ەكولوگيا • 25 قازان، 2021

قازاقستاندا سۋ تاپشىلىعى 40 پايىزعا ارتۋى مۇمكىن

133 رەت كورسەتىلدى

سوڭعى جىلدارى ەكولوگتار قازاقستاندا جانە ونىڭ شەكاراسىندا ورنالاسقان وزەن-كولدەردەگى سۋدىڭ تايازدانۋى، لاستانۋى نەمەسە تۇز دەڭگەيىنىڭ كوتەرىلىپ جاتقانى جايلى ءجيى دابىل قاعىپ ءجۇر. وسى ماسەلەنى ەسكەرگەن Egemen Qazaqstan گازەتىنىڭ ءتىلشىسى قالماحانبەت مۇقامەتقالي باسىلىمنىڭ 25 قازاندا جارىق كورگەن سانىندا «بالقاشتان تۇز كوتەرىلۋ قاۋپى بار» ماقالاسىن جاريالادى، دەپ جازادى Egemen.kz.

تابيعا سۋ كوزدەرىندەگى پروبلەما جايىق، سىرداريا، ەرتىس، ىلە جانە وزگەدە وزەن-كولدەردەن قاتار بايقالىپ وتىر. ال ترانسشەكارالىق وزەن سۋىنىڭ كەمىپ كەتۋىنەن زارداپ شەگىپ وتىرعان تابيعي بايلىق كوزىنىڭ كوش باسىندا بالقاش كولى تۇر. 

«وكىنىشكە قاراي بالقاش كولىنىڭ ەكو­لوگيالىق قاۋپىن انىقتاپ، ۇكىمەت نازا­رى­نا ۇسىنىپ وتىرعان مەكەمەلەردىڭ جۇمى­سىن­دا بىرىزدىلىك جوق. ونىڭ ۇستىنە سوڭعى 14 جىل كولەمىندە كولگە قاتىستى كەشەندى زەرتتەۋ جۇمىسى جۇرگىزىلمە­گەن كورىنەدى. ياعني كول سۋىنىڭ جىل سا­يىن قانشالىقتى ازايعانىن تاپ باسىپ ايتۋ قيىن. ال اشىق دەرەك كوزدەرىنە جۇگىنسەك، بالقاش كولىنىڭ سۋ كولەمى تەڭىز دەڭگەيىمەن سالىستىرعاندا 342،8 مەتر­گە دەيىن تومەندەگەن. بۇل – 2012 جىلعى دەرەك. جالپى، سوڭعى 2 مىڭ جىل بويى تەڭىز دەڭگەيىنەن 346 مەتردەي جوعارى قالپىنان اينىماعان كولدىڭ تەرەڭدىگى وتكەن عاسىردىڭ 60-جىلدارىنان باستاپ تومەندەۋگە بەت الىپتى. قازىر سۋدىڭ دەڭ­­گەيى بۇرىنعى ەرنەۋىنەن 3-4 مەتر­گە دەيىن قۇل­ديلاعانى ايتىلادى»، دەيدى ءتىلشى. 

سۋ ارنالارىنداعى ەكولوگيالىق ماسەلەلەر ۋاقىتىلى شەشىمىن تاپپاسا 2030 جىلعا قاراي سۋ تاپشىلىعىنىڭ كولەمى 40 پايىزعا جەتۋى مۇمكىن. بۇل جايىندا مەملەكەت باسشىسى قاسىم-جومارت توقاەۆتىڭ قازاقستان حالقىنا ارناعان «حالىق بىرلىگى جانە جۇيەلى رەفورمالار» اتتى جولداۋىندا دا ايتىلدى.
مەملەكەت باسشىسى سۋ تاپشىلىعىن جويۋدىڭ جالعىز جولى رەتىندە جاڭا تەحنولوگيالار مەن تسيفرلاندىرۋ ارقىلى سۋدى ۇنەمدەۋ ەكەنىن باسا ايتتى. سونداي-اق، تابيعي سۋ كوزدەرىنە ونەركاسىپ پەن ادامي فاكتوردىڭ كەرى اسەرىنەن تۋاتىن قاۋىپتى جويۋ دا باستى قاعيدا ەكەنى ۇمىتىلماۋى ءتيىس.

تاقىرىپقا قاتىستى ۇسىنىلعان تىڭ دەرەكتەر مەن دالەلدەمەلەردى قالماحانبەت مۇقامەتقاليدىڭ «بالقاشتان تۇز كوتەرىلۋ قاۋپى بار» ماقالاسىنان وقي الاسىز.

سوڭعى جاڭالىقتار

ۇقساس جاڭالىقتار