام­مەن كەلگەن «شاحتەر» الاڭ يە­لەرىنەن ءىرى ەسەپپەن جە­ڭىلدى. ماتچتىڭ 16-مينۋتىندا الەك­ساندر ماروچكين گول سوقسا، كەيىن يگور سەرگەەۆ ەسەپتى ەسەلەدى. ال ەكىنشى تايمدا ازات نۇرعاليەۆ پەن ەلگۋدجا لوبجانيدزە ءبىر-ءبىر گول سالىپ، ماتچتىڭ نۇكتەسىن قويدى. قوناقتار ساپىنان جۇبانىش گولىن اندرەي گيورگيادي سوقتى. وسىلايشا بۇل ماتچ 4:1 ەسەبىمەن «توبىلدىڭ» پايداسىنا شەشىلدى.

«شاحتەر» بۇل ويىندا جەڭ­سە دە، جەڭىلسە دە ەشتەڭە جوعالت­پايتىن بولعان سوڭ، بار كۇشىن الدا بولاتىن ەل كۋبوگىنداعى ماتچقا ساقتاپ، قوستانايعا جاس فۋتبولشىلارىن جىبەردى. ال نەگىزگى قۇرامنىڭ فۋتبولشىلارى كۋبوك باسەكەسىندە «تارازبەن» وتەتىن ماتچقا دايىندالىپ جاتىر.

25-تۋردىڭ قالعان ويىندا­رىنىڭ ناتيجەسى مىناداي: «ور­داباسى» – «تاراز» – 2:1، «تۇ­ران» – «اقتوبە» – 1:2، «قايسار» – «جەتىسۋ» – 0:1، «كاسپي» – «اق­جايىق» – 2:2، «اتىراۋ» – «قى­زىلجار» – 0:0:

بيىلعى بىرىنشىلىكتە كىم چەم­پيون بولاتىنىن سوڭعى تۋر ويىن­دارى انىقتاپ بەرەدى. بۇعان دەيىنگى چەمپيوناتتاردا جەڭىمپاز كوماندا 3-4 تۋر بۇرىن انىقتالىپ قوياتىن بولسا، بيىل ءبىرىنشى رەت چەمپيون كوماندا سوڭعى تۋردا انىقتالماق.

30 قازاندا وتەتىن 26-تۋر ويىن­دارىندا مىنا كوماندالار كەز­دەسەدى: «تاراز» – «قايسار»، «جە­تىسۋ» – «قايرات»، «استانا» – «تۇران»، «اقتوبە» – «كاسپي»، «اق­جايىق» – «توبىل»، «شاحتەر» – «اتىراۋ» جانە «قىزىلجار» – «ورداباسى».

سوڭعى جاڭالىقتار

ۇقساس جاڭالىقتار